محتويات المقال
كتير من السيدات المحجبات بيعانوا من آثار سلبية على شعرهم، وده مش بيكون بسبب الحجاب في حد ذاته ولكن بسبب طريقة التعامل مع الشعر، فلو كانت السيدات غير المحجبات مطلوب لشعرهم عناية معينة، فالعناية دي محتاجة تضاعف للسيدات المحجبات، لإن لبس الحجاب وقت طويل في النهار، بيحجب فيتامين “د” عن فروة الراس والشعر، وده بيسبب ضعف في الشعر وتقصف وتساقط أكتر، مقارنة بالسيدات اللي بيتعرض شعرهم للشمس بنسبة معقولة، وفي المقال ده هنقولك روتين العناية بالشعر للمحجبات:
روتين العناية بالشعر للمحجبات:
-
شامبو الشعر:
استخدمي الشامبو المناسب لطبيعة شعرك، ويُفضل نوعية الشامبوهات اللي بتدي لشعرك كثافة، لإن الحجاب ممكن يدي للشعر مظهر قليل الكثافة.
-
تجفيف الشعر:
جففي شعرك بطرق طبيعية مش بالسشوار أو الحرارة.
-
تعطير الشعر:
عطري شعرك بمعطرات طبيعية، زي الزيوت العطرية، بس أهم حاجة إن يكون بعد جفاف الشعر علشان ريحته متكونش نفاذة، والخطوة دي مهمة لإن لبس الحجاب لفترات طويلة وخصوصًا في الصيف ممكن يسبب روائح غير محببة في الشعر.
-
طريقة لف الشعر تحت الحجاب:
متربطيش شعرك جامد تحت الحجاب، وحاولي في كل فترة تغيري تسريحة شعرك تحت الحجاب، مرة “كحكة” ومرة ضفاير، ومرة تفرقيه من النص، وهكذا.
-
طريقة لبس الحجاب:
حاولي متربطيش الحجاب بشكل قاسي أوي، علشان تسمحي لشعرك يتنفس والهوا يدخل له، وحاولي متلبسيش طبقات حجاب كتير، او تلفي الحجاب أكتر من لفة علشان متقفليش قوي على شعرك.
-
نوع الحجاب:
حاولي متلبسيش الحجاب اللي قماشته من خامات صناعية، البسي الحجاب القطن، أو الحرير الطبيعي، ولو اضطريتي تلبسي من خامات صناعية فممكن تلبسي تحته بندانة قطن.
-
تمشيط الشعر:
مشطي شعرك مرتين في اليوم بمشط واسع، وسيبيه بدون ربط في الوقت اللي انتي موجوده فيه في البيت، واستخدمي مشط واسع، ودلكي فروة شعرك بإيدك بعد التمشيط.
-
العناية بالشعر:
- اعملي ماسكات طبيعية ومغذية لشعرك كل فترة.
- عرضي شعرك للشمس لو متاح ليكي جوا بيتك أو في مكان تقدري تكوني فيه بدون حجاب.
- قصي أطراف شعرك كل فترة.
- غيري في ستايل شعرك كل فترة.
- رطبي شعرك سواء ببلسم وحمام كريم، أو بسيرم وكريمات.
وبنفكرك إنك لو لقيتي أي أعراض غير طبيعية بتحصل لشعرك، زي قشرة الشعر الزايدة، أو التساقط غير الطبيعي، وقتها لازم تستشيري متخصص.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر:
التعليق باستخدام حساب فيس بوك