محتويات المقال
من أكتر المشاكل المزعجة والمحرجة سواءً للشخص نفسه، أو اللي حواليه هي رائحة الفم غير المقبولة. تقريبًا كلنا بشكل أو بآخر واجهنا موقف زي ده قبل كده. المشكلة دي شائعة عمومًا، وأوقات عدم معرفة السبب الحقيقي ليها بيخلي إن أي تصرف للتخلص منها مش بيجيب النتيجة المطلوبة. علشان كده، لازم تعرفي إن المشكلة ممكن تتواجد في واحدة من الأماكن اللي هاقول لك عليها دي أو فيهم كلهم وهم:
- الفم
- الجيوب الأنفية
- المعدة
- كل ما سبق
واحد من الأماكن دي قد يكون المتهم أو هم التلاتة مع بعض يكونوا شركاء في الجريمة دي ضدك. اللي بيسبب الرائحة الكريهة دايمًا نوع من أنواع البكتيريا اللي بتصنف علميًا إنها بكتريا لاهوائية anaerobic bacteria. بمعنى إنها بتنمو وتتكاثر في الأماكن المغلقة ضعيفة التهوية والإضاءة. وأعتقد مفيش أحسن من الأماكن اللي قلنا عليها دول. علشان كده، هنقسم كلامنا على الأجزاء التلاتة، وأقول لك ازاي هتحتاجي تعملي برنامج رعاية صحي متكامل ليكي هيساعدك على التخلص من المشكلة السخيفة دي.
الفم
- لازم نغسل سنانكم بالفرشاة والمعجون مرتين في اليوم. النصيحة دي حقيقية وصحية وفي غاية الأهمية، مهما كان سبب رائحة الفم، الإجراء ده لا يمكن تتخلي عنه.
- تنظيف اللسان: اللسان برضه لازم يتنضف، بس تنظيف اللسان له طريقة معينة:
أولًا: لما تيجي تغسلي لسانك بفرشة الأسنان، لازم تكون حركة الفرشة من الداخل للخارج بخط مستقيم، يعني مش بالفرك لإن ده بينشر البكتيريا.
ثانيًا: استخدمي خيوط تنضيف الأسنان إنك تكحتي الطبقة الخارجية للسان. الطريقة دي بتخلصك مع الوقت من البيئة الخصبة للبكتيريا اللاهوائية دي.
ثالثًا: فيه أداة مخصصة لتنضيف اللسان شبيهة بفرشاة الأسنان بس بتستخدم للسان. لو صعب عليكي توفيرها، هاتي معلقة ونضفي اللسان بنفس طريقة من الداخل للخارج مش العكس ولا عن طريق الفرك، وهتحصلي على نفس النتيجة. - الإجراء التاني اللي هتلتزمي به هو استخدام غسول للفم خالي من الكحول، ولازم تتأكدى من خلوه من الكحول لأن الكحول بيسبب جفاف، والجفاف يعتبر أعظم بيئة لنمو البكتريا دي.
- لازم تشربي مياه. حافظي على إن جسمك كله يكون بعيد كل البعد عن الجفاف. دي الخطوة الأساسية لمواجهة مشاكل صحية لا حصر لها. ما تسمحيش إن جسمك يكون بيئة خصبة لبكتيريا من خلال الجفاف.
- استخدمي التفاح والمكسرات والخضروات النية في نظامك الغذائي. والسبب إن العناصر دي خشونة سطحها بتساعد على كحت سطح الفم كله وبالتالي منع استقرار البكتيريا على السطح الداخلي للفم، وبالتالي المساعدة على التخلص من المشكلة.
- لو كنتي بتعاني من أي مرض مناعي خاص باللِوز، هتحتاجي تراجعي طبيبك دايمًا لإزالة نوع من الأجزاء الصفرا الصلبة اللي بتتكون في الفم من البكتريا اللاهوائية.
المعدة
- لازم تاكلي زبادي يوميًا. الزبادي يعتبر أفضل مصدر طبيعي للبكتيريا النافعة اللي بتحتاجها الأمعاء سواء الدقيقة أو الغليظة علشان تؤدي وظيفتها. وأفضل مقاوم للبكتيريا الضارة اللي بتسبب مشاكل سخيفة جدًا للشخص.
- اتبعي نظام غذائي قليل النشويات عديم السكريات. عمرك فكرتي إن النشويات بأنواعها مع السكريات بتعتبر أفضل غذاء بيساعد البكتريا اللاهوائية على التكاثر؟ علشان كده، اتباع النظام الغذائي بالسمات دي هيساعدك كتير.
- اشربي مياه دايمًا.
- كلي بانتظام: ما توصليش جسمك للجوع. اتغذي باستمرار لإن ده بيساعد على رفع قوة جهازك المناعي وبالتالي التخلص من أي بكتيريا ضارة.
- امضغي لبان خالي من السكر. مضغك للبان بيحفز الغدد اللعابية على إفراز اللعاب اللي مش بس له دور في مقاومة البكتيريا إنما كمان على تحسين وظيفة الهضم في المعدة.
الجيوب الأنفية
- في حالة إنك لاحظتي انسداد مستمر في أنفك أو وجود إفرازات صفراء أو بيميل لونها للأصفر، اعرفي إن عندك عدوى بكتيرية.
- ممكن تعملي خليط من كوباية مياه دافية متدوب فيها ملح، ويفضل يكون ملح الهملايا الصخري أو ملح الطعام. وبستخدم سرنجة منزوعة السن، وتستخدميها في إدخال السائل ده في الأنف. وبعد كده تخرجيه من أنفك عن طريق الزفير القوي. الطريقة دي ليها مفعول جيد جدًا في تنظيف مجرى الهواء عندك وتخفيف احتقان الجيوب الأنفية.
- لو ما حسيتيش بأي تحسن هتحتاجي بالضرورة مراجعة طبيبك بدون تأخير.
قولي لي لو النصائح ديه نفعتك ؟
وصفات طبيعية للقضاء على رائحة الفم الكريهة
التعليق باستخدام حساب فيس بوك