في الباب ده، يتواصل خبراء راحة بالي معاكم للتعليق على اعترافاتكم ومشاكلكم والأسبوع ده خبيرة التربية الإيجابية وعلم النفس الإيجابي رنا هاني هتعلق على المشكلة.
●● كل الرسائل تخضع للسرية والخصوصية التامة، وبدون ذكر أي معلومات شخصية.
اكتبي مشكلتك هنا
المشكلة:
بنتي عندها 4 سنين ومن ساعة ما عرفت إني حامل وهي متغيرة خالص، بتتعصب بسهولة وبتعيط وتتقمص على أتفه الأسباب وبتضربني في بطني مع إنها لما بنتكلم بتقول إنها فرحانة جدًا إن هيجي لها أخت وهي أصلًا اللي كانت بتزن عشان يجيلها أخوات، أنا مش عارفة أطمنها ازاي وخايفة بعد الولادة تتأثر أكتر أو سلوكها يسوء
الرد:
يا مساء الفل
اللي بنوتتك فيه ده طبيعي جدًا ومتوقع، ومعظم الأطفال بيعدوا بيه، كل واحد باختلاف رد فعله وطريقة تعبيره عن قلقه. هي فعلًا مبسوطة ومتحمسة إنها هيكون عندها أخت لكن في نفس الوقت مشاعرها ملخبطة ومش عارفة يا ترى البيبي الجاي ده هيكون مصدر تهديد ليها فعلًا؟ هياخد مكانها في البيت؟ أو حتى حبكم ليها هيتأثر؟
كل دي أسئلة بتدور في دماغها ومش عارفة تعبر عنها ازاي، غير بالغضب والعياط، ومش محتاجة منكم غير إنكم تطمنوها وتوصلوا لها رسالة الحب والقبول غير المشروط. هاقول لك على شوية نصايح تساعدك في التعامل مع إحساسها بالغيرة والقلق من البيبي اللي جاية.
نصائح للتعامل مع غيرة الأطفال
- الكواليتي تايم:
أهم حاجة تساعدك في الشهور اللي باقية قبل الولادة، لإن بنتك محتاجة دلوقتي تتطمن إنها متشافة جدًا وإن الحمل أو فرحتك بقرب وصول البيبي الجديد مش هيأثر في حاجة. وده هيحصل لما تقعدوا كل يوم سوا نص ساعة في اليوم انتي وهي بس، بتلعبوا وتتكلموا وتضحكوا بس من غير موبايل ولا أي مقاطعات.
- التحضير:
اشركيها معاكي في التحضير لحاجات البيبي وخدي رأيها واعملي بيه ولو هتستخدمي أي حاجة من حاجتها للبيبي الجديدة لازم يكون بإذنها وموافقتها.
- فكرة الأخوات:
ابدأي احكي لها قصص كتير عن الأخوات وفايدتهم في حياة بعض.
- الأخت الكبيرة:
اطلبي من الناس اللي حواليكن لما يتكلموا عن البيبي والولادة دايمًا يشركوها في الكلام ويباركوا لها إنها هتكون أخت كبيرة وإن البيبي محظوظ بوجودها.
- دور الأب:
طبعًا الأب دوره كبير قوي الفترة ده ولازم يقرب منها ويقضي معاها وقت خاص عشان تتعود على تقضية وقت معاه قبل وصول أختها لأن ده هيساعدكم جدًا بعد الولادة بإذن الله.
وانصحك بقراية المقال اللي كتبت فيه تجربتي في الاستعداد وتهيئة ابني الكبير لاستقبال أخوه الصغير والنصايح اللي استخدمتها معاه بعد وصول أخوه اللي قللت من الغيرة كتير.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك