الذكاء نعمة من نعم ربنا، هبة مالناش يد فيها، لكن الشاطر هو اللي يعرف يستغلها صح ويحولها لمهارة يستخدمها في حياته. ودي حاجة كلنا بنركز فيها مع أطفالنا من وهم صغيرين، طيب هل فيه علاقة بين ذكاء الأطفال والمذاكرة؟ ياللا نشوف كده. كتير مننا بيحبط جدًا لما يلاحظ إن حد من ولاده عنده نسبة ذكاء عالية ولكن مش بيستغلها صح، بنحس إننا دايمًا مستخسرينهم في قلة المذاكرة دي.
طرق تساعد الأطفال على استغلال الذكاء للتركيز في المذاكرة
- أول حاجة إننا نخلّي توقعاتنا منطقية وواقعية، لأن زي ما الذكاء هدية من ربنا، فالاجتهاد ده مهارة محتاجة إن الطفل يتمرن عليها ومحتاجة مننا دعم ومحاولات كتير.
- نقبل إن طريقة مذاكرة الأطفال مختلفة وإن ابني الحركي أكيد مش هيذاكر زي ابني الحسي وإن شكل المذاكرة التقليدي بتاع زمان اختلف كتير.
- أوقات من كتر ما احنا شايفين هدف واحد قدامنا وهو الدراسة، بنفضل نضغط على ولادنا واحنا مش حاسين، مع إن في نفس الوقت ممكن جدا نستغل ذكاء ولادنا ده في مواهب تانية. مش لازم ذكاء الأطفال والمذاكرة يبقوا هما الهدف الوحيد لاستخدام الذكاء ده.
- اتفقوا سوا على قواعد المذاكرة وعلى جدول الطفل يحطه بنفسه واتفقوا كمان على عواقب منطقية لكسر الاتفاقات دي، مع مراعاة إنك تدي للطفل فرصة يتحرك لو محتاج ده وهو بيذاكر.
- ما تحسسيش الطفل إن المذاكرة دي حاجة تخصك انتي وباباه وإنك متوترة علطول بسببها، لأن في النهاية الطفل طول ما هو حاسس إن ده مسؤولية غيره وإن ماما هتشرح لي\هتساعدني بيكون معتمد بنسبة كبيرة على كده ومش بيبذل مجهود كفاية.
- شجعي طفلك دايمًا على المجهود مش على النتيجة، حتى لو شايفة إن مش ده المجهود الكفاية اللي مفروض يعمله بس لو فيه تقدم بنسبة بسيطة لازم تساعديه يشوفها عشان يصدق إن اجتهاده بيفرق مش كفاية ذكاؤه.
- والأهم من ده كله إنك ما تفضليش تشكري في الطفل إنه أذكي واحد في الدنيا أو “إنت ذكي جدًا لو بس ذاكرت شوية”، لإننا اتفقنا قبل كده إن الذكاء مش كفاية ده غير إنه شيء نسبي ما يقدرش يعتمد عليه لوحده كفرصة للنجاح.
- دوري على طرق مبتكرة للمذاكرة زي إنه يربط حاجة محتاجة يحفظها بحدث معين، نستخدم الفلوس والشرا في تقوية الحساب عنده.
What’s your Reaction?
التعليق باستخدام حساب فيس بوك