محتويات المقال
زي ما فيه رجالة بتخاف من الجماع أو العلاقة الزوجية بعد الولادة (لو عايزة تعرفي أكتر عن الأسباب وطريقة العلاج، اقري المقال ده)، فيه ستات عندها خوف من الجماع بعد الولادة وخصوصًا الولادة الطبيعية. وده بيكون لأكتر من سبب، هنكلمك عنهم بالتفصيل خلال المقال ده.
امتى تقدري ترجعي لممارسة العلاقة الحميمة بعد الولادة؟
مفيش إجابة واحدة تنفع لكل الحالات على السؤال ده. الموضوع بيختلف على حسب كل حالة، فلو انتي كانت ولادتك سهلة وما فيهاش تعقيدات (اعرفي عن شق العجان هنا)، ممكن تستني من 4 – 6 أسابيع عشان الرحم يرتاح. لكن الأهم من كده، إنك دايمًا تسمعي لجسمك. وخدي بالك دايمًا إن الخصوبة بترجع بعد الولادة بتقريبًا 3 أسابيع، وده معناه إنك لو مارستي العلاقة الحميمة من غير وسيلة منع حمل، ممكن يحصل حمل.
أسباب الخوف من العلاقة الزوجية بعد الولادة الطبيعية
- التشنج المهبلي الثانوي
- الخوف من الحمل مرة أخرى
- اكتئاب ما بعد الولادة
- الألم أثناء العلاقة الحميمة بعد الولادة
التشنج المهبلي الثانوي
عرفنا هنا عن التشنج المهبلي وازاي ممكن يؤثر على العلاقة الحميمة في بداية الجواز. لكن التشنج المهبلي الثانوي بيحصل لما بيكون حصل ولادة طبيعية ومع الألم وتجربة خروج الجنين من المهبل، الجسم بيحصل له صدمة بتخلي المهبل يتشنج ويقفل في مواجهة أي محاولة للعلاقة الحميمة.
الخوف من الحمل
حتى لو ما حصلش تعقيدات كتير في الولادة، وحتى لو الولادة كانت قيصرية، ممكن يحصل خوف من الجماع بسبب إنه السبب الرئيسي للحمل. بنسمع كتير عن ستات وهي بترضّع طبيعي، حملت تاني حمل غير مرغوب فيه. عشان كده، فيه ستات بالعكس، بتخاف جدًا من العلاقة الحميمة لإنها مش مستعدة لحمل تاني.
اكتئاب ما بعد الولادة
اكتئاب ما بعد الولادة هو حالة نفسية بتصيب بعض الستات ودي بتكون حالة اكتئاب بتتراوح في شدتها من ست للتانية. ومن أهم أعراضها هي رفض الحميمية والإحساس بالحزن وانعدام الرغبة الجنسية. اقري أكتر عن اكتئاب ما بعد الولادة وحلوله من هنا.
الألم أثناء العلاقة الحميمة بعد الولادة
سواء اتعرضتي لتجربة شق العجان أثناء الولادة الطبيعية، أو لا، أو حتى في بعض حالات الولادة القيصرية، حصلت مضاعفات، فيه مسببات للألم في منطقة الحوض والمهبل بتمنعك من الاستمتاع ومش بس كده، هي ممكن كمان تؤدي لعدم رغبتك في العلاقة الجنسية تمامًا.
علاج خوف المرأة من الإيلاج
- على مهلكم
- تواصلي مع جوزك
- استخدمي لوبريكانت
- مساج
خدوا وقتكم
ما تستعجلوش وما تسمحيش لضغط الزوج ورغبته في حدوث علاقة حميمة إنه يخليكي توافقي على حدوثها وانتي مش عايزة أو جاهزة.
تواصلي مع جوزك
لو متابعانا، يبقى أكيد انتي عارفة نصيحتي الأبدية في كل المقالات: التواصل بين الزوجين. كلمي جوزك وقولي له، شاركي معاه كل مخاوفك وحاولوا مع بعض تلاقوا حل.
استخدموا لوبريكانت
المزلق أو المزحلق أو جل/لوبريكانت هيساعد كتير في العلاقة الحميمة من غير وجع، لو كل سبب خوفك هو الألم أثناء الجماع.
مساچ
لو منطقة الحوض أو ضهرك من تحت بيوجعوكي، اطلبي من جوزك يعمل لك مساچ خفيف في المنطقة دي عشان العضلات تسترخي وتقدروا تمارسوا العلاقة الحميمة.
التعليق باستخدام حساب فيس بوك