محتويات المقال
بمجرد ما تبتدي الرضاعة الطبيعية مع طفلك بييجي سؤال كدا في دماغك: إمتى مفروض أوقف الرضاعة الطبيعية؟ منظمة الصحة العالمية ومنظمات صحية تانية بتوصي إن تغذية الطفل تعتمد على لبن الأم طول فترة أول ست شهور، وبعد كدا تستمر الرضاعة مع إدخال أنواع مختلفة من الأكل للطفل لمدة سنتين. ده لأن لبن الأم مش بس سائل للتغذية، إنما كمان وسيلة مهدئة للطفل. وبيحتوي على عناصر قادرة على رفع مناعة طفلك. حسب الإحصائيات العالمية، 60% من الأمهات بيدخلوا في نظام أكل أطفالهم أطعمة تكميلية في عمر أقل من ستة شهور مع إن ده غير موصى به تمامًا.
امتى تقدري تاخدي خطوة الفطام لطفلك؟
نظريًا عملية الفطام بتبتدي بمجرد ما تدخلي الأطعمة التكميلية في تغذية طفلك اللي بطبيعة الحال بتبدأ من سن ست شهور مع الرضاعة الطبيعية. خبراء الصحة والتغذية بيقولوا معلومة مهمة: بعد سن ستة شهور طفلك بطبيعة نموه بيحتاج عناصر غذائية أكتر من الكمية اللي في لبن الأم زي الحديد والزنك وفيتامينات ب ود. علشان كدا مهم إن الأمهات تبدأ في السن ده تدخل الأكل في نظام تغذية طفلها. مع ملاحظة إن لبن الأم هيستمر كمصدر رئيسي لشهور بعد إدخال الأكل الصلب في تغذيته. ده لأن أغلب العناصر الحرارية والغذائية اللي بيحتاجها طفلك بياخدها من الرضاعة الطبيعية. طبعًا انتِ صاحبة القرار في إيه الأنسب ليكِ ولطفلك فيما يخص الفطام. مافيش أي داعي للتوتر من كلام الناس حواليكي بخصوص القرار ده.
إزاي أقدر أوقف الرضاعة الطبيعية؟
خطوة زي دي بتحتاج تتاخد بشكل تدريجي لأنك لو أخدتيها فجأة ممكن يعرضك لخطر الإصابة بالتورم أو انسداد قنوات اللبن أو التهاب الثدي. غير إن ده هيكون تغير مفاجيء في الجهاز الهضمي والمناعي لطفلك ومؤلم ليكم عاطفيًا.
هل انتي محتاجة توقفي الرضاعة الطبيعية؟
بعض الأمهات بتفتكر إنها بمجرد رجوعها للشغل بعد الولادة، هتحتاج توقف الرضاعة الطبيعية. بس ده تفكير غلط لأنك حتى لو رجعتي الشغل واحتاجتي تدخلي الرضاعة الصناعية لطفلك، لازم تحافظي على ممارسة الرضاعة الطبيعية قبل نزولك الشغل وبعد رجوعك علشان تقدري تحافظي على التواصل العاطفي اللي بتوفره الرضاعة الطبيعية بينك وبين طفلك.
وقف الرضاعة قبل عمر ستة أشهر
لو حسيتي إنك مش قادرة على الاستمرار في الرضاعة الطبيعية وعايزة تفطمي طفلك قبل سن ستة شهور، هتحتاجي تعملي ده بشكل تدريجي وأفضل طريقة إنك ترضعي مرة طبيعي ومرة باستخدام اللبن الصناعي. الأطفال عمومًا بيكونوا عارفين ريحة لبن أمهم. علشان كدا لما تقرري تدخّلي اللبن الصناعي، خلي حد من أفراد أسرتك يعملوا كدا وانتِ مش موجودة في الأوضة لأنهم هيرفضوه في حالة وجودك. يفضل إنه يكون رضعة منتصف اليوم؛ مش المرة اللي أول ما يصحى ولا المرة بتاعت النوم بالليل. ولازم تاخدي بالك إنك ما تجبريش طفلك ياخد كمية لبن صناعي أكتر من اللي أخدها لأنه بيكون اكتفى خلاص.
ممكن تلاحظي إن الثدي منتفخ أكتر وفيه ألم وده بسبب إن جسمك بيتأقلم على إنتاج كمية لبن أقل على حسب عدد مرات الرضاعة الطبيعية. بمجرد ما جسمك يبتدي يتأقلم مع العدد الأقل بعد كام يوم، قللي عدد مرات الرضاعة الطبيعية مرة كمان. وهكذا لحد ما توقفي الرضاعة تمامًا ويكون جسمك وطفلك تأقلموا مع الوضع الجديد.
وقف الرضاعة بعد عمر ستة أشهر
بعد سن ستة شهور، لما تبتدي تدخلى الأكل الصلب لطفلك، هتلاقي إن عدد مرات الرضاعة الطبيعية بيقل تدريجيًا لأنه بيكون شبعان. وهتلاقي بعد وصول طفلك لعامه الأول إن مرات الرضاعة قلت كتير لأنه بياكل وجبات منتظمة من الطعام الصلب خلال اليوم.
ده بيكون أفضل وقت إنك تبتدي في عملية الفطام. لو حبيتي تدخلي حليب البقر في تغذية طفلك كبديل، الخبراء بينصحوا إن ده لا يتم قبل وصولهم لعامهم الأول. الخطوة دي بتحتاج إنها تتعمل بشكل تدريجي لأن فيه أطفال بياخدوا وقت أطول من غيرهم علشان يقدروا يتأقلموا مع الوضع الجديد. ولو لاقيتي نفسك بتواجهي صعوبة، مفيش مانع إنك تستعيني بأخصائي رعاية صحية.
توقيف الرضاعة بمرور الوقت
فيه أمهات بتاخد سياسة الفطام اللي بييجي مع الوقت، هتلاقي مع الوقت ومع نمو طفلك وانشغاله بالعالم الخارجي وزيادة مرات الأكل الصلب إنه بيفقد اهتمامه بالرضاعة الطبيعية تدريجيًا لحد ما تلاقيه في يوم خلاص مش بيطلبها.
عمومًا لازم تسيبي لجسمك الفترة اللي هيحتاج يتعود فيها على فكرة الفطام لإنه أخد الخطوة دي فجأة بيكون شيء مؤلم على المستوى الجسدي والعاطفي جدًا.
يحصل إيه لو أنا عايزة أفطم طفلي بشكل سريع؟
من الأفضل إن الفطام يتم بشكل تدريجي، لكن في بعض الحالات اللي بتتطلب الفطام سريع – زي ظروف صحية ليكِ أو لطفلك أو إنك مش قادرة تتواجدي مع طفلك.
فانتِ هتحتاجي تتعلمي تضخي لبن من ثديك إما عن طريق مضخة اللبن أو بالضغط بإيدك، لكن بكميات قليلة علشان بس تخففي من الضغط اللي هتتعرضي له وبالشكل اللي مش هيحفز جسمك إنه ينتج كميات أكبر من اللبن.
لازم تعرفي إن لبن الأم بيحتوي على مادة اسمها العلمي مثبط التغذية المرتدة للرضاعة feedback inhibitor of lactation (FIL) ودي مادة بيفرزها الثدي بمجرد توقف طفلك عن الرضاعة. لكن الموضوع ممكن ياخد أيام أو حتى أسابيع لحد ما الأمور ترجع لطبيعتها.
تقدري تاخدي مسكن زي الباراسيتامول أو الإيبوبروفين (ما تاخديهوش لو عندك ربو) علشان تخففي شوية من إحساسك بالألم. استشيري الصيدلي وأخصائي الرعاية الصحية بخصوص أي دواء تاخديه.
هل أقدر أستمر في الرضاعة الطبيعية في حالة حبيت أحمل تاني؟
إمكانية حدوث حمل في حالة عدم استخدام وسيلة منع حمل بتكون عالية جدًا. وقرار الاستمرار في الرضاعة الطبيعية خلال حملك لازم قبله تستشيري أخصائي الرعاية الصحية اللي بتتابعي معاه حالتك خصوصًا لو كنتِ مريتي بتجربة الولادة المبكرة أو الإجهاض أو كنت بتعاني قبل كده من النزيف.
كلمة أخيرة بخصوص الفطام
لما تقرري تقومي بعملية الفطام، لازم تاخدي الأمور ببساطة وبهدوء، لأنه قرار مش سهل وبيكون معاه تغيرات جسدية وعاطفية ليكِ ولطفلك نظرًا لأنه كان نشاط بتتشاركوا فيه وتوقفتوا عنه. لكن هتلاقوا مع بعض طريقة تواصل جديدة بعد كده.
التعليق باستخدام حساب فيس بوك