انتشر على الفيسبوك بوست لطليقة خالد عليش بتحكي فيه أدق تفاصيل الخلافات المادية بينهم، ومدى تقصيره مع بنته رغم إن الراتب بتاعه كبير وعنده مصادر دخل تانية زي الإعلانات، وبتحكي إنها في ظروف صعبة خاصةً مع مرض والدتها.
الستات عمومًا بينشروا تفاصيل زي دي يا إما بسبب التشهير أو بسبب القهر الفظيع اللي بيمروا بيه، لكن الوضع بيتعقد أكتر لما تكون الست دي زوجة أو طليقة واحد من المشاهير، لأن البوستات دي بتنتشر انتشار رهيب على الفيسبوك، والناس بيتقسموا فريقين: فريق متعاطف جدا مع رواية الست وفريق تاني -ودول بيكونوا من المعجبين بالشخصية المشهورة- بيكذبوها ويشككوا في روايتها كلها وممكن يتهموها بحاجات زيادة من عندهم وهما أصلا لا يعرفوها ولا يعرفوا طليقها.
وزي ما في ست هي اللي بتبدأ تنشر الأسرار، في ست بيتنشرلها أسرارها عالسوشال ميديا بردو، زي ما حصل من يومين مع ياسمين عبد العزيز لما أخوها نشر بوست يحكي فيه عن حياتها الخاصة وعن علاقتها بأحمد العوضي اللي رد عليه بكلام يكشف بيه عن تفاصيل أكتر من حياة ياسمين وعلاقتها بأخوها وبنته.
واضح إن مسلسل نشر أسرار المشاهير على السوشال ميديا مش هيقف، بس اللي بيخسر فيه دايمًا الست وولادها وعمر ما النهاية بتكون سعيدة.
التعليق باستخدام حساب فيس بوك