محتويات المقال
الحلويات اللي بتتعمل على البارد بدون خبز، وكمان بتتاكل باردة من أجمل وأسهل أنواع الحلو اللي ممكن تستمتعي بيها وانتي بتاكليها وكمان وانتي بتحضريها وتحصلي على أجمل حلويات باردة. ولإنها ما بتحتاجش فرن ولا خبز، ممكن كمان أطفالك يساعدوكي في تحضيرها، وتقضوا سوا أحلى الأوقات في المطبخ. والأنواع دي من الحلويات بتكون مناسبة جدًا تتحضر من قبل بيوم وتتساب في التلاجة وتكون جاهزة للتقديم في اليوم التالي. فبتكون منقذة ليكي لو في يوم عندك عزومة وحابة تقدمي صنف حلو صيفي بارد ولذيذ، ما تشيليش هم تحضيره وتكوني متفرغة يوم العزومة للأصناف الرئيسية اللي هتقدميها وبس، ووقت الحلو هتطلعيها من التلاجة وتقدميها لضيوفك بمنتهى البساطة.
الأصناف دي من الحلويات بتتميز بسهولة تحضيرها عشان كده تقدري تعمليها في أي وقت، مش بس في فترة الصيف. النهارده هنقدم لك 3 وصفات حلويات باردة محبوبة جدًا لـ حلويات باردة منعشة ولذيذة، جربيهم ويهمنا رأيك.
حلويات باردة سهلة وسريعة بدون فرن
- التيراميسو
- أكواب البانوفي
- ترايفل المانجو
-
التيراميسو
المصدر cleobuttera
المقادير
- 1 مغلف من يسكوت السافوايار (حوالي 30 يسكوتة)
- 250 مل كريمة خفق
- 1 معلقة صغيرة فانيليا سائلة
- 1/2 كوب سكر بودرة منخول
- 250 جم جبنة ماسكاربون في حرارة الغرفة (البديل هو جبن كريمي)
- 3 معالق صغيرة من القهوة سريعة التحضير مذوبة في 2 كوب ماء مغلي
- بشر برتقانة
- كاكاو خام للتزيين
طريقة عمل التيراميسو
- في بولة كبيرة، اخلطي الجبن الماسكربون مع الفانيليا السائله وبشر البرتقان، واخفقيها بالمضرب الكهربائي لحد ما تبقى هشة القوام.
- بالمضرب الكهربائي، اخفقي الكريمة سائلة مع السكر البودرة، لحد ما توصلي لقوام متماسك.
- باستخدام معلقة خشب أو سيليكون، اخلطي بخفة مزيج الكريمة المخفوقة مع الجبنة الماسكاربون.
- في وعاء زجاجي، حضري التيراميسو: غمسي بسكوت السافوايار في القهوة المركزة تغميسة خفيفة، ورصيها في الطبق.
- ضيفي فوق طبقة البسكوت طبقة من الكريمة اللي حضرتيها وافرديها كويس، كرري الطبقات لحد ما تنتهي بطبقة من الكريمة.
- زيني السطح بالكاكاو الخام باستخدام مصفاة، رشيه عشان تغطي كامل سطح التيراميسو.
- يفضل تسيبيه في التلاجة ليلة كاملة قبل التقديم.
الصيف ما يحلاش من غير الآيس كريم، اتعرفي هنا على طريقة عمل الآيس كريم من غير ماكينة.
ترايفل المانجو
المصدر nibbleanddine
المقادير
- كيك فانيليا جاهز
- 5 حبات كبيرة مانجو مقطعة مكعبات
- 250 مل كريمة خفق
- 1 علبة قشطة
- 1/2 كوب سكر بودرة
- بشر ليمون
- عصير أناناس جاهز
طريقة عمل ترايفل المانجو
- في بولة كبيرة باستخدام المضرب الكهربائي، اخفقي الكريمة مع السكر البودرة لحد ما توصلي لقوام متماسك.
- ضيفي القشطة للكريمة باستخدام معلقة سيليكون وقلبيها بخفة، عشان تحافظي على الهوا اللي دخل في الكريمة أثناء الخفق.
- في وعاء زجاجي كبير، أو في أكواب فردية، قومي بتكوين طبقات الترايفل: رصي طبقة من الكيك واسقيها بعصير الأناناس وبعدها طبقة من الكريمة وبعدها طبقة من مكعبات المانجو.
- كرري الطبقات لحد ما تنتهي الكمية، وزيني الوش بمكعبات المانجو.
- بردي الترايفل في التلاجة لمدة ما تقلش عن ساعتين، ويفضل تستني ليلة كاملة قبل التقديم، بيفرق كتير في الطعم النهائي للترايفل.
-
أكواب البانوفي
المصدر stayathomemum
المقادير
- 5 حبات موز كبيرة مقطعة وعليها عصرة ليمون
- 250 مل كريمة خفق
- 1 عبوة لبن مكثف محلى 400 جم
- شوكولاتة غامقة للتزيين
- بسكوت قمح مطحون
طريقة عمل أكواب البانوفي
- لعمل صلصة التوفي، حطي علبة الحليب المكثف في حلة واغمريها بالمياه بحيث تغطيها كلها وارفعي الحلة على النار وغطيها وسيبيها على نار متوسطة لمدة ساعة على الأقل، لحد ما يتحول اللبن المكثف لتوفي، خلي بالك لو نقصت المياه وما بقتش مغطيه العبوة، لازم تزوديها كل شوية.
- سيبي عبوة اللبن المكثف تبرد تمامًا قبل ما تفتحيها.
- بالمضرب الكهربائي، اخفقي الكريمة مع الفانيليا لحد ما توصلي لقوام متماسك.
- جهزي الأكواب: رصي طبقة من البسكوت المطحون، فوقها طبقة من الموز المقطع، فوقها طبقة من التوفي وأخيرًا الكريمة المخفوقة.
- زيني الأكواب بالشوكولاتة المبشورة، وبرديها في التلاجة لمدة 3 ساعات على الأقل ويفضل ليلة كاملة.
يا ترى هتجربي حلويات باردة قولي لنا في التعليقات حبيتي أي نوع أكتر.
التعليق باستخدام حساب فيس بوك