في آخر يوم في السنة، حبينا نشارك معاكم وتشاركم معانا الدروس اللي اتعلمناها واللي اتعلمتوها في سنة 2021. هنقول لكم دروس 2021 من كل فريق محتوى راحة بالي. ياللا اقروها وقولوا لنا أنتم كمان دروس 2021 عندكم.
نبدأ مع نادية جمال الدين، مديرتنا ورئيسة راحة بالي الجميلة:
“ما تقلليش من نفسك أبدًا، انتي قادرة تعملي أي حاجة وكل حاجة!”
نروح شيماء الجمال، كاتبتنا الجميلة ورئيسة القسم العربي:
“اتعلمت إني هاحس بسعادة لما أبطل أنساق ورا معارك وهمية وأدخل بصدري في المعارك الحقيقية اللي كنت باهرب منها.”
أما دينا حشيش، رئيسة القسم الإنجليزي:
“لو فكرت وسكتت 3 ثواني قبل ما تتكلم، هتفرق كتير”
دروس 2021 من كاتبات راحة بالي
ندى خطاب:
“كل حاجة بتحصل في وقتها ولسبب”
سلوى عكاشة:
“الحاجة اللي ضايقتك طالما مش هتأثر عليك كمان سنة ما تستحقش يتزعل عليها كتير”
“الواحد ممكن يتغير بجد لو خلى عنده صبر وأمل وصدّق نفسه”
يمنى مهنى:
“لو حسيتي إنك وصلتي للقاع، فهو مجرد نقطة لانطلاقة جديدة”
“لغات الحب مختلفة. تقبّلي لغة شريك حياتك. مش عيب يحصل كسر في قلبك، العيب إنك تعيشي أسيرة للكسر ده”
“سيبي الحياة تفاجئك”
منار سعد الدين:
“الإيمان بإن قدر ربنا كله خير، والرضا به، من أكبر النعم”
رنا هاني ياسين:
“كوني نفسك والعالم هيأقلم نفسه”
“اتعلمت أركز على “الآن وهنا” وأبطل أعيش دور الضحية بسبب الماضي، وأبطل أقلق على المستقبل”
رحاب لؤي:
“درس 2021 بالنسبة لي إننا مش مضمونين حتى بالنسبة لنفسنا، فجأة ممكن جسمنا يخوننا ونفسيتنا تخوننا. مهما كنا جامدين وحاسين إننا بخير وبنعرف نسيطر على أمورنا، شوية أذية غير متوقعين ممكن يخلونا فجأة حد تاني تعبان نفسيا وبدنيا. درس 2021 إننا ما نتعافاش على نفسنا، من حقنا نرتاح، مش عيب نفارق لو ما بقاش فيه فرص، أي حد مهما كان غالي أو كان مسمى العلاقة بيننا لازم نبعده فورا لو معرفتنا أصبحت مؤذية، إحنا هشين أكتر مما نتخيل وما نستحقش غير كل لطف وحب وتقدير.”
وأخيرًا، أنا بقى، ليلى سامي:
“اتعلمت إن مهما كان اللي أنا مخططاه، وحابكة الخطة قوي، ممكن ما يتحققش. بس ما ينفعش أزعل، لازم يكون عندي إيمان إن تغيير الخطة كان لسبب أحسن.”
كده اتعرفتوا على الكاتبات أكتر وأكتر. ولو لسه ما تعرفوش واحدة فيهم، ياللا ادخلوا اقروا مقالاتها واتعرفوا عليها. وقولوا لنا إيه الدرس اللي شبه درسكم في الحياة. وقولوا لنا دروسكم السنة دي.
خطة السنة الجاية محتاجة لها بلانر، أجندة كده جميلة. لو لسه ما اشتريتيش البلانر، اتفرجي على البلانر المثالية لكل أم.
التعليق باستخدام حساب فيس بوك