طبعًا مع الحظر ومع قفل كل الأماكن بما فيها السبا spa، بقى صعب أو يمكن مستحيل إننا نستمتع بحمام مغربي جميل يظبط المود ويجدد نضارة البشرة. في المقال ده، هنقول لك إزاي تجيبي السبا لحد بيتك، وتستعدي للعيد ببساطة من غير تكاليف ولا قلق من الاختلاط. هنشرح لك دلوقتي خطوات الحمام المغربي من خبيرة التجميل أمل إدريس بطريقة بسيطة وسهلة.
اللي هتحتاجيه
- مياه سخنة (تملي بها البانيو أو تستحمي بيها).
- حمام كريم مناسب لنوع شعرك.
- بونيه لتغطية الشعر.
- صابون مغربي (من العطار).
- حنة عادية أو طمي مغربي.
- ليمون.
- لوفة مغربية.
- حجر خفاف.
بالفيديو: طريقة إزالة شعر الوجه بالفتلة بنفسك بسهولة
خطوات عمل الحمام المغربي في البيت
- املي البانيو مياه سخنة بس اتأكدي إن كل منافذ الهواء (الباب والشبابيك) مقفولة كويس عشان الحمام يتملي بالبخار، وده هيساعد إن البشرة تتخلص من الشوائب العالقة بها، ومن الحبوب الصغيرة والكبيرة كمان.
- ادخلي البانيو المليان مياه سخنة (لحد قدرة تحملك – يفضل المياه السخنة لكن مش لازم تتلسعي منها) لمدة 10 دقايق وفى حالة عدم وجود بانيو، ممكن تكتفي بغسل الجسم بالمياه السخنة.
- بعدها، اعملي حمام كريم مناسب لشعرك، وغطيه بغطاه (بونيه) عشان البخار ما يوصلش لفروة الراس.
- اقعدي على كرسى، واخلطي الصابون المغربى مع معلقة واحدة من الحنة (العادية مش الحمرا) أو الطمى المغربى، مع عصير ليمون، وحطي الخليط على الجسم والوش مع التركيز على المناطق الدهنية فى البشرة.
- سيبي الخليط لمدة 10 دقائق على الجسم، أما الوش، اشطفيه فورًا عشان العينين ما تتأذيش.
- نضفي الجسم كويس بالمياه السخنة، بعدين افركيه باللوفة المغربية، من تحت لفوق في اتجاه القلب لتنشيط الدورة الدموية، ونبدأ بالوش وبعدين الرقبة والصدر والبطن وبعدين الإيدين والرجلين، نفس الكلام بالنسبة للظهر، مع التركيز على المناطق الخشنة فى الجسم زي الكوعين والركبتين، وهتلاحظي ساعتها الخلايا الميتة بتقع على شكل شرائط بلون رمادى.
- اخلطي غسول الوش بمياه الورد وعصير الليمون وحطيه على الجسم كله والوش.
- نفرك الرجلين بالحجر الخفاف، عشان هتكون رطبة فده هيسهل إنك تشيلي الخلايا الميتة.
- نضفي واشطفي الجسم من الغسول، واشطفي الشعر من حمام الكريم.
- مرري قطنة مبلولة بمياه الورد على الجسم للحصول على مزيد من الانتعاش وقفل مسام الجلد.
- ندهن الجسم بزيوت عطرية عشان الجسم يكون متعطر لأطول فترة ممكنة.
التعليق باستخدام حساب فيس بوك