وجود الأب في حياة ولاده شيء أساسي، وبالذات لو متواجد ومركز في حياتهم وتفاصيلهم ومشارك معاهم في اهتماماتهم، بس في الزمن ده، ومع طبيعة وظروف الشغل دلوقتي، بقى الأب طول اليوم تقريبًا بره البيت وسايب مسؤولية كل حاجة تخص ولاده للأم. عشان كده، في المقال ده، هنقول لك كام فكرة تقدري تشركي جوزك بيهم في حياة ولادكم حتى لو مشغول.
جوزك علي ما تعوديه
بصراحة يعني هي ده القاعدة الأساسية الحقيقية الأولى في الموضوع ده، من أول ما تكونوا أب وأم لازم يكون في اتفاقات واضحة وصربحة بإن ده مسؤولية مشتركة بينكم في كل حاجة. وبالذات إن أمهات كتير كمان بقت تشتغل في الزمن ده مش زي زمان. من أول يوم، أكتر حاجة هتريحكم هي الاتفاق حسب ظروفكم وحسب حياتكم بطريقة تريحكوا انتم الاتنين ويكون فيها مسؤولية مشتركة بينكم.
خدي وقت لنفسك وسيبيه يتصرف
من الحاجات اللي بتعود الأب إن الأم دايمًا قادرة تتصرف أكتر منه، وهي اللي عارفة أكتر فيما يخص ولادهم، هي إن الأم دايمًا سابقة بخطوة وحاسة من جواها إنها هتعمل الحاجة أحسن وأظبط، فواحدة واحدة الأب بينسحب ودوره بيقل تدريجي. عشان كده، نصيحتي ليكي اللي هتفيدك وتفيد عيلتك هي إنك تاخدي وقت خاص لنفسك والوقت ده تسلمي المسؤولية كاملة للأب من غير إنقاذ ولا مساعدة، وقتك المقدس للراحة وسيبيه يتصرف.
التمارين:
رتبي مواعيد التمارين بحيث إن يبقى فيه يوم واحد على الأقل مترتب حسب أجازة الأب أو وقته الفاضي. بحيث إنه يتعود غن التمرينة ده بتاعته، وإنها مسؤوليته، ويتعود يشارك الطفل في ممارسته للرياضة.
معسكر الأب والابن
ده من الأفكار اللي أنا شخصيًا ناوية أجرّبها ومتحمسة لها جدًا. دلوقتي بقى فيه أفكار معسكرات كتير للأم والطفل أو للأب والطفل، فممكن تحجزي فيها وتقدميها لجوزك كمفاجأة أو هدية، وده من الحاجات اللي أنا متأكدة إنها هتكون مفيدة جدًا لتقوية العلاقة بين الأب والطفل لإنهم بيقضوا وقت حقيقي لوحدهم فيه بعيدًا عن أي مسؤوليات أو تحديات.
عودي ولادك إن باباهم الأساس
مهم إن الأطفال نفسهم يبقوا حاسين بقيمة وجود باباهم وسطهم، ومشاركته ليهم، وإنهم اللي يفتقدوه ويطلبوا منه يكون موجود، عوّديهم ياخدوا رأيه، يستأذنوه، يستنوه في الحاجات المميزة تعملوها سوا، احتياجهم لباباهم وزنّهم عليه هيحسسه قد إيه مشاركته ومسؤوليته النفسية مهمة بالنسبة لولاده.
لو عندك أفكار تانية شاركينا في التعليقات ممكن نعمل إيه عشان الأبهات تشارك دايمًا معانا في حياة ولادنا.
التعليق باستخدام حساب فيس بوك