امبارح أستاذ بدوي علّام رئيس جمعية المدارس الخاصة قال تصريح في مكالمة تليفون على قناة DMC بخصوص مصاريف السنة الجاية وبخصوص مطالبة الأهالي بتقليل المصاريف، وصرّح إن الأهل اللي مش هيقدروا يدفعوا المصاريف هيتم فصل ولادهم وهيتحولوا لمدارس حكومية!
رسالة من أم
من أم حياتها اتأثرت جدًا زي أمهات كتير بعد أزمة كورونا، رسالتي النهارده لأستاذ بدوي ولأغلب أصحاب المدارس الإنترناشونال والخاصة، من أم شايفة حواليها وفي دايرتها الصغيرة كمية الأهالي اللي أشغالها وقعت ودخلها وقف!
حضرتك بتقول إنكم وفيتوا التزاماتكم السنة اللي فاتت ودفعتوا ضرايب ومرتبات، أحب أقول لحضرتك كلنا عملنا كده واتحملنا الخسارة وأي إنسان عنده بيزنس خاص وعنده إحساس بالمسؤولية وتقدير للناس اللي شغالة معاه عمل كده! فاسمح لنا ده مش مبرر تطلبوا مننا مصاريف وبالزيادة كمان بدون تقديم خدمة مناسبة قصادها.
حضرتك قررت إنكم قدمتوا لولادنا خدمة بالفلوس اللي دفعناها وهي التعليم الأونلاين! خدمة إيه حضرتك اللي بتتكلم عنها والطفل اللي كان بيقعد في المدرسة أكتر من 6 ساعات بقى يتقدم له في البيت ساعة أو ساعتين بالكتير نصهم ضايع وده متوقع لإنه جديد علينا كلنا ما قلناش حاجة لكن ده خدمة لا تكافيء المبالغ المدفوعة، طالب إيه اللي حضرتك متأكد إنه أخد حقه ومعظم المدارس الخاصة أصلًا موقفة التعليم الأونلاين من شهرين!
احنا دفعنا السنة اللي فاتت مصاريف السنة كاملة واخدنا مقابلها نص سنة تقريبًا! وفي المقابل حضراتكم وفرتوا فلوس الأنشطة اللي بتتقدم لولادنا، فلوس الكهربا وفلوس الورق وأي مصاريف كانت بتطلع في وجود ولادنا في المدرسة وقلنا ده وضع مفاجيء وظرف استثنائي.
طيب بلاش، فلوس الباص اللي حضراتكم أخدتوها السنة اللي فاتت كاملة ومدارس كتير جدًا رفضت استرجاعها بدون أي وجه حق وبدون مقابل! والجميل إنهم بيطلبوها تاني السنة دي بمنتهي الأريحية.
احنا عيشنا سنين وسنين بنوفي كامل التزامتنا وبنقبل الزيادة الهيستيرية في المصاريف عشان حلم بسيط بنحلمه لولادنا، إنهم يتعلموا أحسن ويعيشوا ويكبروا وسط أصحاب عمرهم.
حقنا دلوقتي كأولياء أمور تشيلوا معانا جزء من عواقب الأزمة وتقللوا مصاريف الوقت اللي هندرسه من بيوتنا، لكن حضرتك تيجي دلوقتي تهددنا وتقول لنا كإننا عايشين في كوكب تاني لو معترضين ومش هتدفعوا المصاريف ولادكم هيتحولوا حكومي وتجريبي! بغض النظر عن نفسية ولادنا وعن الظروف اللي مش بإيدينا وعن حقنا في تعليم وخدمة مقابل شقانا وتعبنا! بمنتهي البساطة حضرتك وأصحاب المدارس تقرروا فصل الممتنعين!
لولا اولياء الأمور اللي ربنا عالم بيهم بيقضوا السنة ازاي عشان مصاريف المدارس ما كانش هيكون ليكم بيزنس خاص ناجح بينا قبل ما يكون بيكم، كلنا في مركب واحدة فأتمنى تراجعوا قرارتكم وتبصوا على المركب من الجهة اللي احنا واقفين فيها.
تنويه:
المقال ده يعتبر مقال رأي ويمثل رأي الكاتبة الشخصي ولا يمثل بالضرورة رأي راحة بالي.. إحنا بنحترم جدًا الكتابة الذاتية وبنشجع الأمهات في التعبير عن رغباتهم ومظالبهم.
التعليق باستخدام حساب فيس بوك