محتويات المقال
وزارة الصحة والسكان ومنظمة الصحة العالمية أعلنوا عن اكتشاف أول حالة إيجابية حاملة لفيروس كورونا المستجد جوا مصر لشخص “أجنبي”، وكمان تم إجراء التحاليل المعملية للحالة المشتبه فيها وكانت نتيجتها إيجابية للفيروس، بس من غير ما تظهر عليه أى أعراض مرضية. الوزارة وضحت إنها اتخذت إجراءات وقائية مشددة ناحية المخالطين للحالة من خلال إجراء التحاليل اللازمة واللي كانت سلبية للفيروس. والمخالطين للحالة اتعزلوا ذاتيًا في أماكن إقامتهم كإجراء احترازي لمدة 14 يوم (فترة حضانة المرض) وهتتم متابعتهم دوريًا كل 8 ساعات وتم تعقيم المبنى اللي ظهرت فيه الحالة والمخالطين ليها. علشان كده هنكلمكم في الموضوع ده عن كيفية حماية الأطفال من الكورونا وأهم أعراض الكورونا اللي لو ظهرت لازم فوراُ تروحي للدكتور.
إيه هي أعراض فيروس الكورونا؟
أكتر أعراض فيروس الكورونا شيوعًا:
- الحمى
- السعال
- ضيق التنفس
- صعوبة التنفس
وفي الحالات الشديدة:
- الإلتهاب الرئوي
- المتلازمة التنفسية الحادة
- الفشل الكلوي
وبعد اكتشاف أول حالة لفيروس كورونا المستجد لشخص أجنبي في مصر، وبما إن معظمنا أمهات بنشتغل وولادنا بينزلوا حضانات ومدارس وتمارين، لازم ناخد احتياطاتنا بشكل أكبر الفترة اللي جاية لحماية نفسنا و حماية الأطفال من الكورونا وأي أمراض فيروسية تانية ومن ضمن الاحتياطات دي:
النظافة الشخصية
لازم تكوني حريصة إنك تغسلي إيدك وإيد ولادك بالصابون والمياه أو بمعقم الإيدين الكحولي بشكل كويس أوي وتعلمي ولادك إنهم يغسلوا إيديهم كل شوية وخصوصًا بعد ما يرجعوا من بره وقبل الأكل وممكن تحطي في شنطتهم معقم الإيدين الكحولي وتعلميهم إزاي يستخدموه بطريقة صحيحة.
الكحة والعطس
لازم تغطية الأنف والفم وقت الكحة والعطس بمنديل أو بثنية مرفق الدراع، وعلمي أولادك دايمًا إنهم يغطوا الأنف والفم وقت الكحة أو العطس.
الحيوانات والطيور
اتجنبي التعامل مع حيوانات المزرعة من غير ما تكوني بتستخدمي وسائل الوقاية الشخصية، مهم جدًا إنك تحرصي على طبخ المنتجات الحيوانية والطيور والبيض بشكل كويس أوي لأن الحرارة ليها قدرة كبيرة على قتل الفيروسات وعشان تحمي نفسك وعيلتك من أي مرض ممكن يتنقل من الحيوانات للإنسان.
التجمعات والأماكن المزدحمة
بشكل عام وخصوصًا في التجمعات والأماكن المزدحمة، اتجنبي المخالطة مع الأشخاص اللي بيظهر عليهم أعراض نزلات البرد والأنفلونزا وممكن تستخدمي في الأماكن المزدحمة الماسك لتغطية الوش كنوع من أنواع الحماية.
والفيديو ده هيوضح لك أكتر عن إجراءات الوقاية:
وفي النهاية أهم حاجة تعمليها لو ظهر عليكي أو على أولادك أعراض مرضية شديدة أو أي أعراض شبيهة بفيروس كورونا خصوصًا على الأطفال الصغيرة، استشيري الدكتور الخاص بيكي أو دكتور الأطفال وبنتمنى لكم دوام الصحة والسلامة.
التعليق باستخدام حساب فيس بوك