محتويات المقال
أغلبنا دخل التلاتينات أو في الطريق إليها، صحيح دي من أجمل فترات حياة أي حد فينا، لكن في الحقيقة دي الفترة اللي جسمك بيقولها بشكل صريح إن أي إهمال منك فيه خلال الفترة دي هتخلي الفترات اللي بعدها مؤلمة.
ومن الحاجات اللي بتعلنها صراحة إنها محتاجة رعاية وإهتمام يومي هي بشرتك، جمال ورونق فترة العشرينات، أو حتى الفترة اللي بتكون قبل الحمل والولادة والرضاعة وإجهاد التربية والرعاية، البشرة بتكون شيء مختلف تماما، والسر اللي دايما خبراء التجميل بيتكلموا عنه لصحة البشرة وحتى صحة الجسم كله هي الترطيب.
النهاردة هنتكلم بشكل خاص عن ترطيب البشرة، وعلى الرغم إن الأسواق مليانة بشكل متخم أنواع عديدة لمنتاجات الترطيب واللي فيها منها الفعالة فعلا وفيه منها اللي أي كلام. الحقيقة أنا من أنصار التعامل مع المنتاجات الطبيعية، بحس على المستوى الشخصي إنها أمان أكتر، وسهل توفرها وأسعارها مناسبة، ده غير إن الاستمرار عليها بيحقق نتيجة حقيقة.
علشان كدة النهاردة هنكلم عن أهم خمس زيوت تستخدميها لبشرتك علشان مش بس تحقق لك الترطيب اللي محتاجة ليه وإنما كمان كجزء علاجي وحمايتها من حب الشباب وأثاره.
فوائد زيت جوز الهند
من أشهر الزيوت المستخدمة في عالم التجميل هو زيت جوز الهند،لأنه فوائده على البشرة حقيقة وبتظهر على طول، بس زيت جوز الهند له طريقة معينة في الاستخدام، خبراء التجميل بيقولوا إن أفضل وقت لاستخدام زيت جوز الهند هو قبل النوم/ يعني هو مش مستحضر يستخدم خلال اليوم بسبب إن فترة الليل هي الفترة اللي البشرة بتقوم بترميم التالف فيها، فلما تعززي العملية دي بزيت جوز الهند بتكون النتيجة أفضل بكتير.
علشان كدة أفضل طريقة لاستخدامه إنك تجيبي زيت جوز هند طبيعي وتقومي قبل النوم بتدليك بشرتك بشكل ناعم ودائري لحد ما تحسي إن بشرتك إمتصته، ولو حسيتي بوجود أي زيادة في كمية الزيت على بشرتك استخدمي منديل وامسحي الزيت الزيادة بشكل خفيف كأنك بتطبطبي على بشرتك، وبعد كدة اغسلي بشرتك الصبح بالشكل المعتاد.
وعلى الرغم إن زيت جوز الهند من الزيوت اللي بتناسب أغلب أنواع البشرة بس لو إنتي بشرتك دهنية أو معرضة لحب الشباب تبقى الطريقة الصح لاستخدامه هتكون عن طريق مساج لبشرتك قبل النوم لمدة 15 دقيقة فقط وبعد كدة اغسلي وجهك، والسبب في كدة إن طبقة الزيت على بشرتك الدهنية وإنتي نايمة ممكن توفر بيئة مناسبة لظهور الرؤوس السوداء والبيضاء، علشان كدة كل ما عرفتي طريقة الاستخدام الصحيحة كل ما قدرتي تحصلي على النتيجة اللي إنتي عايزاها، لأن أوقات طريقة الاستخدام الخطأ هي اللي هتخليكي تحسبي إن المنتج ده غير مناسب ليكي.
عايزة تعرفي أكتر عن فوائد جوز الهند شوفي المقال ده فوائد لبن جوز الهند للبشرة .. وخلطات مش هتصدقي نتيجتها
وده لا يمنع إن إحنا ناكل جوز الهند ذات نفسه في الوصفة اللذيذة دي طريقة عمل مافن الكيتو بدقيق جوز الهند واللوز
فوائد زيت الزيتون
إزازة زيت الزيتون الحلوة المسالمة القابعة في ركن كل مطبخ من مطابخنا صديقة للبشرة على الفكرة، زيت الزيتون مش للأكل والسلطة بس، ده من أكتر الزيوت في العالم اللي ليها جميلة على كل جزء من جسمنا، مافيش جزء فينا إلا وزيت الزيتون يعرف يتصرف فيها.
بس إحنا النهاردة خلينا في بشرة، الحلو والمميز في زيت الزيتون إنه لما يكون أصلي بكر معصور على البارد إنه مقاوم عظيم للأكسدة، ومدمر للشوارد الحرة، سواء استخدميه بشكل موضعي على البشرة أو جزء أساسي من نظامك الغذائي، وده بسبب احتوائه بشكل أساسي على فيتامين أ، وفيتامين د، وفيتامين ك، وفيتامين هـ.
وتقدري تستخدمي زيت الزيتون بكذا طريق، منها:
- مزيل ممتاز للمكياج المقاوم للماء، من أتقل أنواع المكياج هو المكياج المقاوم للماء واللي حتى إزالته بتكون فعلا صعبة، علشان كدة زيت الزيتون هيساعدك على التخلص منه وكمان من غير ما يسبب أي جفاف لبشرتك زي المزيلات التانية.
- مقشر للبشرة، هاتي معلقتين كبار زيت زيتون مع معلقة سكر ناعم و قطرات من الليمون وحركيهم بشكل دائري على بشرتك وبعد كدة اشطفي بشرتك بمياة دافية، هتلاحظي فرق فوري.
- ماسك للبشة عن طريق تجيبي بيضة مع معلقة زيت زيتون مع معلقة عسل مع شوفان مطحون، حطي الماسك ده على بشرتك لمدة على الأقل 15 دقيقة
في العموم زيت الزيتون صديق للبشرة، بس لو إنتي من النوع اللي بشرتك حساسة يفضل ما تستخدميش زيت الزيتون بشكل موضعي علشان ميتسببش لتهيج لبشرتك، واحرصي دايما على مسح كمية الزيت الزيادة على بشرتك علشان لا يتسبب في سد المسام.
من المهم جدا تعرفي بجانب فوائد زيت الزيتون ليكي أضرار زيت الزيتون لبشرة طفلك علشان تعرفي إنه مش مناسب للجميع.
فوائد زيت شجرة الشاي
زيت شجرة الشاي من الزيوت الصديقة للبشرة الدهنية على وجه الخصوص، وده بسبب قدرته وفاعليته في معالجة ومقاومة حب الشباب بسبب خواص التطهير والترطيب في نفس الوقت.
بس في نفس الوقت زيت شجرة الشاي من الزيوت القوية اللي مينفعش أبدا يتم استخدمها بشكل مباشر على البشرة، يمعنى إنها محتاجة دايما تتخفف، وبتتسمى العملية دي بإسم الخلط مع زيت ناقل، وأفضل اختيار بيكون مع زيت جوز الهند، يعني كل نقطتين من زيت شجرة الشاي بيقابلها من 10 لـ 12 نقطة من الزيت الناقل.
علشان كدة ممنوع أبدا تستخدمي الزيت بصورته الخام على بشرتك علشان تتجنبي التهيج اللي ممكن يحصل واللي علاجه هيكون سخيف بالنسبة لك، دخ بجانب إحتمالية اصابتك بالجفاف بسببه، علشان كدة لما تقرري تستخدميه لازم يتخلط مع زيت تاني.
وعلشان تعرفي أكتر عن زيت شجرة الشاي شوفي المقال ده: فوائد زيت شجرة الشاي الرهيبة وتجيبيه منين.
فوائد زيت السمسم
زيت السمسم من الزيوت المفضلة بالنسبة لي على المستوى الشخصي لأنه مرطب حقيقي وفعال، مش بس على البشرة إنما كمان للشعر، وده بسبب إنه غني جدا بفيتامين هـ الصديق الصدوق للشعر والبشرة.
وعلشان كدة هو يعتبر من الخيارات الأولى في علاج الهالات السوداء ده غير فاوئد تاني متنوعة زيتحسين مرونة البشرة وصحتها ومظهرها،وده لأن زيت السمسم واحد من الزيوت الطبيعية الغنية بالزنك، ده غير قدرته على إبطاء تقدم علامات الشيخوخة في البشرة ومقاومة ظهور الشيخوخة المبكرة. بيقدر يوفر حماية للبشرة من تأثير الإشعاعات فوق البنفسجية الضارة اللي بتيجي بشكل أساسي من التعرض للشمس، ترطيب البشرة، وده لأن بنية زيت السمسم بتقدر على توفير طبقة حماية للبشرة لما تستخدميه على الجلد.
وتقدري تستخدميه بطريقة من الأتنين دول:
- دلكي بشرتك بيه بشكل عميق ولما تحسي إن بشرتك إكتسبت مرونة حطي بودرة رز مطحون وكرري التدليك للبشرة وبعد كدة اغسلي بمياة دافية هتلاقي وشك اكتسب اشراقة مميزة.
- والطريقة التانية هتكون للتخلص من السموم البشرة عن طريق مزج نص كوبية من زيت السمسم مع نص كوبياة من خل التفاح العضوي وربع كوبية مياة، اخلطيهم مع بعض في ازازة او بخاخة مخصوص واحتفظي بالمركب ده في التلاجة، وكل يوم قبل ما تنامي وبعد ما تغسلي وجهك كويس استخدمي المحلول ده عليه وسيبيه يمتص ويجف على بشرتك لوحده.
فوائد زيت الورد
زيت الورد من الزيوت القوية زيها زي زيت شجرة الشاي، بيحتاج إنك تخلطيه مع زيوت او مركبات تانية علشان تقدري تستفيدي منه وتجنب أي أضرار ممكن تحصل لبشرتك بسبب الاستخدام المباشر.
زيت الورد تقدر تستخدميه في الترطيب بإنك تعملي منه كريم ترطيب بنفسك مكوناته:
- نصف كوب من زبدة الشيا.
- ملعقتان صغيرتان من ماء الورد.
- ملعقة صغيرة من العسل.
- عشر نقاط من زيت الورد المركز
اخلطي المجموعة دي مع بعض على حمام مياة لحد ما تحصلي على قوام متجانس وبعد كدة احفظيه في عبوة مخصصة واستخدميه بشكل دوري هتلاقي إن فايدته وريحته جميلة جدا.
وزيت الورد بيستخدم في مقاومة علامات السن وكمان مقاومة حب الشباب، وعلاج أثار الشمس المضرة، بس قبل ما تستخدميه خليكي حريصة من التأكد إنك معندكيش حساسية منه.
اتمنى أكون ساعدتك على التعرف على الفوائد الزيوت دي وساعدتك تختاري نوع الزيت اللي يناسبك واللي تقدري معاه تحصلي على بشرة صحية طول الوقت.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك