محتويات المقال
مشكلة تسريب البامبرز من أكتر المشاكل اللي بتواجه الأم الجديدة. الحقيقة المشكلة مش بتزيد قوي في الشتا، لكن عواقبها في الشتا بتكون سخيفة جدًا. تسريب البامبرز خلال الشتاء بيخلي الطفل عرضة أكتر للعيا، وكمان بيخلي الأم تضطر تغير له وتغسل له الـ7 طبقات اللي هي ملبساهم كل ساعتين. عشان كده، في المقال ده، هنعرف أسباب تسريب البامبرز وحل مشكلة تسريب البامبرز.
اعرفي من هنا أنواع وأسعار الحفاضات في مصر
أسباب تسريب البامبرز
طبعًا، إذا عرف السبب، بطل العجب! عشان كده، خلينا نفهم سبب تسريب البامبرز أو الحفاض عشان نفهم ازاي نتفاداه. الحقيقة هم أكتر من سبب. تعالوا نشوفهم:
- مستوى ADH مش عالي.
- جسم البيبي بين مقاسين.
- البيبي بيتقلب كتير.
- البيبي بينام على بطنه.
مستوى الـ ADH
الـADH هو antidiuretic hormone وده هرمون بتعلى نسبته مع التقدم في العمر. يعني البالغين مثلًا ما بيجي لهمش احتياج كبير في فترة الليل إنهم يدخلوا الحمام. ده لإن الهرمون ده بيتحكم في إفراز الجسم للبول. (إلا طبعًا في الحالات المرضية). إنما عند الأطفال، الهرمون ده بتكون نسبته مش عالية وبناء عليه بيفضل طول الليل يتبول.
أعراض التهاب الحفاض وطرق العلاج
جسم البيبي بين مقاسين
ده معناه إن البيبي كبر على المقاس الأصغر بس لسه مش في حجم المقاس الأكبر. وده بيخلي تسريب البامبرز طبعًا أعلى. إما إن الحفاض أصغر منه فبيتملي بسرعة وبيطلع منه السائل، أو أكبر منه فبيتسرب منه.
البيبي بيتقلب كتير
لو طفلك حركي، وبيتحرك/بيفرك/بيتقلب طول ما هو نايم، يبقى أكيد هتعاني من تسريب البامبرز، لإن ثباته في النوم بيقلل جدًا من احتمالية التسريب.
البيبي بينام على بطنه
دي وضعية نوم قد تكون مريحة، لكن الحقيقة إنها بتسبب الضغط على الحفاض من الأمام وبالتالي كل السوائل بتتسرب للخلف وبتخلي الحفاضة تسرب.
أشهر العلاجات المنزلية الطبيعية لالتهابات الحفاضة
حلول مشكلة تسريب البامبرز
- تغيير الحفاضة قبل النوم مباشرة.
- استعملي الحفاضات الليلية.
- غيري ماركة الحفاض اللي بتستخدميه.
- لو ولد، نزلي القضيب لتحت.
- طلعي الحفاض لفوق شوية.
- غيري الحفاض وقت رضعة نص الليل.
- نيّمي البيبي على ضهره.
- قللي مشروبات معينة في وقت الليل.
- استخدمي مرتبة التطرية فوق المرتبة العادية.
- لبسي البيبي حفاضة أكبر فوق الحفاضة.
نصائح عشان ما يبقاش البامبرز باظظ
تغيير الحفاضة قبل النوم مباشرة
طبعًا دي مفروغ منها وواضحة وضوح الشمس أهه. قبل ما البيبي ينام على طول وفي آخر روتين النوم بتاعه، بنغير له الحفاضة عشان تكون ناشفة وعليه تاخد وقت أطول عشان تتملي.
استعملي الحفاضات الليلية
فيه ماركات حفاضات في مصر بتعمل حفاضات ليلية بنفس فكرة الفوط الصحية الليلية. قوة الامتصاص في الحفاضات الليلية بتكون أكبر. عشان كده، هيكون امتصاص الحفاضات دي أكبر.
غيري ماركة الحفاض اللي بتستخدميه
مش معنى إن الماركة اللي بتستخدميها غالية أو أغلى ماركة أو أشهر ماركة إنها هتنفع مع البيبي بتاعك. كتير بتكون المقاسات مختلفة بين الماركات ونوعية المادة بتاعة الحفاض بتختلف برضه. لو التسريب مستمر شهور كتير، غيري ماركة الحفاض.
لو ولد، نزلي القضيب لتحت
كتير من الأمهات (والآباء) ما بياخدوش بالهم من النقطة دي. لو ولد، وانتو بتغيروا الحفاض، وجّهي راس القضيب لتحت عشان لو هو لفوق هيغرق الحفاض ويسرب من الحفاض في اتجاه البطن.
طلعي الحفاض لفوق شوية
من ناحية البطن، خلّي الحفاض يغطي أكبر قدر ممكن. بالشكل ده، مع الحركة والتقلب، الحفاض لما يتحرك هيرجع لورا فهيكون “متوسطن”.
غيري الحفاض وقت رضعة نص الليل
لو لسه ما فطمتيش البيبي، كده كده هيصحى ويصحيكي عشان يرضع. ده وقت مثالي لتغيير الحفاضة عشان تتفادي إنها تتملي جدًا وتسرب لحد الصبح.
نيّمي البيبي على ضهره
زي ما قلنا قبل كده، نوم الطفل على بطنه من الأسباب اللي بتخلي احتمالية التسريب أعلى. عشان كده، النوم على الضهر أفضل كتير من ناحية تجنب تسريب الحفاض.
قللي مشروبات في وقت الليل
طبعًا ما بنقولش تعطشي البيبي بس عمومًا مشروبات وقت الليل هتخلي الطفل يتبول كتير، خاصة لو عصاير أو مشروبات محلاة بالسكر.
استخدمي مرتبة التطرية فوق المرتبة العادية
ده في حالة فشل كل التجارب السابقة. فيه مراتب صغيرة ومش في سمك المراتب الكبيرة اسمها مراتب التطرية. الميزة في المراتب دي إنها هتاخد كل البلل وتسيب المرتبة الأساسية في سريرك نضيفة. كمان ميزة في المراتب دي هي إنها قابلة للغسل وإعادة الاستخدام.
لبسي البيبي حفاضة أكبر فوق الحفاضة
ده حل تاني في حالة فشل كل الحلول السابقة. فوق الحفاضة العادية اللي ابنك بيلبسها كده كده، لبسيه حفاضة تانية مقاسها أكبر درجة. بكده، حتى لو الحفاضة الأولى سربت، هتلاقي إن الحفاضة التانية امتصت البلل.
نتمنى لك صباحات مافيهاش تسريب.
التعليق باستخدام حساب فيس بوك