خط الحمل واحدة من أكتر الأعراض اللي ساعات بتضايق بعض السيدات خلال فترة الحمل، بطن الحامل مش بس بتترهل وبتتشد وبتكون عرضة لعلامات التمدد، لكن كمان ظهور خطر أسود طولي في البطن بيكون عامل مشترك بين كل الحوامل، الفرق إن فيه ناس بتربط بين اختلاف شكله وبين نوع الجنين، يعني يقول لك شكل خط البطن أثناء الحمل بولد مختلف، وفي أي شهر يظهر خط الحمل ممكن تكون علامة تانية، لكن يا ترى الكلام ده صح ولا غلط وليه الخط الإسود ده بيظهر قررنا نجاوب عن الأسئلة وأسباب ظهور خط الحمل بالتفصيل في المقال ده.
شوفي كمان أشهر 10 مشاكل شائعة خلال فترة الحمل
إيه هو الخط الإسود؟
الخط الأسود في الحمل عبارة عن تصبغات جلدية بتمتد بطول البطن، في المنتصف بالظبط وليه مواصفات شبه ثابتة عند كل الحوامل زي:
- عرض الخط بين 0.63-1.27 سم
- بيمتد من السرة لحد عظمة العانة وممكن يمتد من أعلى نقطة في البطن لحد العانة.
أسباب ظهور الخط الأسود:
خلال الحمل عضلات البطن بتبدأ تنفصل بشكل طولي وتدريجي عشان حجم البطن يتماشى مع المتغيرات الجديدة ووجود الجنين اللي بينمو يوم بعد التاني. الخط ده بقى بيظهر في المنطقة التي بتنفصل طوليًا بين عضلات قسمي البطن، لونها بيكون بني، بيبدأ أفتح من فوق وبيبتدي يكون أغمق كل لما اتجهنا لتحت.
طيب ليه العضلات في المنطقة دي تحديدًا بتسيب الخط ده، مش في أي مكان تاني في جسم الحامل؟ السبب ما زال مجهول وكلها تخمينات، زي مثلًا إنها تغييرات هرمونية بتحاكي تأثير الميلانين (الصبغة) في الجلد، وده برضو اللي بيخلي مناطق تانية تغمق زي الرقبة، طيب ما هو مش كل الحوامل بيجي لهم كلف الحمل، بس كلهم بيحصل عندهم الخط ده، إيه السر؟ لسه، محدش متأكد.
امتى بيظهر خط الحمل؟
مفيش معاد محدد للخط ده، كل بطن وكل حمل بيكون مختلف عن التاني، يعني مثلًا ممكن يظهر خلال الثلث الأول من الحمل، وممكن يظهر على الشهر الخامس من الحمل، أو حتى بعد كده، لكن الأكيد إنه بيظهر فجأة وبدون سابق إنذار، زي ما بيختفي فجأة بعد الولادة، ورجوع البطن لطبيعتها شوية شوية خلال الشهور الأولى بعد الولادة.
علاج الخط الأسود في الحمل
لو الخط ده مضايقك قوي، دي بعض الوصفات بتساعدك إنه يخف كتير:
- تجنب تعريض البطن للشمس قدر الإمكان
- تناول مصادر غذائية غنية بحمض الفوليك
- دهن عصير الليمون موضعيًا على امتداد الخط الأسود وبانتظام
وعموما بنفكرك إنها حاجة مشتركة بين كل الحوامل وبتروح مع الوقت.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك