ركن القهوة في البيت مش رفاهية ولا موضة، طول عمرنا عندنا ركن قهوة في بيتنا بس الفرق إننا مكناش بنسميه ركن القهوة أو الكوفي كورنر، حتى جداتنا كان عندهم السبرتاية وأدواتها والكنكة وبرطمانات البن والسكر والشاي، وفي بيوت أمهاتنا كان في دايمًا جنب غلاية المياه أو البراد -على حسب استخدام كل واحد- السكرية والمعالق ومستلزمات المشروبات كلها.
الجديد بس دلوقتي إننا بقينا نسميه ركن القهوة، وبنعمله خارج المطبخ لو في مكان طبعًا، وعلشان القهوة ما بقتش القهوة التركي وبس زي زمان، وبقت مجموعة مشروبات لا نهائية ممكن تتعمل بالقهوة، اتطورت جدًا المساحة اللي بنحط فيها مستلومات القهوة والشاي وأدوات عملهم، علشان كده هنقدملك نصايح وصور أفكار لعمل ركن القهوة في بيتك.
نصايح عمل ركن القهوة في بيتك:
- مش لازم تخصصي ميزانية خرافية لعمل ركن القهوة، تقدري تشتري كل شهر أو أكتر -على حسب إمكانياتك- قطعة واحدة بس جديدة، صدقيني هتفرحي بتطور ركن القهوة بتاعك أكتر من لما تعمليه كه مرة واحدة ويرهقك ماديًا.
- لو ناوية تشتري ماكينة لعمل القهوة، حاولي تدوري على حاجة فيها إمكانيات إنتي محتاجها كلها، متجيبيش حاجة زيادة عن استخدامك أو حاجة أقل فتضطري تجيبي بدالها بعد شوية.
- لو مش معاكي فلوس لماكينة القهوة، تقدري تحطي بدالها غلاية المياه والكنكة لحد ما تجمعي تمن ماكينة القهوة.
- لو في مكان مناسب برا المطبخ لركن القهوة، حاولي يكون قريب من المطبخ والمكان اللي بتشربوا فيه القهوة قدر الإمكان.
- لو معندكيش مساحة كافية برا المطبخ، ممكن تخصصي جزء من المطبخ -ويفضل يكون أقرب جزء لباب المطبخ- لركن القهوة والمشروبات مع تخصيص درج أو درجين على حسب المتاح عندك.
- تقدري تستغلي الاستيكرز أو ورق الحائط اللي متوفر في السوق دلوقتي علشان تدي خصوصية للكوفي كورنر.
- حافظي قدر الإمكان على مساحة فاضية لتحضير القهوة، لأن الزحمة هتبقى صعبة أوي في الاستعمال والتنضيف.
- لو عندك قطعة أثاث مش مستخدمة تقدري تعملي ليها إعادة تدوير وتستغليها للكوفي كورنر.
صور 30 فكرة مميزة لعمل ركن القهوة في بيتك:
منيو ستاربكس بيلخبطك؟ .. اعرفي أشهر أنواع مشروبات القهوة هنا
لو عملتي ركن قهوة في بيتك شاركينا بصورته، ولو لسا معملتيش قوليلنا أي فكرة عجبتك أكتر من اللي عرضناهم فوق.
التعليق باستخدام حساب فيس بوك