فكرة ظهور الحشرات في البيت من أكتر الأمور المزعجة فعلًا، وبتسبب مش بس أذى نفسي وإنما بيكون فيها تهديد جسدي على اللي قاعدين في البيت، وده بيخلي كتير مننا يفكر دايمًا إنه يعمل وقاية منها أو لو حصلت الإصابة إزاي يقدر يعالجها ويتخلص من وجود الحشرات دي في البيت، هنتكلم هنا مع بعض عن المبيدات وأنواعها وازاي نستخدمها ونحذر من إيه أثناء رشها في البيت.
إيه هي المبيدات الحشرية؟
المبيدات الحشرية هي مركبات كيميائية مفعولها سُمِّي قادر على قتل الحشرات، والمبيدات بتتواجد في عدة أنواع وصور، وكل نوع له آليات مختلفة في مكافحة وقتل الحشرات، وفي العموم بتكون المركبات دي إما مستخلصة من مواد عضوية طبيعية أو مصنعة، وإما من المركبات الكلورينية العضوية، أو الهيدروكربونات المكلورة، أو من الزيوت خصوصًا البترولية.
إيه هي أنواع المبيدات الحشرية وآلية عملها؟
طرق مكافحة الحشرات بتختلف حسب نوع الحشرة المستهدف مقاومتها، لكن في العموم أنواع المبيدات الحشرة بتنحصر آلية عملها في الصور التالية:
- السموم المِعدية: وهي عبارة عن مركبات كيميائية بتقتل الحشرات من خلال تناولها عبر الفم، وبتنتقل إلى جهازها الهضمي وبالتالي بتقضي عليها. النوع ده من السموم بيفضل استخدامه للقضاء على القوارض والخنافس.
- سموم بالملامسة: تأثير النوع ده من السموم بيبدأ بمجرد ملامستها لجسم الحشرة، فهي بتدخل من خلال قشرتها الخارجية إلى دمها وتقتلها، أو ممكن تصيب الفتحات التنفسية وتضر بالجهاز التنفسي للحشرة فتقضي عليها. وغالبًا ما يتم إنتاجها من مواد عضوية مفعولها قوي زي: النيكوتين، والبيرثرينات، وتستخدم لمكافحة الحشرات الماصة.
- سموم غازية: هي سموم تدخل إلى جسم الحشرة من خلال الفتحات التنفسية لها والقصبات الهوائية، لتضر بها وتقتلها.
ازاي تختاري المبيدات الحشرية المنزلية؟
فيه مجموعة من النصائح مهم تاخديها بعين الاعتبار لما تقرري تختاري مبيد الحشرات المنزلي زي مثلًا:
- تحديد نوع الحشرة اللي عايزة تكافحيها لتحديد النوع الأنسب من المبيدات، فمثلًا المبيدات اللي بتقضي على الصراصير مش هتلاقي إنها هتكون فعالة في القضاء على الذباب والناموس.
- اتأكدي من مدى صلاحية المبيد، وتجنبي استخدام المبيدات منتهية الصلاحية.
- لازم اختيارك يقع على مبيدات آمنة على أهل بيتك.
- من الأفضل استخدام مبيد حشري صديق للبيئة لتجنب الأضرار الجانبية له.
- اختاري نوع من المبيد يكون مفعوله قوي ممكن يمتد لأيام علشان يقدر يقضي الحشرات نهائيًا.
- اختاري مبيدات حشرية سهلة الاستخدام علشان تتجنبي وقوع أي حوادث غير متوقعة أثناء استخدامه.
أنواع الحشرات المنزلية اللي بتتم مكافحتها:
فيه أنواع متعددة من الحشرات المنزلية اللي بتتم مكافحتها باستخدام المبيدات الحشرية، ومنها: النمل، والصراصير، والسوس، والبق، والناموس. ولكل نوع طريقة مختلفة في مكافحته، فمثلًا بيتم رش المبيدات الحشرية على الحوائط والزوايا اللي بيستحبى فيها النمل، ده بجانب مسح الأرضيات بمواد خاصة لمكافحته، وطبعا رش المناطق الخارجية المحيطة بالمنزل لمنع وصوله إليه، أما الصراصير فيتم رش جسمها بالمبيدات الحشرية المناسبة لو انتي شايفاه بيتمشى قدامك، أما البيض والمجموعة المستخبية منهم فأحسن طريقة إنك تحطي مادة المبيد الحشري في بالوعات الصرف للتخلص منها، وللقضاء مثلا على السوس اللي يتكاثر في الأثاث الخشبي ويتغذى عليه، بيتم رش مبيدات حشرية مناسبة في الأماكن اللي نخرها وطبعا باقي الأثاث الخشبي المحيط.
نصائح مهم قبل رش المبيدات الحشرية في المنزل:
- الأطفال وكبار السن وكل من يعاني مشاكل بالجهاز التنفسي في المنزللازم يخرجوا منه قبل بدء عملية الرش.
- غطي جميع أنواع الطعام المخزن وحطيه في أماكن مغلقة علشان لا يصل المبيد إليها.
- عند رش المبيد الحشري في المطبخ، ابتعدي عن رش الأواني والأدوات الحلل، وكل ما يستخدم للأكل.
- عملية الرش بتتم من شخص بالغ معندهوش مشكلات صحية، ولازم استخدام واقي للشعر وكمامة للأنف.
- وجهي الرش نحو الأرضيات الحوائط وتجنبي الرش في الهواء لأعلى.
- تخلصي من هدومك اللي كنتي لابساها أثناء للرش، والاستحمام بعد ما تخلصي.
- هوي المنزل أثناء وبعد الانتهاء من عملية رش المبيدات الحشرية.
- نظفي الأسطح اللي اتعرضت للرش باستمرار.
- احفظي المبيدات الحشرية في أماكن بعيدة عن متناول الأطفال، وممنوع حفظ المبيدات السائلة في عبوات العصير أو المياه علشان لا قدر الله يتلخبط فيها الأولاد وتبقى مشكلة كبيرة.
- تخلصي من عبوات المبيدات الحشرية المنتهية نهئي، إياكي تستخدميها في حفظ اي حاجة تانية .
في الآخر لازم تاخدي كل احتياط ممكن لتجنب حدوث أي نوع من أنواع التسمم من المبيدات، ويفضل طبعًا تسيبي البيت مش أقل من 3 ساعات بعد استخدام المبيد، ولو عندك حد من أفراد أسرتك مريض حساسية يبقى الأفضل يبات برا البيت، لو الموضوع صعب ما تتردديش في طلب مساعدة متخصص من شركات مجالها التخلص من الحشرات.
التعليق باستخدام حساب فيس بوك