محتويات المقال
كلنا بندوّر على حيل لاخفاء علامات تقدم السن، عشان نظهر أصغر، خاصة لو كانت الحيل دي متعلقة بروتين العناية بالبشرة سواءً كان بالمكياج أو ببعض العادات اللي نتبعها عشان نخفي علامات تقدم سن البشرة. علامات تقدم السن بتبان في أوقات كتير جدًا بسبب الإرهاق والتعب وسوء التغذية مش بسبب السن ونقص الكولاجين بس. وصدقيني رحلتك في البحث عن أفضل كريم لمحاربة علامات تقدم السن مش هتساعدك كتير، لإن الموضوع أبعد وأعمق من كده، لذلك جمعت أكتر وأهم 10 حيل هتساعدك تباني أصغير من سنك بأكتر من 10 سنين.
اقرأي أيضا: أهم وسائل تحفيز الكولاجين في البشرة
حافظي على الترطيب
أكتر حاجة مهمة هي أكتر حاجة بننساها، وهي الترطيب للبشرة، سواءً هنحط ميكب، أو هننام، أو راجعين من بره، أو حتى صاحيين من النوم وبنحط ميكب عشان نازلين، اللي ما تعرفيهوش إن بشرتك بتفقد النضارة مع التقدم في السن، وصحيح كريمات الأساس فعالة في إنها توحد لون البشرة وتخليها أصغر لكن الأهم هو الترطيب العميق للوش.
الكولاجين مش عيب
في فكرة غلط بتقول إن كريمات الكولاجين مخصوصة للستات اللي في الأربعينات، لكن في الواقع أحب أقول لك إن الكريمات اللي بتحتوي على الكولاجين ضروري من بعد سن الـ 25 خاصة مع رحلات الحمل والولادة، فلو حاسة إن بشرتك مرهقة وتعبانة يبقى أنسب حل ليكي كريم كولاجين محترم والنتيجة بتبدأ تظهر بعد 15 يوم.
ده وقت الكونسيلر
لو كنتي من النوع اللي مش بيحب يحط ميكب، ومقضيها طبيعي في طبيعي، لكن حاسة إن الهالات تحت عينك أصبحت أكتر من اللازم أحب أقول لك إن وقت الكونسيلر جه، وما بقاش اختياري خاصة لو عندك خروجة مهمة أو مناسبة حابة تظهري فيها أصغر، الكونسيلر، بالعربي يعني خافي العيوب، وتحديدًا اللي تحت العين، سواءً كانت علامات زرقا، أو سودا، اختاري نوع الكونسيلر المناسب لبشرتك ونوعها، ودرجة لونها عشان تاخدي أحسن نتيجة مع فونديشن لطيف يحمي بشرتك ويغطيها، النتيجة هتخليكي مبسوطة.
واقي الشمس أهم من الأكل
الكلمتين دول هتحسي بقيمتهم مع تقدمك في العمر، الشمس مش بس بتغمق لون البشرة لكن كمان بتنشفها وتسحب المياه منها، لو بتاخدي بالك من صحتك وبتنامي بدري وبتاكلي كويس ومع ذلك عندك هالات، فده غالبًا بسبب الشمس لإن الجلد حوالين العين وتحتها من أكتر المناطق اللي فيها الجلد رقيق وبيتأثر بسرعة جدًا بالشمس، لذلك أهم نصيحة إن واقي الشمس يكون جزء من الروتين اليومي خاصة في المنطقة حوالين العين.
قصي شعرك وفتحيه
الشعر الطويل المسحوب لتحت جميل ومناسب في الأعمار الصغيرة، لكن مع التقدم في العمر، هيكون مناسب ليكي لو قصيتي شعرك قصة متوسطة، مش قصيرة لأن دي القصة الرسمية لكبار السن ومش طويل جدًا لإنه برضه علامة على عدم العناية بالشعر.
أما بالنسبة للون، فأنسب لون يخليكي أصغر هو اللون اللي أفتح من درجة شعرك بدرجتين تلاتة، الشعر الفاتح بيقلل من برو فروة الشعر اللي عادة بتكون باينة أكتر مع التقدم في العمر، أكيد فاتت عليكي قريبة أو صاحبة وشوفتيها مقصرة شعرها ومفتحاه، قد إيه كان فارق في شكلها اللون والشكل.
غيري رسمة حواجبك
الحواجب التخينة بتدي إيحاء إن صاحبها أصغر من الحواجب الرفيعة، مع ذلك كل وش وله رسمة تليق عليه أكتر. ما تتكسفيش تجربي وتغيري من الشكل لحد لما تستقري على أكتر شكل مناسب ولايق على وشك والأهم مخليكي أصغر وأجمل.
فيتاميناتك أولًا
الفيتامينات مهمة جدًا، والأهم تكوني محتاجة ليها فعلًا، لو الدكتور واصف ليكي فيتامينات ومعادن تاخديها زي الحديد والكالسيوم وانتي بتنسي، فغالبًا مش بس صحتك اللي هتتأثر لكن كمان شكلك، راجعي دكتورك واعملي التحاليل اللازمة واعرفي ناقصك إيه وإيه نوع الفيتامينات اللي ينصحك بيها.
وصيتك فيتامين سي
من العناصر اللي مش بنديها أهمية كبيرة هو فيتامين سي رغم أهميته الكبيرة في حماية السيدات تحديدًا من إنهم يشيخوا، وخصوصًا البشرة، لذلك هتلاقي سيروم فيتامين سي بمبالغ وهمية رغم إنك مثلًا ممكن تاخديه بشكل طبيعي في كل الفواكه والخضروات اللي فيها فيتامين سي زي البرتقال والليمون والفراولة والفلفل الأخضر والألوان.
اقرأي أيضا: أهمية فيتامين سي لصحة شعرك وبشرتك
السلمون والطبق الأخضر
أكل صحي يعني صحة أفضل، اعتمدي نظام قليل السكريات والدهون والنشويات وعالي في البروتين والخضار والفاكهة، بننصحك بإن السلمون يكون جزء ثابت من نظام أكلك ولو بشكل أسبوعي، وكمان بننصحك باعتماد الخضروات إللي أوراقها خضراء في نظام أكلك وكتري من الفاكهة خصوصًا المانجو والكنتالوب والجزر والبطاطا والزبيب والمشمش.
اشربي مياه كتير
أهم وأخطر نقطة في حياة ستات كتير. شرب المياه هو الضمان الوحيد لجسم مرتاح وبشرة واخدة كفايتها من الترطيب الداخلي، لكن كمان شرب المياه هو بوابتك الحقيقية عشان تتجنبي مخاطر صحية كتير جدًا كفيلة تفضي على شبابك زي مشاكل الكلى والأملاح وغيرها من المتاعب اللي ممكن تتلاشيها بشرب كمية كافية من المياه.
المصدر:
GOOD HOUSE KEEPING
التعليق باستخدام حساب فيس بوك