محتويات المقال
مفيش ست أو أم مصرية إلا وعندها دايمًا حل وفكرة لكل عقدة بتواجها في المطبخ. عشان كده، دايمًا تلاقي الأمهات يشاركوا بعض حيل وأفكار للمطبخ إللي سهلت عليهم مهمة الطبخ، أو التنظيم والتنضيف، أو حلت مشكلة يومية بتواجههم، ودي طبعًا من أحلى وأجمل الصفات في الست والأم المصرية. وأكبر دليل على كده، لما أي أم على جروب راحة بالي بتسأل عن أي مشكلة واجهتها، هتلاقي مليون رد على سؤالها بالتفصيل الممل، وكل أم بتحكي تجربتها وطريقتها في التعامل مع المشكلة وإيه الفكرة أو الحيلة إللي جربتها ونفعت معاها.
وطبعًا عشان احنا بنحب جدًا مبدأ المشاركة، النهارده هنشارك معاكي مجموعة حيل وأفكار للمطبخ هتفيدك جدًا، وهتحلي بيها مشاكل بتقابلك بشكل يومي في مطبخك، ولو عندك أي أفكار وحيل جديدة للمطبخ، نتمنى منك تشاركينا في الكومنتات.
-
الرز لسه ني أعمل إيه؟
يمكن تسوية الرز تكون واحدة من أكتر المشاكل إللي بنواجها في المطبخ، والمشكلة دايمًا بتكون في تظبيط نسبة المياه للرز. طيب لو عملنا كل ده وفضل الرز على النار لسه ني وما وصلش لدرجة السوا المطلوبة نعمل إيه؟ بمنتهى البساطة، هتستخدمي ظهر معلقة خشبية وتعملي تجاويف في الرز وتبدأي تزودي كمية بسيطة من المياه وتغطي. بالطريقة دي، المياه هتتبخر جوه التجاويف دي، والبخار هيسوّي الرز بدون ما يعجن وهيظبط معاكي.
-
الأكل اتحرق في الحلة التيفال، أنضفها إزاي؟
المصدر: mollymaid
مناديل المطبخ من الحاجات الضروري جدًا وجودها عندك في المطبخ، وواحدة من الحيل المميزة هي استخدام مناديل المطبخ لتنضيف بقايا الأكل المحروق من الحلل والطاسات غير اللاصقة. ببساطة هتستني بعد الطاسة ما تبرد وتزيلي كل آثار الحروق باستخدام مناديل المطبخ إللي هتشيل كل الأثار من غير ما تجرح الطاسة، بعدها هتغسلي الطاسة بالمياه والصابون، ولو لسه فيه آثار تقدري تضيفي للطاسة شوية من الخل وبيكاربونات الصوديوم، وتسيبيهم لمدة 2-3 دقايق وبعدها تشطفي الطاسة تاني بالمياه الدافية والصابون.
-
الأكل طلع حادق جدًا، أعمل إيه؟؟
المصدر: thespruceeats
أغلبنا هيقول ضيفي قطعة بطاطس هتمتص الملح، لكن الحقيقة فيه أفكار وحيل تانية كتير لتخفيف الملح منها مثلًا:
- طريقة التخفيف، لو عندك مثلًا مرقة أو صلصة طماطم، أو أي نوع من الصوصات، تقدري تشيلي منها جزء، وتضيفي لها مياه أو مرقة بدون ملح بحيث تخففيها وتقللي من نسبة الملح فيها.
- إضافة القليل من السكر هيعادل الملوحة وممكن ينقذ الأكلة من الضياع، بس طبعًا ضيفي السكر باعتدال ودوقي الطعم.
- لو تبلتي لحمة أو فراخ وحسيتي التتبيلة حادقة جدًا، تقدري بكل بساطة تشطفيها تحت الحنفية، وتعيدي تتبيلها بدون إضافة ملح.
- منتجات الألبان زي الكريمة والزبادي واللبن من الحلول الرائعة وبتمتص الملح بشكل كبير، بس طبعًا هتصلح فقط مع الأكلات البيضا، زي البشاميلات والوايت صوص، وممكن تنفع مع الرز الأبيض لو كان مالح ضيفي له القليل من اللبن، هيمتص الملح.
- إضافة الحمضيات زي عصير الليمون أو الخل كمان لها القدرة على امتصاص الملح بشكل كبير من الأكل.
-
اللحمة دايما بتشد، أتبلها بإيه؟؟
المصدر: thehouseofyum
الحل في ثمرة الكيوي العظيمة، لو عندك قطعية لحمة كبيرة في السن أو ناشفة، ضيفي لها في التتبيلة قطعة بسيطة من الكيوي، حوالي نص ثمرة لكيلو اللحمة، هتساعد الإنزيمات الموجودة في الكيوي بشكل كبير على تطرية نسيج اللحمة. خدي بالك، ما تسيبيش اللحمة المتبلة مع الكيوي فترة طويلة لإن تأثيره قوي جدًا وممكن اللحمة تتهري وقوامها يبقى غير محبب.
ادخلي على اللينك ده عشان تتعرفي على دليل شامل لتتبيلات اللحوم، الفراخ، والأسماك.
-
الرز البسمتي بيعجن مني، هل في حل؟؟
المصدر: recipetineats
من أفضل الطرق لطبخ الرز البسمتي هي السلق، اسلقي الرز البسمتي زي المكرونة بالظبط في حلة واسعة فيها كمية كبيرة من المياه المغلية مع رشة وفيرة من الملح، بعدها صفي الرز في مصفاة تحت مياه جارية.
وعشان ترجعي تنكهي الرز، هتسخنيه في طاسة واسعة فيها زيت نباتي أو زبدة وتضيفي له بهاراتك المفضلة، وتقلبيه بخفة لحد ما يسخن ويمتص كل المادة الدهنية والبهارات. هتاكلي أحلى رز بسمتي مفلفل جدًا وعمره ما هيعجن منك تاني.
ادخلي على اللينك ده عشان تتعرفي على 5 وصفات للرز غريبة وشهية.
-
قشرة الفراخ البانيه دايما بتفك مني
المصدر: rachaelrayshow
أي حاجة بنعمل لها تغطية بالبيض والبقسماط، السبب الرئيسي إللي بيخلي قشرتها تفصل عنها هي الرطوبة الزيادة، عشان كده أهم حاجة تصفي الفراخ كويس جدا من أي تتبيلة، باستخدام مناديل المطبخ قبل ما تعملي عملية التغطية. كمان مهم جدًا إنك تصفي الفراخ كويس قوي من البيض قبل التغطية بالبقسماط.
والخطوة الضرورية جدًا، وهتفرق في النتيجة فرق رهيب، هي إنك تدخلي الفراخ البانيه بعدها التلاجة بدون أي تغطية لمدة نص ساعة مش أكتر، الخطوة دي هتساعد على التخلص من أي رطوبة باقية في الفراخ وهتمنع انفصال القشرة، وده ينطبق على أي حاجة هتتعمل بانية مش بس الفراخ.
ادخلي على اللينك ده عشان تتعرفي على وصفات متنوعة لصدور الدجاج.
-
ازاي أحافظ على الموز مدة أطول من غير ما يستوي؟؟
المصدر: brooklynfarmgirl
حيلة بسيطة جدًا بس فعاله جدًا، غلفي مكان التقاء أصابع الموز مع بعض باستخدام بالبلاستيك الشفاف، وده هيعزل الهواء والرطوبة عن الوصول للموز، وبالتالي الموز هيفضل عندك لمدة أطول بدون ما يستوي بسرعة ويبوظ.
-
ازاي أحفظ الخضروات مدة أطول في التلاجة؟
المصدر: brooklynfarmgirl
من أفضل الحيل والطرق المجربة لحفظ أغلب أنواع الخضار وخصوصًا الورقيات زي الخس والجرجير وغيرها، هي حفظها في أكياس محكمة الغلق، بعد غسيلها وتجففيها كويس جدًا من أي رطوبة ودي خطوة مهمة جدًا. كمان مهم جدًا إنك تسحبي الهواء من أكياس الخضراوات بقدر الإمكان، بكده هتعيش معاكي فترة طويلة في التلاجة وهتفضل طازة وقت ما تحتاجيها.
-
ازاي أقشر الطماطم للصلصة؟
المصدر: atyabtabkha
قشر الطماطم غير إنه صعب الهضم ومتعب للمعدة، هو كمان بيدي قوام غير محبب لصوص الطماطم، عشان كده تقشير الطماطم من المهام اليومية المهمة جدًا لصوص طماطم مظبوط. دي خطوات بسيطة لطريقة تقشير الطماطم:
- باستخدام سكينة صغيرة، تخلصي من عنق الطماطم، وبعدها اعملي علامة X في الطرف التاني من حبة الطماطم عشان يساعدك في التخلص من القشرة بسهولة.
- في حلة فيها مياه مغلية، نزلي حبات الطماطم وسيبيها في المياه لمدة دقيقة واحدة، أو لحد ما تبدأ قشرة الطماطم تلين وتنفصل عنها من عند العلامة إللي عملتيها بالسكينة.
- صفي الطماطم وحوطيها في بولة فيها مياه ساقعة جدًا أو مياه بتلج، وقشري الطماطم بكل سهولة من جهة علامة x.
-
ازاي أوصل مكونات الكيك بسرعة لحرارة الغرفة؟
المصدر: yellowblissroad
أغلب وصفات الكيك بتتطلب إنك تستخدمي المكونات في حرارة الغرفة خصوصًا البيض والزبدة، والحقيقة احنا مش دايمًا بيكون عندنا رفاهية الوقت عشان نستنى لما المكونات توصل لحرارة الغرفة. بالنسبة للبيض، هتملي بولة بمياه سخنة بس مش مغلية وهتسيبي فيها البيض لمدة 10 دقايق فقط هتلاقيه اتخلص من برودة التلاجة بمنتهى السهولة ووصل لحرارة الغرفة. أما الزبدة أسهل طريقة عشان تلين بسرعة، هي إنك تبشريها بمبشرة حادة، ده هيزود المسطح المعرض للهوا وهيساعج إنها تلين بسرعة جدًا.
-
ازاي أقطع اللحوم والفراخ شرايح رفيعة جدًا؟
المصدر: food-hacks
ساعات كتير بنكون عاوزين نعمل شاورما، أو بيف ستروجانوف أو حتى كبدة إسكندراني، وأكلات تانية كتير بتحتاج نقطع اللحوم شرايح رفيعة جدًا، وده بيكون صعب شوية تحقيقه. عشان كده، أسهل فكرة وحيلة ممكن تعمليها هي إنك تجمدي اللحوم أو الفراخ دي شوية، يعني تكون نصف مجمدة، بحيث تقدري تعدي فيها السكينة وتقطعيها، وقتها هتقدري تتحكمي فيها أكتر وتقطعيها بالحجم والشكل المناسب لأكلتك بكل سهولة.
ادخلي على اللينك ده عشان تعرفي أكتر عن أفكار لترتيب وتنظيم المطبخ.
التعليق باستخدام حساب فيس بوك