محتويات المقال
من الكتب المميزة عن الانفصال اللي شفناها في معرض الكتاب الأخير كتاب “بعد ما سبنا بعض” وإللي بيتكلم عن خطوات عملية للتعامل مع وجع الانفصال.. الكتاب حقق عدة طبعات في وقت قصير جدًا علشان كدة كان لازم نتكلم مع مؤلفته رانيا شكري في حوار سريع..
يلا بينا!
كتاب بعد ما سبنا بعض
عرفينا على نفسك
أنا رانيا شكري، باشتغل في مجال الاستشارات النفسية ومعالجة بالعلاج المعرفي السلوكي والمخططات المعرفية. كتبت أخيرًا أول كتبي “بعد ما سبنا بعض” عن الانفصال العاطفي وحاليًا باقدم جلسات فردية وجماعية في الاستشارات النفسية. وأنا كمان أم لبنتين وولد.
قولي لنا نبذة عن كتابك الأول
الكتاب بيتناول موضوع الانفصال العاطفي بين الراجل والست. بيبدأ من أول مرحلة بيمر بيها الإنسان بعد الانفصال على طول، ودي بتبقى أصعب مرحلة لأنها مليانة بالمشاعر المختلطة. وبعدين بياخدنا الكتاب على الأبعاد النفسية اللي ممكن تكون سبب في الانفصال وفشل العلاقة وبتخلص رحلة الكتاب على مرحلة ما بعد التعافي وبنفهم فيها العوامل الأساسية للعلاقة الصحية وامتى الشخص يفهم إنه تعافى ويقدر يرتبط من جديد.
إيه المختلف في كتابك عن الكتب التانية اللي اتكتبت عن الانفصال؟
قبل ما اكتب الكتاب، عملت بحث عن معظم الكتب اللي اتكتبت في مجتمعاتنا العربية عن الانفصال ولقيت كتب رائعة ومفيدة جدًا بس لقيت إن الجزء العملي الخاص بتجاوز المحنة دي مش مذكور بطريقة مفصلة. ومن واقع خبرتي مع العملاء عندي في مجال الاستشارات، لقيت إن معظمهم بيبقوا محتاجين خطوات عملية يتبعوها علشان يتجاوزوا الألم الخاص بالتجربة دي. وده خلاني أحب أركز أكتر على الجزء العملي في الكتاب عن طريق وضع خطوات محددة ممكن الشخص يعملها في كل مرحله علشان تسهل عليه.
ليه اخترتي يكون كتابك الأول عن الانفصال؟
اللي شجعني إني أبدأ بالانفصال كموضوع لكتابي الأول هو إننا في مصر عندنا زيادة كبيرة جدًا في نسبة الطلاق والانفصال، وزي ما قلت قبل كده إن عدد كبير من الحالات اللي باتعامل معاها في الاستشارات بييجوا بسبب عدم قدرتهم على التعامل مع ألم الانفصال، وعدد آخر مش قليل ممكن يفضلوا مكملين في علاقات مؤذية ليهم بسبب خوفهم من الخضوع للتجربة دي. وده خلاني اتشجع إني أكتب الكتاب علشان أقدر أساعد أكبر كم من الناس.
إيه أصعب حاجة واجهتك وانتي بتكتبي الكتاب؟
بما إنه كتابي الأول، فأكيد أخدت وقت شوية علشان أتغلب على رهبة الكتابة، ورغم إني باكتب على صفحتي الشخصية، إلا إن كتابة كتاب من الألف إلى الياء تجربة مختلفة، ده غير إني كنت حريصة جدًا على مصداقية المصادر اللي باستقي منها بعض المعلومات المذكورة في الكتاب، وده أخد وقت. غير كده أنا حقيقي استمتعت بوقتي وأنا باكتبه واستفدت على المستوى الشخصي من التجربة.
كتاب بعد ما سبنا بعض
ليه أغلب قراءك من السيدات؟
أنا طبعًا ما رصدتش أعداد السيدات بالمقارنة بالرجال اللي بيقروا لي، بس عمومًا السيدات يعتبروا أغلبية في مجالات تطوير الذات ومعظم عملائي من السيدات واعتقد إن ده حال المجتمع لأن وجهة نظري إن الرجال بيتربوا وهم محصورين في دور الشخص اللي مش مسموح له يعبر عن مشاعره والمجتمع أو غالبيته ما بيتقبلوش ده وبيعتبروه ضعف شخصية أو قلة حيلة منه.
تقولي إيه لأي أم بتفكر تنفصل عن شريك حياتها؟
نصيحتي لأي أم بتفكر في الانفصال إنها تاخد وقتها في التفكير، وكمان تكون متاكدة إنها عملت المجهود اللازم في إصلاح العلاقة لأن القرار ما يخصهاش لوحدها، لكن كمان له تأثير على الأبناء. محتاجة تقيم الموقف كويس من جميع الاتجاهات قبل ما تاخد القرار بإنهاء العلاقة.
وأخيرًا يا رانيا، إيه اللي بيحصل بعد ما بنسيب بعض؟
اللي بيحصل معتمد بنسبة كبيرة على الشخص ودرجة وعيه ومرونته النفسية. ممكن شخص يشوفها نهاية العالم وينسحب تمامًا من الحياة ويعيش في دور الضحية أو يقرر إن الحياه وقفت عليه وشخص تاني يشوفها فرصة جديدة، ويتعلم من الدرس ويتفادى الأخطاء اللي وقع فيها في علاقاته المستقبلية.
التعليق باستخدام حساب فيس بوك