أغلبنا بيمتلك قطع ثمينة من الفضة والنحاس في البيت، سواء كانت تحف أو نجف أو إكسسوار أو أدوات مائدة، ومع الوقت والاستعمال بيبدأ لمعانها يبهت، ولونها يتغير أو “يطوّس”، والحقيقة إن التغير ده بيفقد الفضة والنحاس قيمتهم، صحيح إن محلات الفضيات والتحف بيقدروا إنهم يلمعوهم تاني، بس إحنا النهارده هنسهل ونوفر عليكي ونقول لك على خلطات وتركيبات، سهلة وبسيطة من مكونات موجودة في بيتك، تقدري بيها على تلميع الفضيات والنحاسيات زي المحترفين:
-
وصفات تلميع الفضيات
الوصفة الأولى: الكاتشاب
أيوا زي ما قرأتي كده، ودي شوفت الأجانب بيستخدموها كتير، كاختراع منزلي مبهر في تنضيف الفضيات، وتقدري تستخدميه مباشرة على القطعة اللي انتي عاوزه تنضفيها، ولو بعد التنضيف بفوطة نضيفة وجافة برضه ما وصلتيش للنتيجة اللي نفسك فيها، تقدري تنقعي الفضة في الكاتشاب لمدة ربع ساعة، وترجعي تنضفيها بفوطة نضيفة وناشفة.
الوصفة التانية: الليمون والبيكنج باودر
ودي الخلطة السحرية لتنضيف حاجات كتير في البيت، مش بس الفضة والنحاس، وطريقتها إنك تنقعي القطع اللي عاةوه تنضفيها في عصير ليمون وبيكنج باودر طول الليل، والصبح تحطي ملح خشن على نص ليمونة وتفركي بيها الفضة أو النحاس، لحد ما توصلي للنتيجة المُرضية ليكي.
الوصفة التالتة: معجون الأسنان
بمنتهى السهولة حطي كمية من معجون الأسنان مناسبة لحجم القطعة اللي انتي عاوزه تنضفيها، وافركيها كويس بفوطة نضيفة وناشفة، هتلاقيها رجعت تلمع على طول.
-
نصايح عامة لتنضيف الفضيات والنحاسيات
- زي أي حاجة في البيت، تنضيفك لها أول بأول هيسهل عليكي جدًا.
- استخدمي فرشة أسنان قديمة في تنضيف الفضيات، وخصوصًا في القطع اللي فيها شغل وتعاريج وأماكن الفوطة مش هتوصل لها.
- جربي التركيبة على جزة مخفي من القطعة الأول، ولو لقيتي أي تغيير غير مرغوب بيحصل لها وقفي عملية التنضيف بالتركيبة دي.
- حاولي تلتزمي بالمواد اللي بتخلطيها مع بعض علشان ما تأثرش على جهازك التنفسي ولا على قطعة الفضة.
- ما تبالغيش في نقع الفضيات في تركيبات التنضيف، علشان ما تضريش القطعة.
- تقدري تطلبي مشورة مختص قبل ما تنضفي، وخصوصًا لو القطعة عليها ضمان أو توكيل.
بالفيديو: طرق تنظيف وتلميع الفضة في المنزل
التعليق باستخدام حساب فيس بوك