تنظيف الأسنان بالخيط بنقصد بيه خيط تنظيف الأسنان المخصص لده واللي بنشتريه من الصيدلية، مش أي خيط من أي بكرة. خيط الأسنان هو نوع من الخيوط المصنوع من البلاستيك أو مادة التافلون وبيكون متغطي بطبقة من الشمع وأحيانًا له نكهات مختلفة، وفيه منه مقاسات عريض ورفيع، وكل ده متوفر في الصيدليات. تنضيف الأسنان بخيط الأسنان بيعتبر 40% من عملية تنضيف الأسنان. ده لأن الفرشة لوحدها مش هتقدر تغطي جانب الأسنان الخمسة، لإنك لو اكتفيتي بس بالفرشاة، هيكون فيه جانبين من الأسنان تم إهمال تنضيفهم.
خيط الأسنان مش للكبار بس إنما هو كمان ممكن استخدامه للأطفال، وأطباء الأسنان بيقولوا: لو غسلتي أسنانك على الأقل مرتين، فإنتي هتحتاجي تستخدم غرغرة مرتين كمان، وخيط الأسنان مرة واحدة في اليوم. حقيقي مافيش وقت مثالي لاستخدام خيط الأسنان خلال اليوم، لكن يعتبر استخدامه مرة قبل النوم وقت مناسب لتجنب إنه يكون فيه أي بواقي للأكل تتحلل في الفم خلال فترة النوم. لو إنتي بتعاني من صعوبة في استخدام أو توفير خيط الأسنان، فيه منتج تاني متوفر في الأسواق اللي هو عبارة عن خلة أسنان بس من البلاستيك وفي آخرها خيط قصير مثبت فيها ده ممكن يكون أسهل في الاستخدام. وفيه طبعًا النوع القديم اللي هو من الخشب، ده أقلهم فاعلية، وأكثرهم خطورة، حاولي تتجنبيه على قد ما تقدري.
هنا ممكن تشوفي الضغط على الأسنان أثناء النوم
فوائد خيط تنظيف الأسنان
- بيحافظ على بياض الأسنان
- الوقاية من التسوس
- الوقاية من أمراض اللثة
- بتخلصك من رائحة الفم الكريهة
بيحافظ على بياض الأسنان
خيط الأسنان بيساعد في التخلص من طبقة البلاك والوقاية من إنها تتراكم وبالتالي الأسنان تصفر. وطبقة البلاك فرشاة الأسنان مش هتقدر تشيلها من بين الأسنان. من هنا بتيجي أهمية استخدام خيط الأسنان كخطوة وقاية من تراكمه.
لو عايزه تبيضي أسنانك، تبييض الأسنان طبيعيًا في المنزل.. 5 طرق نتيجتها في دقايق!
الوقاية من التسوس
زي ما قلنا في النقطة السابقة إن عدم استخدام خيط الأسنان بيساعد على تراكم البلاك على طبقة المينا للأسنان وبالتالي إمكانية حدوث تسوس في الأسنان. علشان كده، استخدام خيط الأسنان مرة في اليوم وقاية مهمة من تسوس الأسنان.
الوقاية من أمراض اللثة
استخدام خيط الأسنان مرة واحدة كل يوم، مع التنضيف بفرشاة الأسنان مرتين في اليوم بيساعد فعلًا في حماية اللثة من الالتهابات. لأنك بتتخلصي من أي بواقي للأكل تكون محشورة في أسنانك. ودي خطوة في غاية الأهمية علشان تحافظي على اللثة بتاعتك في حالة صحية سليمة وقوية.
بتخلصك من ريحة كريهة في الفم
زي ما قلنا إن لما بيكون فيه بواقي أكل في الفم ما بين الأسنان، ومع إهمال استخدام الخيط والتنضيف. ده بيساعد على نمو البكتيريا في تجويف الفم وبالتالي الإصابة بريحة فم سيئة جدًا. علشان كده، استخدام خيط الفم بيحميكي من المشكلة دي.
رائحة الفم .. إزاي تحافظي على ريحة نفسك حلوة
الطريقة الصحيحة لاستخدام خيط تنظيف الأسنان
- اقطعي حوالي 38 سم من خيط الأسنان، ولفي طرفه حوالين صباعك الأوسط. وبعد كده، امسكي الطرف السايب بصباع السبابة والإبهام، وبسبابة وإبهام الإيد التانية شديه علشان تقدري تنضفي سنانك العلوية.
- بعد ما تثبتي الخيط بين السنتين وهو مشدود استخدمي حركة شد وجذب بإيدك الإتنين علشان تبدأي التنضيف، ونفس الحركة طبعًا مع أسنانك السفلية.
- لفي الخيط حوالين كل سن على شكل حرف c، وحركي الخيط فوق وتحت.
- حركي الخيط بالراحة وما تعضّيش الخيط وإنتي بتنضفي.
- حركي الخيط للأمام والخلف، بحيث يكون عكس سطح الأسنان وتحت خط اللثة.
- مع كل سن، استخدمي جزء نضيف من الخيط اللي في إيدك.
- كرري العملية دي مع كل سن لحد الضروس.
ممكن كمان تشوفي طريقة استخدام خيط تنظيف الأسنان في الفيديو ده.
طريقة استخدام خيط تنظيف الأسنان بالفيديو
لو لاحظتي إنه خلال استخدامك للخيط إنه فيه نزيف في اللثة، يبقى دي علامة على وجود التهابات في اللثة محتاجة تدخل طبي. ولازم تستشيري طبيبك، لأن التهابات اللثة بتأثر على صحة الأسنان والموضوع لو تم إهمالها ممكن يوصل إنه يؤثر على صحة القلب.
التعليق باستخدام حساب فيس بوك