كلنا عارفين وبنقرا كل يوم عن مرض السرطان وعن العلاج الكيماوي وعن تأثيره على البني آدم، بس مش كتير يعرف ازاي يدعم اللي حواليه لو لا قدر الله اتعرضوا له. وبمناسبة شهر أكتوبر، الشهر العالمي للتوعية بسرطان الثدي، في المقال ده، هاقول لك على حاجات تعمليها ممكن تقدري بيها تعملي دعم مرضى السرطان عمومًا ودعم صديقتك المصابة بالسرطان خصوصًا.
نصائح لـ دعم مرضى السرطان خاصة سرطان الثدي
-
اسمعيها باهتمام:
لما تبقى محتاجة تحكي عن مشاعر سلبيه حاسّاها من اللي بتعدي بيه، ومن اللي حواليها، أو قرار هتاخده، أو شغل هتسيبه مثلًا بعد ما عرفت بإصابتها بالسرطان، بلاش تنكري عليها المشاعر دي، أو تقولي لها اللي حاسّاه ده مش حقيقي، أو تحسسيها إن قرارها غلط واندفاعي (حتى لو كنتي شايفة كده، فده مش وقت النصيحة. ده وقت إنك تسمعي بجد وبس).
-
أنا لو كنت مكانك:
ما تحطيش نفسك مكانها وتبدأي تقدمي لها نصايح من مكانك عن القرارات اللي مفروض تاخدها ناحية العلاج وحالتها الصحية.
-
اختاري كلامك:
زي ما انتي مش مطلوب منك تدي لها نصايح، فمطلوب كمان إنك ما تتجاهليش اللي هي بتقوله، ولا تسأليها كتير في تفاصيل تقيلة عليها. مهم إنك توصّلي لها بكلامك إنك موجودة وفاهمة صعوبة اللي بتعدي بيه بجمل زي:
- لو محتاجة تتكلمي، أنا جنبك
- ناوية تعملي إيه وأنا معاكي
- أقدر أساعدك ازاي؟
-
خليكي صاحبة فرفوشة:
مش معني إنك هتسمعيها كويس، يبقى طول الوقت تبقي محسساها بالشفقة والبؤس من حالها. خليكي الشخص الفرفوش في حياتها. ادعميها بطريقة مبتكرة جنب الطبطبة، خرّجيها (من غير إصرار أو ضغط عليها). ابعتي لها هدية فجأة على البيت، هاتي لها كتاب جديد تقراه.
-
الكيماوي:
مشاوير العلاج الكيماوي بتبقى طويلة ومتعبة على المريضة، حاولي تكوني مرتبة نفسك على مواعيدها، وتكوني معاها وتبقي عارفة إن ده أكتر وقت بتتأثر فيه نفسيًا وجسديًا.
-
البيت والولاد:
لو صاحبتك أم، هتكون محتاجة دعم ومساعدة كبيرة فيما يخص ولادها. وفي الغالب، زي معظمنا، هتبقى حاسة بتأنيب ضمير ناحيتهم. فدورك إنك تبقي موجودة لمساندتها فيهم زي إنك تخرجيهم \ توديهم تمارين في الأيام اللي هي ما تقدرش فيها. حتى فكرة وجودك جنب ولادها، وإنك عارفة اخبارهم ومهتمة بتفاصيلهم ده بالنسبة لأي أم دعم كبير ومهم.
-
أكل صحي:
ممكن تبعتي لها على البيت مفاجأة أكلات صحية مليانة خضار وفاكهة تشجعيها بيهم إنها تاكل من غير ما تكوني بتضغطي عليها.
وفكريها دايمًا إنها حقها تطلب مساعدة بشكل واضح من اللي حواليها، حتي لو المساعدة دي كانت بس إنك تفكريها بإنها حلوة في كل حالاتها، وإن اللي بيحبوها بجد، هيفضلوا جنبها وهي برضه في كل حالة ليها. وما تنسيش تساعديها تدخل وسط محاربات السرطان اللي عدوا بنفس تجربتها.
التعليق باستخدام حساب فيس بوك