محتويات المقال
غرفة نوم طفلك هي اللي بيقضي فيها معظم أوقاته ولما نيجي نخطط لتصميمها لازم نراعي إنها تكون مناسبة لسنه والألوان والديكورات تكون مفضلة لاختياراته مع مراعاة طبعًا معايير الآمان وخصوصًا للسن الصغير، غرف نوم الأولاد بتكون متنوعة بأشكال كتير بتتناسب مع شخصياتهم الحيوية وحبهم للرياضة والشخصيات الخارقة وفي المقال ده هنعرفك على أشكال وديكورات غرف نوم أطفال أولاد
ألوان غرف نوم أطفال أولاد
طبعًا ألوان غرف الأولاد هتكون معظم إختيارات ألوانها من اللون الأزرق بدرجاته و كمان الأصفر والأخضر، وممكن اللون الأحمر يكون فكرة لطيفة لغرفة نوم أولاد وممكن تستخدمي أكتر من لون في دهانات الحائط زي الأزرق الغامق واللون السماوي أو تستخدمي لون واحد للحوائط وتعتمدي على الديكورات أو العفش بالألوان المختلفة عشان تضيفي تنوع لألوان الغرفة وبالنسبة لديكور الحوائط ممكن تضيفي لمسة جمالية وتستخدمي ورق الحائط أو الستيكر أو تستعيني برسام يعملك رسومات ولادي لطيفة.
الشخصية الكارتونية المفضلة لابنك
ممكن تختاري أكتر شخصية مفضلة ابنك بيحبها زي سوبرمان أو باتمان وتحطيها كورق حائط أو ممكن ترسميها على الحيطة أو تعملي ديكورات بأشكال الكارتون وتعلقيه على الحائط أو الباب وفيه بعض الأماكن بتصمم براويز بأشكال الأبطال الخارقين وكمان ممكن تشتري سجادة أو غطا سرير بالشكل المفضل لابنك.
ركن القراءة
لو ابنك بيحب القراءة ممكن تستغلي مكان بسيط في الغرفة انك تعمليله ركن للقراءة عشان تشجعيه على القراية، الركن بيتزين بأرفف أو مكتبة بسيطة تكون مش عالية أوي عشان يقدر يوصلها بنفسه من غير ما يضطر يقف على حاجة وممكن تعملي خيمة بسيطة أو مجموعة من الكراسي الصغيرة عشان يقعد عليها أو سجادة عليها أشكال كارتون ومخدات.
سراير أطفال مبتكرة
كل الأطفال بتحب السراير اللي بتكون على شكل شخصياتهم المفضلة، ممكن تغيري في ديكور غرفة نوم ابنك وتشتري ليه سرير جديد بشكل شخصيته المفضلة ومعاها ديكورات مناسبة زي الستاير والبراويز وديكورات الحائط ولو ابنك رياضي وبيلعب رياضة معينة زي كرة القدم ممكن بردو تعملي السرير بخلفية على شكل لعبته المفضلة.
التعليق باستخدام حساب فيس بوك