أسئلة كتير بتدور في دماغ الأمهات عن حكم تربية الكلاب في المنزل، وإيه اللي بيحصل في حالة تربية الكلاب في البيت ومخالطتها للإنسان؟ ” .. ماما، أنا عاوز كلب” أشهر طلب بيطلبوه الأطفال الصغيرين من أمهاتهم، والحقيقة أمهات كتير بتقف مترددة وخايفة مش عارفة ولا قادرة تعرف هي المفروض فعلًا تستجيب ولا لأ، والمفروض تتصرف ازاي في الحالة دي ولو فعلًا استجابت مفروض تراعي الكلب ده ازاي والمهام تتقسم ازاي بينها وبين ولادها وإيه هي أشهر تطعيمات الكلاب اللي المفروض يأخدها.
كل الأسئلة دي طرحناها على مدربة الكلاب المتمرسة فاطيما دعبس واللي اشتهرت برحمتها ولطفها في تدريب الكلاب على أصعب الأوامر والحركات، راحة بالي سألتها مجموعة من الأسئلة اللي بتشغل بال أمهات كتير ودي كانت إجاباتها.
اقرأي أيضا: ابني عايز يربي كلب!
أسعار الكلاب بتبدأ من كام ؟
بتختلف من كلب لكلب، في من أول 800 جنيه زي الجولدن والجيرمن لكن بتكون كلاب مش بيور، وبتوصل الأسعار لحد 50 و60 ألف جنيه، الأسعار بتختلف في النوع الواحد حسب درجة نقاءه، ودي بتتحدد من خلال مؤسسات عالمية فيها مقايييس لدرجة نقاء الكلب، وبتديله شهادة.
إيه أهمية تربية الكلاب في البيت بالنسبة للأطفال؟
وجود كلب في بيت فيه طفل، لو اتعمل بطريقة مظبوطة ووعي، هيكون له فوايد كتيرة جدًا تبان أكتر على المدى الطويل.
- هيتعمله هو تحمل المسؤولية. لو طفل عمره سنتين وباعلّمه ييجي يقف جنبي وأنا بحط الأكل للكلب، بيشوفني وأنا باسرح له شعره وبانضف التواليت بتاعه، مع الوقت هو اللي هيعمل ده لأنه هيتعلم تحمل مسؤولية الكائن اللي هو بيحبه وعاوزه يكون موجود معاه في البيت.
- تربية الكلاب في البيت بتعلم طفلك الرحمة ومتعة إسعاد الغير، لما الطفل يدلّع الكلب ويطبطب عليه ويلعب معاه، ويشوف سعادة الكلب البريئة جدًا هيطلع طفل عنده عطاء.
- الوفاء، ويمكن اللي باقوله يكون غريب، لكن مع الوقت، البشر بتتطبع بطباع الكلاب ودي طباع نادرة وأهمها الوفاء.
- إنه هينشغل في شيء حي. بدل قضاء الوقت على الموبايل والآيباد، بيتعلم الصبر واللطف.
إيه السن المناسب للطفل لاقتناء كلب؟
وجود كلب في البيت مناسب من لحظة ولاد الطفل، أهم حاجة التربية الصحيحة وإننا نعلم الطفل إزاي يتعامل مع الكلب، من يومين كنت بدرب كلب بيتبول في بيت جواه طفلة عمرها سنة، خليتهم يتعودوا على بعض، أهم حاجة سن الشقاة اربع وخمس سنين الأم تعود الطفل يتعامل بلطف، مايشدش ودانه أو ديله أو يضربه.
إيه هي نوعية الكلاب المناسبة للاقتناء بالنسبة لطفل؟
دي بترجع لمساحة البيت، ما نقدرش نقول نوع كلب معين مظبوط جدًا مع الأطفال، فيه عوامل كتير، لكن نقول إن أي بيت يقرر اقتناء كلب لازم يحط في الاعتبار المساحة، هل هيقعد في الشقة ولا بره؟ هل عندنا حد من أفراد العيلة بيخاف أو لأ؟ الأم والأب (والجد والجدة) بيخافوا أو لا؟ سبق لينا تربية كلاب أو لا؟ كلها عوامل مهمة جدًا بتوجّهنا ناحية الكلب اللي نقدر نربيه.
الكلب الجولدن ريترفر والليبرادور ريتريفر كلاب طيبة جدًا، مشكلتها في شعرها مثلًا، الجولدن شعره طويل، ممكن يزعج بعض الناس لو حد عنده حساسية، لكن في العموم الشخص اللي عنده حساسية مش هايحتمل كل الأنواع سواء كان شعرها طويل أو قصير، عموما مفيش كلب بيسبب حساسية وكلب لأ، في شخص عنده استعداد للتحسس وشخص لأ.
عندنا كلب صغير زي الجريفون، وكلب صغير اسمه بوج، كل الكلاب مناسبة باستثناء بعض الفصايل ودي حالات قليلة، الكلاب الكبيرة بتكون أحن على الأطفال من الكلاب الصغيرة، لكن المشكلة بتكون في حجمهم الكبير.
إيه أفضل الأماكن لشراء كلب؟
مفيش مكان معين أقدر أرشحه لشراء الكلاب، لأنهم كتير وفي كل مكان، لكن في مجموعة من المواصفات المهمة اللي ناخد بالنا منها، ممكن نجيب من أي مكان، لكن المهم يكون سمعته كويسة وده نعرفه من خلال تقييمات الناس للمكان، طريقة تعامل اللي شغالين معاك كزبون ومع الحيوانات نفسها، كل ما كان مكان معروف وسمعته كويس ده بيوفر علينا مخاطر زي إننا نشتري حيوان مريض يموت تاني . وأهم نصيحة في العموم إننا مانشتريش من سوق الجمعة لأنها غالبا كلاب مسروقة، لذلك أدعم التبني كبديل للشراء
إيه أبرز الأماكن لتبني كلب؟
في ملاجئ كتير في مصر بتوفر خدمة تبني قطط وكلاب، منهم عل سبيل المثال لا الحصر:
- جميعة إيسما (الجمعية المصرية للرحمة بالحيوان)
- جمعية سبير (الجمعية المصرية لحماية حقوق الحيوان)
- هوب hope لإنقاذ الكلاب البلدي وإعادة تأهيلها
- جروب إنقاذ الحيوانات
في حالة وجود كلب جديد، نعوده على الإخراج إزاي؟
تعويد الكلب على المكان اللي بيعمل فيه حمام مالهوش مدة معينة قد ما له علاقة هنعلمه إزاي؟ أبسط حاجة مواعيد الأكل لازم تكون في مواعيد ثابتة، ياكل 12 وأربعة وستة مثلًا، وبعد الأكل بعشر دقايق بنقف بيه في مكان الحمام بدون عنف ولا خوف ولا نشيله بطريقة توتّره ولا نحبسه في الحمام لحد لما يعمل، لإن كل ده بيبني حالة من التوتر وبيخليه يخاف لإنه بيتحبس في مكان مش فاهم إن هو بيتحبس عشان يعمل تواليت.
الطريقة الصح إننا ناخده من إيده ونفضل واقفين في المكان اللي حابين نعوده عليه، وأول لما يعمل نحسسه إننا فرحانين ونقعد نهلل وندي له مكافأة. الكلام ده ممكن يستمر من عشر أيام لأسبوعين. وبتختلف أنا مواظب قد إيه. ومن ضمن النصايح إننا نشيل المياه لإن في كلاب بتشرب طفاسة مش عطش، عشان نقدر نتحكم في عدد مرات بيبي البول والبراز وكل لما نتفرغ للموضوع بيخلص في وقت قياسي.
ايه أهم تطعيمات الكلاب المهمة؟
أهم التطعيمات من أول 45 يوم ل50 يوم التطعيم الخماسي أول حاجةـ بعد كده الثماني بشهر او تلات اسابيع حسب الدكتور، وبياخد الثماني بعدها مرة تانية كجرعة تأكيدية، كمان بياخد تطعيم ضد الديدان والحشرات، و كده الكلب تمام.
التطعيمات المذكورة بتتكرر كل سنة، وتطعيم الديدان والحشرات كل 6 شهور أو حسب الكلب واكله وحالته الصحية، و لازم عند سن 3 شهور يتطعم تطعيم السعار.
إيه اللي يخلي الكلب يعض الطفل لا قدر الله؟
تربية خاطئة للكلب والطفل، زي مثلا إن الأم تسيب الطفل يضرب الكلب او يشد ديلهه أو ودانه، الكلب بيستحمل وفي الآخر بينفعل، حتى لو ماعضش عضة شرسة بيعض عشان يبعد الطفل عنه.
سبب تاني للعض إننا نكون مدلعين الكلب بزيادة من غير ما نفهمه إن ده غلط، تالت سبب إنه يكون محبوس فترة طويلة بعيد عن الطفل، وفجأة يخرج ويشوفه.
لو كلب عض طفلي اعمل ايه ؟
سواء متطعم سعار أو مش متطعم بنروح أقرب مستشفى حميات و بناخد تطعيم السعار ومعاه التيتانوس زيادة أمان.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك