محتويات المقال
تأخر الدورة الشهرية بيكون له أسباب كتير زي لخبطة الهرمونات، اضطراب الغدة الدرقية، والسبب الأهم هو الحمل.. بعد تأخر الدورة الشهرية وعشان تتأكدي إنه فيه حمل أو لأ، ممكن تلجأي لـ 3 أنواع من أنواع تحليل الحمل: تحليل الدم اللي بيبين الحمل وده بتكون نتيجته سواء بإيجابي أو سلبي، النوع التاني تحليل الحمل الرقمي، والنوع التالت هو اختبار تحليل الحمل المنزلي وده هنعرفك عنه أكتر في المقال ده.
ازاي تستخدمي اختبار تحليل الحمل المنزلي؟
عادًة بيكون مدون على عبوة الاختبار طريقة الاستخدام الصحيحة وفيه منه أنواع كتير وبيكون مع الاختبار قطارة بلاستيكية بتستخدميها في وضع قطرات البول على الاختبار وفيه أنواع تانية بتكون شبيهة بالعصا البلاستيك بتغمريها في البول.
هنا ممكن تشوفي هل ممكن اختبار الحمل في الدم يخطيء؟
امتى تعملي/تستخدمي جهاز اختبار الحمل المنزلي؟
لما الدورة الشهرية بتتأخر عندك، يُفضّل إنك تعمليه بعد تأخر الدورة بيومين أو أكتر عشان النتيجة تبقى دقيقة، والوقت المناسب لعمل اختبار الحمل في اليوم هو وقت الصبح بعد الصحيان من النوم مباشرةً.
لو بتخططي لحمل اعرفي موعد التبويض بتاعك من هنا
قراءة نتيجة اختبار الحمل المنزلي
- خط واحد في تحليل الحمل المنزلي: إذا ظهر خط واحد فقط، معنى كده إن النتيجة سلبي، بس في بعض الأحيان النتيجة السلبية بتكون خاطئة وبيكون فيه حمل فعلًا بسبب إن الاختبار ممكن يكون بايظ أو بسبب عدم استخدام الاختبار في وقت الصبح.
- خطين اتنين في اختبار الحمل المنزلي: إذا ظهر خطين واضحين معنى كده إن نتيجة الاختبار إيجابي.
- خط خفيف في اختبار الحمل: لو ظهر خط خفيف، فده ممكن يكون له كذا سبب، إما إن الاختبار نتيجته إيجابي بس الحمل لسه في أوله، أو إن الاختبار منتهي الصلاحية ومش شغال، أو إن هرمون الحمل عالي في البول لسبب مرضي أو بسبب بعض الأدوية اللي بتعلّي الهرمون لكن من غير حمل.
اختبار الحمل المنزلي .. هل بتحصل معاه نسبة خطأ؟
بعد ما تعملي اختبار الحمل المنزلي، ويطلع إيجابي، لازم تعملي فحص الدم وتستشيري دكتور النسا الخاص بيكي عن أحسن موعد عشان تعملي اختبار الدم. وبنحب نوضح لك ونفكرك إن اختبار الحمل المنزلي مش أدق وسيلة عشان تعرفي إذا كان في حمل بالفعل ولا لأ وبننصحك تستشيري دكتور النسا عن الفحوصات اللازمة ليكي.
التعليق باستخدام حساب فيس بوك