محتويات المقال
موسم الصيف خلاص دخل، وبالتبعية وراه على طول بيبدأ موسم البوتي تريننج وأمهات كتير مننا بتبقى محتاسة ومش عارفة تبدأ منين وازاي وبإيه بالظبط، وودنك منين يا جحا! في المقال ده، هاقول لك أهم نقط تركزي فيهم وانتي بتبدأي المرحلة دي مع البيبي وتبدأيها ازاي.
استعداد البيبي واختيار الوقت المناسب للبدء
أول نقطة هي التركيز على استعداد الطفل وملاحظة أهم علامات بتقولك إن الطفل جاهز اللي محتاجة تشوفي على الأقل واحد منها عشان تاخدي قرار تدريبه علي البوتي، ده غير طبعًا اختيار الوقت المناسب ليكي وللطفل من حيث الجو الدافي أو ظروف البيت (يعني ما ينفعش يكون فيه أي تغيير في حياة الطفل زي دخول حضانة جديدة أو استقبال أخ جديد أو أي تغيير تاني) لازم الطفل يكون وقتها مستقر وهادي نفسيًا ومفيش حاجة موتراه ممكن تأثر على البوتي تريننج.
تحضير الطفل نفسيًا وإشراكه في التجهيز
وده عن طريق قراية القصص والحواديت عن الموضوع ده قبل النوم، وإنك تاخديه وتنزلوا تشتروا الملابس الداخلية اللي هيلبسها بدل الحفاض diaper ويختارها بنفسه وتشتروا كمان سوا الـ toilet seat اللي هيستخدمها ويختار الشكل اللي يحبه ويبقى عايش كده في موود إنه داخل على حاجة جديدة جميلة عشان كبر.
تجهيز البيت وتحصينه
من أهم الحاجات اللي بتقلل الضغط في وقت التدريب على الحمام، وبتساعد كمان في التحكم في ردود أفعالنا وقت الحوادث هي تجهيز البيت كويس وتغطية كل الحاجات اللي قلقانة عليها عن طريق المشمع أو الملايات اللي بيبقى ناحية منها مشمع وناحية عادي (هتلاقوها بتتباع في محلات الأطفال).
وقت التنفيذ
خلاص جهزنا كل حاجة، ندخل في التقيل بقى.
- أول يوم في البوتي تريننج، هتقلّعي الطفل الحفاض الصبح، وتبدأي تدخليه كل نص ساعة، مش لازم يعمل، ومش لازم تفضلوا قاعدين في الحمام ساعة، المهم إنه يفهم المبدأ لحد ما يقدر يتحكم.
- ما تسأليش البيبي عايز تدخل الحمام؟ لإن الإجابة معظم الأوقات هتكون لا، فانتي لما ييجي وقت دخول الحمام، فكّريه علطول. ولو مشغول بحاجة في إيده، إدي له وقت كفاية بإنك تفكريه قبل التنفيذ بشوية وما تاخديهوش بالغصب عشان ما يعندش.
- لو بتشتغلي، خدي أجازة من شغلك وامنعي الخروج والزيارات أول 3 أيام لأسبوع. وبعد كده، ابدأي اخرجي بالبيبي لفترات قصيرة مع وجود حمام قريب أو حتى الـ toilet seat بتاعه.
- أنا مش بافضّل البوتي اللي بعيد عن التويلت لإنها بتزوّد علينا مرحلة احنا في غنى عنها، فالأحسن تختاري قعدة للتويلت والمهم رجل الطفل تكون مسنودة علي حاجة وهو قاعد عشان ما يخافش.
- ما تنسيش تعملي لوحة الهدايا بتاعة التويلت والمرات اللي نجح إنه يعمل فيه مع كثير من التهييص والتهليل والأفورة في الاحتفال.
وقت النوم:
أنا من أنصار العلقة الواحدة ونخلص مرة واحدة الصبح وبالليل. لكن لو مش حاسة إنك هتبقي مرتاحة لكده أو جيتي في آخر اليوم لقيتي نفسك مجهدة ومش هتقدري تصحّيه كل ساعة في الأول وكل ساعتين بعد أول كام يوم، يبقى بدل ما تلبسيه الحفاض تاني بالليل ويحس إنه مرتاح ويرجع يحبه تاني، فممكن تلبّسيه اللبس الداخلي بتاعه عادي وفوقه الحفاض عشان يكون اللي لامس جسمه هو القطن اللي هيتبل لو عمل تويلت فيه وهيقلق، عشان يفضل عقله متبرمج إنه الصبح وبالليل واحد ولازم يتحكم.
لا تراجع ولا استسلام:
لو خلاص نويتي وبدأتي تدربي طفلك على دخول الحمام، يبقى اعتبريها مهمة تركزي فيها وهتخلص، يعني باشوف كتير أم تقول لا خارجين النهارده فتلبّس البنت الحفاض، حد تاني “جاي لي ضيوف، فنلبس الحفاض” ونفضل نشتت الولاد على حسب ظروف يومنا فبسبب الموضوع ده، فترة التمرين بتزيد أكتر.
وأهم حاجة في ده كله بقى هو إنك تكوني انتي جاهزة ومستعدة نفسيًا ومش مضغوطة ولا مستعجلة. خدي وقتك ووقته وبالهداوة وتجنّبي تمامًا الزعيق والعصبية والأخطاء اللي ممكن تزود فترة البوتي تريننج جدًا، وافتكري دايمًا إن مفيش بني آدم بيدخل الجامعة وهو لسه بالحفاض يعني! فالطفل مصيره هيتمرن وكله هيعدي.
التعليق باستخدام حساب فيس بوك