معظمنا سمع امبارح عن موضوع مصمم الأزياء المعروف اللي بيقوم بالتحرش الالكتروني وطلب صور خاصة لناس بيشتغلوا معاه من خلال الإنترنت، وطبعا أول حاجة جت في بالنا كأمهات إزاي نحمي ولادنا اللي قاعدين ليل نهار على الإنترنت من التعرض لحاجة زي ده.
عشان كدة فـ مقال النهاردة هقولك على أهم خمس حاجات يساعدونا في حماية ولادنا من التحرش الإلكتروني.
كيفية حماية المراهق من التحرش الجنسي الإلكتروني
1. علاقة الثقة والأمان بيننا وبين ولادنا
الأصعب من إن الطفل يتعرض لتجربة التحرش الإلكتروني هو إنه يخاف يطلب المساعدة، يخاف يجري علينا ويقولنا “الحقوني أنا مش عارف أتصرف”، عشان كدة علاقة الأمان والثقة بينا وبين ولادنا كل ما يكبروا هي أول خطوة نحميهم بيها، خليك موجود وداعم وبتسمع ابنك في كل حالاته عشان يتأكد إنه ممكن يلجأ لك مهما حصل.
2. نشرح للمراهق معنى وأشكال التحرش
في التربية الجنسية من أول يوم دايمًا بنصح الأمهات يعلّموا أطفالهم يحموا نفسهم وأجسامهم من غير ما نجيب سيرة التحرش أو نخوفهم، لكن مع المراهق من الأساسيات إننا نشرح له معني وأشكال التحرش المختلفة عشان يقدر يحمي نفسه، المراهق محتاج يعرف إن زي ما في تحرش جسدي باللمس ففيه كمان تحرش لفظي بالكلام وتحرش إلكتروني عن طريق التصوير أو عرض صور او طلب صور مخلة أو الكلام في أمور خاصة لا تصح بين الأغراب.
3. نشجع ولادنا يمشوا ورا إحساسهم
الطفل اللي متعود في بيته إن اهله بيحترموا مشاعره وبيحترموا رغبته لما بيبين رفضه أو عدم ارتياحه في التعامل مع شخص معين، أو حتى عدم رغبته في التواجد في أماكن معينة عشان “مش مرتاح” ومش بيحس بجريمة لما يقول “لا”، هو الطفل اللي بيقدر يرفض أي طلب مش مرتاح له من غير ما يحس بالذنب أو يستسلم للضغط حتى لو ماكنش لسة فاهم ده صح ولا غلط، مجرد إحساسه إن في حاجة مش مظبوطة وهو مش خايف يرفض ده من أهم الأساسيات لحمايته.
4. التربية الجنسية
التربية الجنسية دلوقتي مبقتش إختيار لكنها بقت أساس في تربيتنا لولادنا وفي تثقيف المراهق اللي يقدر يوصل لأي معلومة محتاجها بسهولة واللي ممكن كمان يوقع نفسه في مشاكل كتير لو ملاقاش إجابات وشرح كفاية عند أهله. محتاجين كلنا نجهز ونتعلم عن كل مرحلة وتغيير جنسي بيحصل للطفل عشان ندعمه بالمعلومات الصح قبل ما غيرنا يوصله ويحكون فريسة سهلة للتحرش الإلكتروني.
5. نسبق بخطوة
مش لازم نستني إن ولادنا يتعرضوا لموقف يقلقنا عشان نتكلم، نسبق إحنا بخطوة ونفتح معاهم المواضيع اللي محتاجين نعلمهالهم زي إننا ممكن نستغل حادثة التحرش الإلكتروني اللي منتشرة دلوقتي علي السوشيال ميديا واللي أكيد أي مراهق عنده اكونت علي السوشيال ميديا هيعرفها! نكلمهم في خطورة الإنترنت والأفلام الإباحية.
نسألهم “إيه رأيك في اللي قريته ده؟ تعرف حد اتعرضله؟ طيب إنت عارف ممكن نتصرف إزاي في موقف زي ده؟ طيب إنت عارف ده عقوبته إيه وممكن الضحية يبلغ مين؟” وأسأله هتجيب أسألة وفرصة تقدروا توصلوا لهم رسالة إني في ضهرك ومعاك وممكن تطلب مساعدتي أي وقت أو تساعد غيرك كمان.
والأهم من ده كله إننا نفتكر دايما نجاوب علي كل سؤال يجي في بال ولادنا ومنقولش أبدا “عيب ماتتكلمش في الحاجات دي” لأن يمكن ثقتهم فينا والحوار اللي مفتوح دايما بينا وبينهم هو اللي ينقذهم لو لا قدر الله إتعرضوا لأي موقف صعب.
التعليق باستخدام حساب فيس بوك