من تحديات الحياة: الغسيل بشكل صحيح، العادي إننا بنعتمد على تصنيف ألوان الملابس ونقسمها مجموعات علشان نتجنب كارثة بهتان ألوان الملابس على بعضها. كام واحدة فينا جات تفتح الغسالة بتاعتها ولاقت قدامها الكارثة الكونية زي تيشيرت أحمر وسط غسيل أبيض، فالدنيا كلها بقت بمبي بمبي بمبي، لا والأكثر ألمًا إن ده مش بيحصل غير في هدوم جوزك الغالية وهدوم الأولاد، اللي هو حقيقي الكون واقف ضدك. وفعلاً مشكلة وكلنا بنسأل نفسنا هل في حلول لـ علاج بهتان ألوان الملابس ؟!
اعرفي هنا 12 حيلة مطبخية مهمة لكل ست بيت
أنا فاكرة في أول الجواز حصل معايا كده، قعدت أعيط قدام الغسالة زي اللي جاية تتوب قدامها، كانت صدمة رهيبة، بس خلاص دلوقتي كبرنا وعرفنا نتصرف ازاي، عمومًا عملية بهتان ألوان الملابس بتنقسم لقسمين:
- قبل الكارثة: ودي اللي هنعرف ازاي تحديدًا نتجنب وقوع المشكلة دي.
- الفاس وقعت في الراس: وهنا بيصحى مرمم الأثار الصغير القابع في روح كل واحدة مننا ونبدأ نعالج ما أفسده الزمن.
فخلينا نشوف هننتصر ازاي:
ما قبل الكارثة (بهتان ألوان الملابس)
- لازم جدًا تعرفي إن التقسيم اللوني للملابس كأساس في الغسيل مش كفاية. ده لإن الخامات نفسها مش كلها ينفع تتغسل مع بعض، يعني القطن مش زي الصوف مش زي الشيفون مثلًا.
- مهم جدًا بجد تشوفي تعليمات الغسيل اللي بتكون مكتوبة على ملصق الملابس نفسه، لأن انتي كل ما كنتي بتتبعيه انتي فعلًا بتحافظي على عمر الملابس أكتر.
- استخدمي المسحوق المناسب، يعني أسطورة إن مسحوق واحد مناسب للألوان والأبيض والغوامق دي أسطورة كاذبة كل حاجة لها اللي يناسبها.
- شوفي إعلان المسحوق كويس، ممكن تستغربي بس الحقيقي إن إعلانات مساحيق الغسيل بتقول بشكل غير صريح إن المسحوق الفلاني بيدي أفضل نتيجة له مع أنهي مجموعة ألوان سواء أبيض أو ملون أو غامق.
- لبس البيت مش بيتغسل مع لبس الخروج، ولا ملايات السرير والفوط بتتغسل مع الشرابات.
- يفضّل تستخدمي مسحوق سائل مع ملابس الخروج. ده لإن تكوينته خفيفة على الأنسجة ومش بتسبب ترسب للمسحوق داخل الأنسجة واللي بدورها بتبوظ الهدوم.
- ما تنخدعيش أبدًا إن فيه قطعة ملابس غامقة انتي عارفة إنها مش بتنزّل لون في الغسيل إنها أمان تتغسل مع دور فاتح، لأن ده هيكون اليوم اللي هتقرر تنزّل فيه لونها على الدنيا كلها.
- استخدمي المناديل الماصّة للألوان، ده اختراع لطيف جدًا نزل الأسواق بيستخدم لتجنب الكارثة دي، بتحطي منه في الغسالة ليها قدرة ممتازة على سحب اللون الزايد اللي بينزل في الغسيل، وتحافظ على إن كل لون يفضل في مكانه، فيه منها في مصر وأشهرهم Catcher وShutter sheet.
دلوقتي خلصنا مرحلة قبل الكارثة، فخلينا ندخل على مرحلة الفاس وقعت في الراس ونشوف ربنا هيسترها علينا ازاي.
الفاس وقعت في الرأس ( ألوان الملابس بهتت على بعض)
- بهتان ألوان الملابس لو في الشيفون والحرير: مش كل حاجة هيبهت عليها لون هتقدري تعالجيها. فيه خامات رقيقة جدًا زي الشيفون والحرير ممكن تتضر جدًا لو عالجيتها في البيت. من الأفضل تروحي دراي كلين كبير ومتخصص لحل المشكلة دي.
- بهتان ألوان الملابس لو في ملابس بيضاء: استخدمي الكلور لو الإصابة كانت في ملابس بيضاء. شوفي لو ينفع يستخدم معاها الكلور، وده بيكون مكتوب على الملصق بتاعها.
- علاج بهتان ألوان الملابس لو حصلت في ملابس ملونة: تقدري تستخدمي منتجات تبييض خالية من الكلور واتبعي التعليمات اللي مكتوبة بالضبط حتى الوقت اللي بيقولوا عليه، لأنك لو زودتي عليه الألوان هتروح.
- بهتان الملابس لو في الملابس القطنية: اغسليها بمسحوق غسيل سائل، أوقات الخامات القطنية لما تكرري غسيلها اللون اللي بهت عليها بيروح.
- استخدمي البيكينج صودا والخل: ادعكيهم بشكل خفيف وسيبيه منقوع بالكامل لمدة نص ساعة وبعد كده اغسليه عادي.
- استخدمي الأسيتون: أيوة مزيل طلاء الأظافر لو عندك منه عبوة في البيت. استخدميه على المنطقة المصابة وسيبيه نص ساعة واغسليها بشكل معتاد وكرريها على حسب الاحتياج.
هو ده اللي نقدر عليه، والله البهتان راح والهدوم رجعت، يبقى الحمد الله. لو الدنيا باظت خالص، يا هنصبغها، يا هنلبسها بهتانة ونقول موضة، يا هنحيلها للمعاش ونخليه لبس بيت، معروفة يعني.
المصادر
www.lifehack-solution.com
www.wikihow.com
www.catcheregypt.com
التعليق باستخدام حساب فيس بوك