معظمنا دلوقتي عارفين إن ولادنا بيرسموا صورتهم عن نفسهم وعن الناس وعن العالم حواليهم وبيبنوا عليها أفكارهم وتصرفاتهم بعد كده عن طريق أول وأكبر مؤثر في حياتهم، وهو البيت والطريقة اللي بيتكلم وبيتصرف بيها الأب والأم معاهم ومع بعض. عشان كده، دايمًا بننصح إن خناق أو اختلاف الأب والأم مع بعض على قد ما نقدر ما يكونش قدام ولادنا لإن ده بيوترهم وبيحسسهم بعدم الأمان وعدم الثقة فينا، وده من أكتر أسباب سوء سلوكهم بعد كده.
ده مش معناه إننا مفروض نرسم صورة الملايكة دايمًا قدام ولادنا وإننا عمرنا ما بنختلف. لإن ده مش واقعي ولا منطقي ولا حتى مفيد لصحتهم النفسية. آه طبعًا أوقات ممكن نختلف قصاد الولاد لكن مهم جدًا إننا نحافظ على الاختلاف باحترام، ويشوفونا إزاي بنقدر نحل مشاكلنا بصورة صحية ومحترمة، وبنحب بعض رغم الاختلاف. ولو حصل واحتدينا بالكلام قدامهم، ممكن نتكلم مع ولادنا ونفهمهم إنها حاجة مؤقتة ونوريهم بعدها إن علاقتنا كويسة وإننا بنحب بعض وقريبين من بعض.
لكن الموقف لما يتطور قصاد ولادنا لمد إيد وإهانة، فده خط أحمر، لازم نقف عنده وناخد موقف وننتبه للرسالة اللي وصلت لولادنا عن طريقه.
في المقال ده، هاقول لك إزاي تقدري تتصرفي لو حصل وولادك شافوا خناق بينك وبين باباهم، بالذات لو اتطورت لعنف أو ضرب وإهانة.
- أول حاجة: محتاجة إنك تعملي لهم إقرار لمشاعرهم: “آه يا حبيبي، لك حق تخاف” أو “آه فعلًا، أنا فاهمة انتي قد إيه حسيتي بالغضب من بابا”، ولو فضلوا يعيدوا ويزيدوا ويحكوا في نفس القصة، ما توقفيهمش واسمعيهم.
- اسأليهم عن رأيهم في اللي حصل وساعديهم يخرجوا أي مشاعر سلبية أو خوف أو قلق من اللي شافوه عشان ما يفضلوش كاتمين المشاعر الملخبطة اللي حسوا بيها وتدخل الـblack room في المخ وبعد كده بتطلع بشكل سلبي لما يكبروا.
- اشرحي لهم إن اللي حصل ده مش الطبيعي ومش الصح، وإن بابا غلط جدًا. هو ما قدرش يتحكم في غضبه، وده أوقات بيحصل من الكبار لما بيكونوا مش متدربين كفاية على السيطرة على غضبهم والتعبير بطريقة صح وده طبعًا مش مقبول نهائي. وما تحمّليش نفسك أي مسؤولية للي حصل، ما تقوليش مثلًا: “أصل أنا عصبت بابا أو عملت كذا” لإنهم لازم يعرفوا إن مفيش أي مبرر للضرب مهما حصل.
- أكدي إن باباهم وانتي بتحبوهم جدًا وإن حبكم لهم مالوش أي علاقة ولا عمره يتأثر بالمشكلة اللي حصلت بينكم وإنكم هتفضلوا معاهم.
- الأطفال أوقات في مشاكل الأب والأم بيتخيلوا بالخطأ إنهم السبب أو لهم يد في الموضوع، وبيحسوا بالذنب، وإحساس الذنب ده بيزيد لو جت سيرتهم وانتوا بتتخانقوا بأي شكل (زي مثلًا خناقة على المصاريف الخاصة بالولاد). فانتي أكدي لازم لازم إن بابا بيحبهم جدًا وإن ما لهمش علاقة بمشاكل الكبار وإن المشكلة بسبب إنكم انتم الكبار مش قادرين تتفاهموا بطريقة صح وهتحاولوا تحلّوا الموضوع بينكم.
في النهاية، رد الفعل اللي هتاخديه ناحية باباهم، لازم تفهميهم برضه إيه اللي هيحصل يعني لو هتقعدوا فترة بعيد عن بعض أو هيكون فيه انفصال وطلاق. فهميهم بطريقة بسيطة شكل الحياة وإن فيه علاقات في الحياة دايمة ما بتتغيرش زي الأب والأم والأخوات، لكن فيه علاقات بتتغير زي الأصحاب والأزواج. واحنا لما لقينا نفسنا مش هنقدر نعيش مع بعض باحترام، قررنا نعيش بعيد عن بعض.
التعليق باستخدام حساب فيس بوك