في الباب ده، يتواصل خبراء راحة بالي معاكم للتعليق على اعترافاتكم ومشاكلكم والأسبوع ده خبيرة التربية الإيجابية وعلم النفس الإيجابي رنا هاني هتعلق على المشكلة.
●● كل الرسائل تخضع للسرية والخصوصية التامة، وبدون ذكر أي معلومات شخصية.
اكتبي مشكلتك هنا
المشكلة:
ولادي فيهم عادة غريبة معصباني جدًا، هي إنهم مش بيبدؤوا شقاوة وعدم سمعان للكلام غير لما بنكون في تجمع العيلة مثلًا أو قصاد الناس. بيتصرفوا حاجات متأكدين إنها غلط واستحالة يعملوها واحنا لوحدنا، بيعملوها عادي قدام الناس. هل ده له سبب؟ واتصرف في الوضع ده ازاي فني بفقد أعصابي وتقريبًا بطلت أشوف حد بسببهم وبسبب التعليقات عليهم.
الرد:
أوقات كتير ولادنا بيتصرفوا تصرفات واحنا عند ناس في بيتهم أو عندنا ضيوف مثلًا بنعتبرها عيب قوي في حقنا وبنحس بسببها بالإحراج قدام الناس، مع إن ممكن ولادنا يتصرفوا نفس التصرفات ده في بيتنا أو مش قدام حد وبنحس إنها تصرفات طفولية عادية أو غلطات تتصلح، لكن معظم الأوقات وجود الناس وتصرفات ولادنا قدامهم وخوفنا من حكم الناس ونظرتهم لينا ولولادنا بيشكّل علينا ضغط كبير. واللي بيأثر على ردود أفعالنا وطريقة تصرفنا مع ولادنا لو حسينا بإحراج بسببهم قدام الناس وخاصةً لو أنا وهو بنعرف نتفاهم، بس في وجود الضغط ده باخرج عن شعورى وممكن أضربه أو أزعق له إرضاءً ليهم وحفاظًا على منظري.
أتصرف ازاي لما ابني يحرجني؟
طيب أعمل إيه لما ابني يعمل حاجة غلط قصاد الناس ويبتدوا يراقبوا هتصرف معاه ازاي أو يطالبوني كمان بإني آخد موقف، بالذات لو عمل موقف فيه تطاول على الكبار؟
خلينا متفقين في الأول إننا بنربي ولادنا ونعلمهم يتصرفوا ازاي ونوجههم عشانهم وعشان يقدروا يعيشوا مرتاحين، مش عشان الناس تسقف لنا أو يقولوا علينا عرفنا نربي، وإن محدش فينا مش بيتعرض للموقف ده بدرجات مختلفة وبتحس إنها أم مش عارفة تسيطر وتربي ابنها.
- هاتي تسلية
فيه شوية حاجات صغيرة ممكن نعملها تساعدنا عشان نتجنب الإحراج اللي بيسببه لنا تصرفات ولادنا قدام الناس. يعني لو رايحة مكان بطفل صغير وانتي عارفة إن المكان ده ما فيهوش أطفال عشان ابنك\بنتك يتسلوا معاهم أو مكان غير مهيئ لاستقبال الأطفال أصلًا، خلّي دايمًا معاكي في شنطتك لعب صغيرة ميكونش شافها قبل كده، أو مش بيلعب بيها كتير عشان تكون مبهرة بالنسبة للطفل وتسليه فعلًا مش زهقان منها وتطلعيها وقت ما تحسي إن ابنك هيبدأ ينزل ينطلق ويبوظ في حاجات الناس.
- وقت الشاشات
ممكن كمان توفري وقت الشاشات اللي مسموح لطفلك في اليوم وتخليه في الوقت اللي هتكوني عايزاه فيه يكون قاعد هادي أو رايحين عند ضيوف. لكن لو ابنك الصغير بدأ يدخل في نوبة غضب وبدأتي تحسي بالتوتر قدام الناس وحاسة إنك مش هتقدري تتصرفي بطريقة هادية وتتصرفي بغضبك يخلّي الموقف يسوء خديه في حضنك واخرجي من المكان وما تستلميش للتصرف تحت ضغط الناس.
- كلمي الناس
خليكي طبيعية واتصرفي زي العادي بتاعك وقولي للي حواليكي عادي إنك مش بتحبي تقوّمي ابنك في وجود ناس لإن ده بيحرجه وبيضغطه وبيخلّي الموضوع صعب عليه وعليكي وإنك بتفضّلي إن ده يكون بينك وبينه، وما تحاوليش أبدًا تعلقي على تصرفات ابنك\بنتك قدام الناس أو تفقدي أعصابك أو تنتقدي وتوجّهي وتحرجي طفلك قدام الناس لإن ده بيحسس الطفل إنه قليل وبيأثر كتير على ثقة الأطفال في نفسها وبيحسسهم إنهم مرفوضين بسبب أخطائهم. لو تقدري تطلبي تتكلمي مع الطفل على جنب بعيد عن الناس وتفكّريه بالقواعد اللي متفقين عليها أو تعملوا اتفاق جديد مناسب للموقف.
- لما تروحوا
وبعد كده، لما تروحي البيت، تتكلمي معاه وتعبري له عن مشاعرك وإن الموقف ده ضايقك وتسمعي منه وتحاولوا تحلوا الموضوع عشان ما يتكررش. لكن التقويم والتعديل قصاد الناس عشان ما يزعلوش أو ما يقولوش علينا حاجة ده مش هيعلم الطفل غير إنه ممكن يدخله في عند عشان يرد كرامته قصاد الناس.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك