معظمنا بيختار ألوان دهانات الحوائط على حسب الألوان اللي احنا بنحبها حتي لو مش ماشية مع أحدث صيحات موضة الديكور. لكن فيه علم ورا اختيار الألوان سواء عشان تجديدات البيت أو لو لسه بنبدأ في بيت جديد. أكيد بتسألي نفسك: عايزة أختار ألوان الشقة أعمل إيه؟
هنقولك على شوية نصائح صغيرة هتساعدك في اختيار ألوان دهانات الحوائط وكمان تخلي ديكور البيت مميز.
معاني ودلالات الألوان
- معروف إن اللون الأحمر لون الحب وبنشوف الفلانتاين كله أحمر، لكن كمان الأحمر مرتبط بالطاقة، بالخطر، بالقوة، وبالسلطة. كمان الأحمر بيرفع الضغط وبيزود الشهية لأنه بيحسن الحرق.
- اللون الأصفر مرتبط بالسعادة والمرح والذكاء. وبيعلي الطاقة العقلية، بس خدي بالك الإكثار منه لو الأوضة كلها صفرا هتخلق توتر.
- البرتقالي بقى واخد من الأحمر طاقته ومن الأصفر سعادته وبهجته. مرتبط بالمرح والشمس وبيدي إحساس بالحماس والإبداع والشجاعة.
- البني مرتبط بالثقة والتحمل عمومًا. البني الفاتح بيمثل الاستقرار والبني الغامق بيمثل النضج.
- الأزرق متفرد جدًا ومثالي وروحاني. بيمثل الاستقرار والسلام والمرونة.
- الأخضر هو لون الطبيعة. ففيه انسجام، طزاجة، خير، أمان، شفا، توازن، استقرار، حقيقة، يا خبر! دا أنا حبيته قوي.
- بمبي بمبي بمبي بمبي.. الرقة، الهدوء، البراءة، الأمل والتفاؤل والطفولة.
- البنفسجي واخد من الأحمر طاقته ومن الأرزق استقراره. بيمثل الرقي والرفاهية والطموح. ومرتبط بالحكمة والكرامة والاستقلالية والغموض.
- الأبيض نور وخير وبراءة، الأبيض أمان ونقاء ونضافة، بداية جديدة ناجحة، إيمان.
- الأسود سلطة وشياكة بس كمان موت وشر. ارتبط في أذهان الناس بالخوف والحزن والموت. لكن كمان هو لون الأناقة والرسمية.اعرفي هنا .. 10 تطبيقات لا غنى عنها على موبايلك لكل أم
إزاي نستغل معرفتنا بالمعاني دي في اختيار ألوان دهانات الحوائط؟
لو عايزة تختاري ألوان الحوائط بشكل يناسب المعاني دي، لازم أول خطوة تكون تحديد الغرض من كل مساحة.
- ألوان حوائط المطبخ: ابعدي في المطبخ عن اللون الأحمر والبرتقالي والأصفر لأنهم بيشجعوا على الأكل الكتير. الأزرقات والأخضرات أحلى كتير.
- أوضة السفرة: نفس نصايح المطبخ، تجنبي الألوان النارية والفاقعة لأنها هتخليكي انتِ وأسرتك تاكلوا أكتر.
- طلاء جدران أوضة المعيشة Living room: اختاري ألوان دافية في أوضة المعيشة: أحمر، أو برتقالي، أو روحي للبني بدرجاته. الألوان دي بتشجع على الكلام والتواصل لأنك بتحسي بالدفا.
- دهان جدران أوضة النوم: دا مكان راحتك ومكان تواصلك مع جوزك. لو رحتي للأزرقات أو الأخضرات أو البنفسجي خصوصا الفواتح أو الغوامق من الألوان دي هيكون مهدئ أكتر.
- دهان جدران أوضة نوم الأطفال: استخدمي ألوان الباستيل pastel colors في أوضة الأطفال، الفواتح والألوان الهادية هتساعد أولادك يسترخوا وكمان هتكون فيها البراءة والخفة.
- مكتب البيت أو المكتبة أو مساحة الشغل: انتِ هنا عايزة انتاج وسرعة. الأخضر أكتر لون يساعدك على التركيز والإنتاج.
- الحمام: الأبيض والفواتح في الحمام هتديكي دايما إحساس بالنضافة، لأنه المكان اللي بتستحمي فيه، فلازم تحسي بالنضافة والاسترخاء مع العلم إنه الأبيض هيحتاج منك عناية أكتر بيه.
مصادر ساعدتنا في المقال
موقع WebMD
https://www.webmd.com/women/features/color-psychology
موقع علم نفس الألوان
https://www.colorpsychology.org/
What’s your Reaction?
التعليق باستخدام حساب فيس بوك