عيد الفطر 2021 خلاص في خلال أيام.. هيوحشنا رمضان ولمته وبركته، لكن كمان هنستقبل العيد بفرحته وبسكوته وكحكه. وجنب البسكويت والكحك، دايمًا بيكون فيه طبق ترمس وشوية قراقيش ومنين. وعشان تقدري تعملي المنين في البيت وتملي البيت بريحة الخبيز حتى لو مش هتقدري تخبزي البسكويت والكحك. الطريقة بسيطة والمكونات على قد الإيد جدًا. جبت لك طريقة عمل المنين على طريقة الشيف نجلاء الشرشابي لإني لقيت إنها أسهل وأضمن طريقة.
مكونات المنين
- 3 كوبايات دقيق
- معلقة كبيرة خميرة فورية
- ربع كوباية سمنة
- نص كباية زيت
- ميا للعجن
- رشة ملح
- 3 معالق كبيرة سكر
الكمية دي قابلة للزيادة على حسب احتياجك. أهم حاجة هي النسبة، يعني قيسي كل المكونات بالنسبة لبعضها لو هتزودي الكمية.
طريقة عمل المنين
- في العجان، هتحطي الأول المكونات الناشفة لوحدها يعني: الدقيق (الـ3 كوبايات)، وعليه السكر (3 معالق كبار) والخميرة ورشة الملح.
- خلي العجان يخلط المكونات دي مع بعض قبل ما تضيفي المكونات الأخرى.
- ضيفي الزيت مع الاستمرار في العجن
- ضيفي السمن
- حطي ميا قليلة جديدة وراقبي العجين قدامك عشان تحددي لو محتاج ميا أو لا، مع مراعاة إن العجينة ما تكونش سايلة، تكون ماسكة نفسها.
- طلعي العجين من العجان وغطيها وسيبيها لمدة ساعة عشان تخمر
- بعد ما تخمر، لفيها بإيدك في شكل اسطوانة وبططيها من فوق
- قطعيها قطع متساوية
- افرشيها في الصينية المدهونة زيت
- ادهني وشها بزيت قليل جدًا عشان يديها لون حلو وقرمشة.
- سيبيها ترتاح تاني على الأقل ربع ساعة
- دخليها فرن على درجة 180.
وبالهنا والشفا وكل سنة وانتي وأسرتك طيبين ومعيدين بخير.
المصدر
CBC Sofra
What’s your Reaction?
التعليق باستخدام حساب فيس بوك