أمهات كتير بتحس إن شكل جسمها إتغير كتير خصوصًا بعد الولادة لو فيه وزن زايد لسه مخسرتوش وبتحاول تدور على نظام غذائي صحي لحرق الدهون والتخسيس، وفى الفترة الأخيرة إنتشر في مصر موضوع رجيم الكيتو وفى المقال ده هنعرفك أكتر عن ما هو نظام الكيتو.
إيه فكرة رجيم الكيتو وفوايده؟
نظام الكيتو بيعتمد اعتماد أساسي على زيادة نسبة الدهون كمصدر للطاقة وتقليل نسبة الكربوهيدرات أو النشويات جدًا وطبعاً النسب بتختلف بحسب آراء الدكاترة و حسب حالة كل شخص وبما أن النشويات تعتبر مصدر طاقة ونسبتها بتكون قليلة أوى فى الرجيم ده، فالجسم بيبتدي يلجأ للدهون المخزنة كمصدر للطاقة والعملية دي بتساعد جدًا على حرق الدهون و فقدان الوزن بصورة ملحوظة وبعض الدراسات أظهرت إن فوائد رجيم الكيتو انه ليه فعالية فى تحسين ضغط الدم ونسب الكوليسترول والسكر فى الدم؛ و فى دراسة تانية أثبتت أن تقليل السكريات بيساعد على تقليل حب الشباب.
المسموح بيه في نظام الكيتو
بما أن الكيتو دايت بيعتمد على الدهون بنسبة كبيرة، فالدهون الصحية ممكن نلاقيها فى:
- اللحوم الحمراء مصدر للبروتين والدهون الصحية زي: اللحم البقري، الفراخ، الأسماك اللي بتحتوى على الأوميجا 3 زي السلمون والسردين و الماكريل.
- الجبن اللي بتحتوي على نسبة دسم عالي زي الشيدر، الموتزاريلا، الجبنة الكريمي، الجبنة الفيتا.
- المكسرات زي اللوز والفول السوداني مع مراعاة إن بيبقى فيهم نسبة من الكربوهيدرات ولازم تتحسب.
- الخضروات وخاصة الورقيات والخضروات المنخفضة الكربوهيدرات زي السبانخ و القرنبيط.
- الشاي والقهوة بدون إستخدام سكر أو عسل للتحلية و يمكن إستخدام أنوع معينة من السكر بيكون مسموح بيها زي ستيفيا.
- البيض.
- كريمة الطهي والقشطة.
اعرفي هنا لمتبعي الرجيم .. اعرفي السعرات الحرارية لأشهر الأكلات
الممنوعات فى نظام الكيتو
- السكريات والفواكه بجميع أنواعها ولكن مسموح بنسبة محدودة من الفراولة أو التوت.
- الفواكه المجففة.
- النشويات زي العيش والمكرونة والأرز.
- البقوليات زي العدس والحمص والفاصوليا.
- الدهون غير الصحية زي الزيوت النباتية والمهدرجة.
- المنتجات المصنعة والمنزوعة الدسم.
أضرار رجيم الكيتو وبعض الأعراض الجانبية
بما إن الجسم إبتدى يعتمد على الدهون كمصدر طاقة بديل فممكن يعمل أعراض جانبية وأضرار زي:
- الارهاق الشديد فى الفترة الأولى بس لأن الجسم بيحاول يتأقلم على مصدر الطاقة البديل.
- عسر الهضم والأمساك عند بعض الناس نظراً لقلة الألياف.
- إجهاد الكلى والحصوات لأن زيادة نسبة الدهون بتعلي من نسبة اليوريك اسيد وبتخلي الجسم عرضة للحصوات علشان كدة ممكن نوقف كيتو كل فترة لما نحقق نتايج ونعمل Refeed ونرجع تاني.
- إرتفاع نسبة الكوليسترول في الدم نظراً للاعتماد الكلي على الدهون.
وفي النهاية حبينا نقولك إن نظام الكيتو زي أى نظام غذائي ليه فوايد وليه أضرار و واحنا بننصحك تستشيرى الدكتور الخاص بيكي قبل ما تبدأي رجيم الكيتو و لو بدأتي إحكيلنا خسيتي وزن قد إيه.
المصدر:
التعليق باستخدام حساب فيس بوك