في رحلة الرضاعة الطبيعية الأم بتقابل بعض العقبات، بس أغلبها ينفع التغلب عليه بسهولة، ومن مشاكل الرضاعة الطبيعية اللي بتضايق الأمهات، مشكلة رائحة لبن الأم لما بيتسرب أو تنزل منه نقط على الملابس أو الجسم، وفي المقال ده هنقولك على 5 نصايح للتخلص من رائحة لبن الرضاعة الطبيعية من الملابس والجسم:
ليه لبن الرضاعة الطبيعية بيعمل ريحة غير محبببة؟
لإن لبن الأم غني بالفيتامينات والبروتينات والدهون، والعناصر الطبيعية دي كلها بتتسبب في ريحة كريهة لو ما اتغسلتش كويس، وممكن تسبب بقع صعب إزالتها من على الملابس.
التخلص من رائحة لبن الرضاعة الطبيبعة من الملابس والجسم للأم
1. النضافة الشخصية
ودي الحل السحري لمشاكل كتير، لإن الاستحمام بالمياه والصابون يوميًا مرة على الأقل، هيساعدك جدًا في إزالة أي روائح غير مرغوبة من جسمك، ومع فترة الرضاعة الطبيعية هتحتاجي تستحمي أكتر من مرة لإزالة آثار اللبن من جسمك، ولو ما قدرتيش لأي سبب تستحمي بالمياه والصابون، تقدري تمسحي رقبتك ومنطقة الصدر بالمناديل المعطرة أول بأول بعد كل رضعة لطفلك.
2. اختيار الملابس المناسبة
ودي من الحاجات المهمة جدًا في تجنب الروائح الكريهة في فترة الرضاعة، والاختيار ده بينقسم لـ 3 حاجات: خامات الملابس وستايلها ومقاساتها:
- خامات الملابس: اختاري الملابس القطنية، حتى لو انتي في فصل الشتاء ابعدي عن القطيفة والخامات الصناعية، لإن كل النسيج الصناعي بيزود من الرائحة الكريهة لما بيحتك بنقاط اللبن والجسم، على عكس القطن تمامًا.
- ستايل الملابس: اختاري ملابس خاصة بالرضاعة، زي حمالات الصدر اللي الكب بتاعها بيتفتح للرضاعة الطيعية، والبلوزات اللي فيها زراير أو سوسته، لإن ده بيساعدك أكتر في التحكم في عملية الرضاعة بدون ما يتسرب منها حليب على ملابسك وجسمك.
- مقاسات الملابس: وخصوصًا مقاس حمالة الصدر، لإن لو الملابس ضغطت على الثدي لوقت طويل، هيحصل تسرب للحليب.
3. استخدمي Pads خاصة بالرضاعة الطبيعية
ودي حل ممتاز لمشكلة تسرب الحليب من الثدي، وخصوصًا لو هتقضي وقت طويل مش هترضعي طفلك، زي لو برا البيت أو لو الطفل مش موجود معاكي عدد ساعات معينة، والـ Pads دي متوفرة في الصيدليات ومحلات الأطفال والأمهات.
ودي قائمة تحضير شنطة الرضاعة الطبيعية
نصائح للتخلص من رائحة لبن الرضاعة الطبيعية للطفل
1. النضافة الشخصية للبيبي
الاستحمام اليومي للبيبي مهم جدًا، مش علشان ريحة اللبن بس، لكن علشان تجنبيه الالتهاب الجلدية، وعلشان هيمر بفترات في اليوم محتاج فيها انتعاش، وتغيير الملابس لوحده مش كفاية، ولو لأي سبب مش هتقدري تحميه، فلازم تمسحي له جسمه بمناديل معطرة خاصة بالأطفال، وخصوصًا منطقة تنيات رقبته وورا ودنه، لإن دي المنطقة اللي بينزل فيها اللبن وهو بيرضع، وطبعًا لازم تغيري له ملابسه والبافته بتاعته أول بأول.
2. طريقة الرضاعة الطبيعية
مهم جدًا يكون البيبي بيعرف يرضع كويس من صدرك،لإن لو في تسرب في الحليب من بين ثديك وفم البيبي أثناء الرضاعة، فده معناه إن طريقة الرضاعة فيها مشكلة، وده مشكلته مش بس في تسرب اللبن وتغير الرائحة، لكن مشكلته الأكبر في آلام حلمات الثدي، والوضع الصحيح للرضاعة الطبيعية إن البيبي يكون متحكم بشكل كامل في الحلمة، واللبن بينزل بشكل متتابع وسلس.
ودي أوضاع الرضاعة الطبيعية الصحيحة بالصور
مع تمنياتنا ليكي ولطفلك برحلة رضاعة طبيعية ناجحة وسعيدة.
التعليق باستخدام حساب فيس بوك