محتويات المقال
من أكتر الحاجات الموجعة بعد الولادة الطبيعية خياطة المهبل. ودي حاجة مش دايمًا بتحصل في كل الحالات. لكن فيه حالات الطبيب بيشوف إن خياطة المهبل ضرورة. إيه هي خياطة المهبل وبتتم ازاي وشكل المهبل بعد الخياطة؟ وإيه علاقة خياطة المهبل بعد الولادة والجماع أو العلاقة الحميمة؟ هنعرف كل ده في المقال ده.
الآثار الجانبية لـ إبرة الظهر “الإبيديورال” بعد الولادة
خياطة المهبل بعد الولادة الطبيعية
في الولادة الطبيعية، أوقات بيكون المهبل ما اتسعش بشكل كافي، فبيضطر الدكتور لعمل إجراء اسمه شق العجان، وهو شق بيوصل من المهبل إلى الشرج عشان يوسع شوية لراس الطفل وجسمه إنه يمر من المهبل. بعد الولادة الطبيعية، الدكتور عشان يرجّع كل حاجة زي ما كانت، بيخيّط الخط اللي بين المهبل والشرج. بعدها، ودي اختيارية، ممكن يعمل خياطة تجميلية للمهبل لتضييقه.
ألم خياطة الفرج
لازم تكوني عارفة إن الألم بيكون مش قوي قوي ساعة الخياطة نفسها لإنك إما واخدة بنج نصفي أو الولادة نفسها آلامها مش مخلياكي حاسة قوي باللي بيحصل أو زي ما جداتنا كانوا بيقولوا “الجرح لسه سخن”. إنما بعد ما تأثير البنج يروح، لازم تتوقعي إن الألم هيكون أضعاف الولادة نفسها. ليه؟ احسبي وجع خياطة أي جرح في جسمك، واضربيه في 10، لإن الخياطة جوا أكتر منطقة حساسة في جسمك. حتى إن فيه أمهات بتقول إن الخياطة دي دمرت حياتهم الجنسية مع الزوج وده هياخدنا للنقطة الجاية.
خياطة المهبل بعد الولادة والجماع
زي ما كنت باقول لك، فيه ستات بتقول إن الخياطة دي بوظت عليها العلاقة الحميمة. ده لإن الخياطة بتكون في جدار المهبل نفسه وحتى لو هي خياطة تجميلية، بيفضل فيه مكان غرز بتدخل الإبرة وتخرج منها. وده مع الإيلاج أو دخول العضو الذكري للمهبل، بيعمل ألم لا يمكن تصوره.
شكل المهبل بعد الخياطة
من الشمال لليمين، دي الأماكن اللي بتتخيط في الولادة الطبيعية فيما يعرف بـhusband stitch أو غرزة الزوج. وزي ما قلت لك في أول المقال، الغرزة الزيادة دي مالهاش داعي. بمعنى: لو الطبيب اضطر يعمل شق العجان، هيضطر يخيط الجزء اللي قطعه وهو القناة اللي بين المهبل وفتحة الشرج، وده طبعًا له وجعه بس لا يقارن بوجع الخياطة اللي في المهبل نفسه. الخياطة اللي أقصدها وأقصد إنها اختيارية بتكون لإن الطبيب شايف إن المهبل وسع من دماغ الطفل وعشان ما يكونش واسع قوي على الزوج، بيقرر يخيط منه جزء. ده أولًا لا داعي له، ثانيًا هتكون نتيجته عكسية جدًا لإنك هتتضايقي من ممارسة الجنس مع زوجك، مش هتتبسطي وبالتالي الزوج كمان مش هيتبسط.
بدائل خياطة المهبل للتضييق
بدل ما الدكتور يقص جزء من نسيج حي وهيسبب لك مشكلة تفضل معاكي، ممكن يكون فيه بدايل طبيعية. فيه تمارين ممكن تمارسيها وطرق طبيعية لتضييق المهبل بعد الولادة. ولازم قبل كل ده تكوني فاهمة إن ربنا خلق لنا المهبل في شكل عضلة، والعضلات زي ما بيجي لها ضغط وبتوسع، بيجي لها وقت تنكمش وتضيق تاني. وبناءً عليه، انتي مش محتاجة خياطة جوا المهبل، لإنه هيرجع لحجمه الطبيعي بعد الولادة بفترة ياخد فيها الجسم راحته في التعافي.
نتمنى لك صحة جسدية وجنسية وعلاقة حميمة ممتعة وبدون ألم.
التعليق باستخدام حساب فيس بوك