كلنا عارفين برامج رامز جلال والمحتوى اللي بيتقدم فيها كل سنة في رمضان، وكتير مننا بيشوف برنانج رامز جلال وبيحبه. بس يا ترى المحتوى ده مناسب إن الأطفال يتفرجوا عليه عادي ويشوفوا الكبار وهم بيضحكوا على حاجة زي كده؟ ناس بتتعذب أو بتتبهدل بأي طريقة تحت إطار “احنا بنهزر” أو “ده مقلب” وهيعدي وهنبوس ونحضن بعض ونتصالح لما نخلص؟! تعالوا اقول لكم من وجهة نظر الباحثين في التربية وعلم نفس الاطفال ليه ما ينفعش الاطفال تتفرج على برنامج رامز جلال:
ربنا خلق البني آدم بجزء أمامي في المخ اسمه “المرايا العصبية”، الجزء ده بيصور كل حاجة الأطفال بيشوفوها وبيقلدها بالمللي، لما ولادنا يتفرجوا على برامج زي برنامج رامز جلال ويتزرع جوه عقولهم إن من حقي إني أعذب الناس عشان “بهزر” معاهم، وإن من حقي عادي أخوّف حد وارعبه واذله عشان أنا بهزر وده حاجة بتضحك ومقبولة وممكن أقلدها بسهولة.
- البرنامج بيصدّر إن فكرة التريقة والتنمر على الناس ده حاجة لذيذة ودمها خفيف، واللي بيعمل كده بيضحّك الناس ويبسطهم.
- محتوى فيه تهديد وتخويف بيعلّي الأدرينالين في الجسم وبيزود عند الأطفال الإحساس بالتوتر وبيخليهم عصبيين وهايبر أكتر.
- محتوى ممكن يخليهم يحسوا إن العالم ده مكان مش آمن، فيتهدد إحساسهم بالأمان ويخليهم يتخيلوا إنهم ممكن يتعرضوا لموقف زي ده أي وقت من حد غريب أو قريب من باب الهزار أو غيره.
- برنامج رامز جلال لما يشوفوا فيه مشهد كله عياط واستعطاف ويشوفونا بنضحك ورامز جلال مكمل في اللي بيعمله، ده بيقلل عند الأطفال الإحساس بالتعاطف والشعور بالغير. ويبقى عادي إني أشوف حد بيستنجد ويطلب المساعدة وأقف أتفرج.
- الدراسات بتقول إن الأطفال اللي بتتفرج على مشاهد فيها أي نوع من أنواع العنف أو الضرب بيوصل لهم إن ده تصرف طبيعي وعادي بين البشر، فبيكون سهل إنهم يبقوا ضحايا وفريسة سهلة لأي عنف أو تنمر.
التأثير النفسي لبرنامج زي ده مخيف وسيء جدًا على الأطفال والمراهقين. فيه قاعدة أساسية في الهزار أنا باعلّمها علطول لابني وهي: “الهزار معناه يبقى أنا واللي قدامي بنضحك ومبسوطين.. مش حد مبسوط والتاني متضايق أو متأذي من هزاري”. أي حاجة غير كده تبقى أذى، استظراف، تنمر، أي مسمي لكن مش هزار وغير مقبولة.
فيه أبحاث اتعملت سنة 1963 بتقول إن الطفل مش بس بيقلد مشاهد العنف اللي بيشوفها في التلفزيون، لا ده كمان خياله بيبتكر ويخترع طرق أعنف يلعب عن طريقها. بلاش نعرض ولادنا لمحتوى عنيف وبرامج مقالب مؤذية وبعدين نستغرب ونزعل لو لاقيناهم بيأذوا تفسهم أو غيرهم بسببها. بلاش نستهون ونتخيل إنهم مش هيركزوا واحنا بنتفرج، عشان دي حاجة تأثيرها النفسي ممكن يفضل معاهم طول العمر.
التعليق باستخدام حساب فيس بوك