محتويات المقال
في السنين الأخيرة، طلعت صيحة في عالم التجميل اسمها المايكروبليدنج Microblading يشبه تاتو الحواجب في الفكرة لكن الحقيقة إنهم مختلفين. في المقال ده، هنكلمك عن الفروق بين تاتو الحواجب والمايكروبليدنج عشان تقرري إيه في الاختيارين أحسن أو أليق عليكي. بس الأول لازم نعرف إيه هو المايكروبليدنج وإيه هو تاتو الحواجب.
تاتو الحواجب
تاتو الحواجب أو وشم الحواجب هو الطريقة الأقدم لرسم شكل ثابت للحواجب. وهو ببساطة وشم زي أي وشم لكن في منطقة الحواجب. وطريقة عمل تاتو الحواجب هي إن إبر بتدخل بحبر جوا الجلد تحقن الحبر ده جوا الجلد فيتغير لونه.
مايكروبليدنج الحواجب Microblading
المايكروبليدنج هو كمان بيستخدم الإبر لكن دخول الحقنة ما بيكونش بعمق حقنة الوشم، وكمان ما بيكونش فيه حبر، بيكون فيه بس صبغة.
الفرق الأول: الشكل
تاتو الحواجب بيكون شكله واضح جدًا إنه مرسوم أو موشوم، لأن الشكل بيكون بس رسمة الحاجب اللي انتي بتختاريها وبتكون كلها رسمة واحدة، إنما رسمة المايكروبليدنج بتكون أشبه بتاتو حواجب شعرة شعرة، فبيكون شكله طبيعي أكتر وصعب تفرقيه عن الحقيقي.
الفرق التاني: المدة
عشان المايكروبليدنج بيتعمل بصبغة مش بحبر وعشان بيتحقن في طبقة سطحية أكتر من الوشم، فعمره بيكون أقصر. في الوقت اللي الوشم بيكون فيه مدى الحياة، مايكروبليدنج الحواجب بيستمر من سنة لتلات سنين على حسب دقة الحقن وجودة الصبغة. وده معناه إن الشكل اللي هتختاريه في رسم حواجبك تاتو، هو الشكل اللي هيفضل معاكي على طول مهما غيرتي رأيك فيه.
الفرق التالت: الصبغة والحبر
الصبغة المستخدمة في المايكروبليدنج مصنعة مخصوص إنها لما لونها يتغير مع الوقت، يفضل لونها درجة أفتح من نفس اللون، أما الحبر فلما بيقدم على الجلد بتتحول حروفه للون الأزرق أو الأخضر وده بيكون شكله وحش مع الوقت.
الفرق الرابع: الألم
مش محتاجين نقول أنهي في الاتنين هتتعرضي فيه لألم أكبر، طبعًا تاتو الحواجب! اختراق الإبر لدرجة أعمق من الجلد وبالذات في الوش وفي منطقة محيطة بالعينين بيخلي الألم أكبر. أما المايكروبليدنج فعشان سطحي أكتر الوجع بيكون أشبه بوجع النتف.
الفرق الخامس: الجروح
تاتو الحواجب بيعرض الوش للجروح بدرجة أكبر من المايكروبليدنج، خصوصًا إن الوشم ممكن يخلي دم ينزل مكانه.
التعليق باستخدام حساب فيس بوك