أكتر حاجة بتطمن الأطفال وتحسسهم بالأمان بالذات وهم صغيرين هي الأحضان والتلامس الجسدي مع الأم. وكتير من الدكاترة دلوقتي بينصحوا إن وقت ولادة الطفل أول حاجة تحصل إنه يتحط في حضن مامته ويلمس جسمها وتبقى أول لحظة في حياته هي حضن مامته.
فيه دراسة اتعملت في مستشفي ناشون وايد في أوهايو على 125 طفل حديث الولادة، اكتشفوا بيها إن الأحضان المبكرة والتلامس الجسدي بين جسم الطفل والأم بيحفز استجابة العقل ونموه بطريقة إيجابية أكتر، ودراسة تانية أثبتت إن نمو الجزء من الدماغ المسؤول عن الذاكرة والتوتر بيكون أكبر وأفضل بدنيًا بين الأطفال اللي اتحضنوا أكتر واتمتعوا أكتر بدعم وحب من أمهاتهم.
ده غير إن الدراسات الحديثة بتقول كمان إن الحضن بيزود مناعة الطفل لإن التواصل الجسدي المستمر مع الأب والأم بيزوّد إفراز هرمون الأوكسيتوزون اللي بيقوي جهاز المناعة فبيقلل الإصابة بالأمراض.
عشان كده، دايمًا بينصحوا الأمهات بتقديم الأحضان باستمرار لأطفالهم بسبب أو بدون سبب. وطبعًا كلنا عارفين الجملة الشهيرة إن الإنسان بيحتاج أربع أحضان كل يوم عشان يقدر يعيش، وبيحتاج ثمانية أحضان عشان يعالج نفسه، وبيحتاج 12 حضن عشان يقدر يكبر ويتطور.
فوايد الأحضان للأطفال:
- الأحضان بتزود شعور الطفل بأنه مقبول طول الوقت وفي كل حالاته وده من أهم الفوايد النفسية للطفل وبتخليه متطمن وواثق في نفسه.
- الأحضان بتخلّي الأطفال أهدى وبتساعد في تفريغ غضبهم لأن الحضن بيرفع مستوى الأكسجين فبيقلل الشعور بالغضب عنده.
- الأحضان بتخلّي ولادنا أطفال أسعد لإنها كمان بتزود نسبة إفراز هرمون السيرتونين واللي بيزود الشعور بالسعادة وبتضبط المزاج.
- حضن الأطفال والتواصل الجسدي المستمر معاهم بيعلمهم الحنية والكرم في المشاعر وبيحسسهم بالأمان والراحة وده بيخليهم يكبروا وهم متزنين نفسيًا وعارفين يعبروا عن حبهم.
الحضن بالنسبة للأطفال عامل زي الشحن اللي بيشحنهم ويخليهم حاسين إنهم مهمين ومرتاحين نفسيًا ومقبلين على الحياة، والجميل إن طول ما احنا بنحضن ولادنا، احنا كمان بنحس بالأمان والراحة في الحضن ده. بس ساعات مع دوشة الحياة وجرينا في دوامة الدنيا، بننسي حلاوة وأهمية حضننا لولادنا، عشان كده بنفكرك تحضني ولادك كل يوم وتقربي المسافات بينكم بالأحضان والحميمية.
التعليق باستخدام حساب فيس بوك