الشعر الكيرلي عند الأطفال بيبقى له عناية وروتين مختلف تمامًا عن الروتين المعتاد، بعض منتجات الشعر اللي بتستخدم بشكل يومي وبتناسب جميع أنواع الشعر، ممكن ما تكونش مناسبة لطبيعة الشعر ولو عندك بنت أو ولد شعرهم كيرلي هتحتاجي تاخدي في اعتبارك شوية تفاصيل وخطوات صغيرة عشان يطلع شكله لطيف ويفضل بصحة، وعشان كده، هنقول لك في المقال ده، على أفضل روتين شعر كيرلي تعمليه لولادك.
خطوات روتين الشعر الكيرلي للأطفال
روتين الشعر الكيرلي للأطفال
لو انتي من الناس اللي بتحب المنتجات الطبيعية أهم 8 زيوت طبيعية هتحل جميع مشاكل الشعر والبشرة
اختيار الشامبو المناسب لشعر طفلك
طبيعي إنك تختاري لطفلك أحسن شامبو يناسب طبيعة بشرتهم الحساسة، لكن في حالة إن شعر بنتك / ابنك كيرلي، لازم تختاري لهم شامبو خالي من المواد الضارة زي السلفات والصوديوم والبارابين.. وفيه منتجات كتيرة في مصر مناسبة للشعر الكيرلي ممكن تسألي الصيدلي عليها زي شامبو بندولين أو كانتو كيدز Cantu Kids.
عدد مرات غسل الشعر
بعد ما اختارتي الشامبو المناسب، لازم تحددي عدد مرات غسيل الشعر. اغسلي شعر طفلك من مرتين لـ 3 مرات في الأسبوع، بس ما تزوديش عن كده لإن الشعر الكيرلي أحيانًا طبيعته بتميل للجفاف فتجنبي غسيله اليومي.
التجفيف
تجنبي تجفيف الشعر بالمجفف “السيشوار” وجففي الشعر برفق بفوطة من المايكرو فايبر، والفوطة دي ممكن تلاقيها في محلات مستلزمات الشعر أو في محلات المستلزمات الرياضية زي ديكاثلون Decathlon.
شوفي هنا بالصور: أجمد 10 منتجات للشعر الكيرلي في 2020
التسريح
سرحي الشعر وهو رطب باستخدام مشط عريض أو تحت الدش، لكن تجنبي تسريحه وهو جفاف عشان ما يحصلش تقصف ويفضل إن المشط يكون مصنوع من الخشب، وقبل ما تسرحي الشعر، حطي عليه سيرم مخصص للشعر الكيرلي أو الزيوت الطبيعية المناسبة لنوع الشعر زي زيت اللوز أو زيت جوز الهند. ولو فيه أي تشابك، حاولي تفكيه بإيدك وبعدين كرري التسريح بالمشط عشان تضمني إن مفيش أي تشابك.
السكرانش Scrunch
بعد ما خلصتي خطوة تسريح الشعرK اعملي خطوة السكرانش يعني تضغطي على الشعر من تحت لفوق وكرريها كذا مرة.
- حمام الكريم: عشان تحافظي على صحة الشعر ونعومته استخدمي حمامات الكريم لطفلك مرة في الأسبوع سواء الزيوت الطبيعية أو المنتجات المتوفرة في مصر.
هنا جمعنا لك أفضل منتجات للشعر الكيرلي
ودي كانت أهم الخطوات والنصايح عشان تقدري تحافظي على شعر ولادك، شاركينا في كومنت إيه الخطوات اللي بتعمليها وإيه هي المنتجات اللي بتستخدميها.
التعليق باستخدام حساب فيس بوك