اتكلمنا قبل كده عن المينيماليزم minimalism أو العيش ببساطة ومن غير كراكيب. وبانصحك فعلًا تتبعي النظام ده في حياتك كلها. ولما تبدأي تطبقي النظام ده، هتلاقي نفسك بتعمليه في كل حاجة بتاخد من وقتك وجهدك، زي السوشيال ميديا وغيرها. وكمان هتبقي عايزة روتين تنظيف البيت بتاعك يكون بسيط وسهل وسريع وminimalist. في المقال ده، هتلاقي بعض النصايح وكمان بعض التوقيتات اللي هتساعدك انتي واللي بيقوموا معاكي بالتنضيف (جوزك وأولادك).
ازاي تقللي وقت تنظيف البيت
- تخلصي من كل الكراكيب.
فيه 6 طرق مختلفة للتخلص من الكراكيب في المقالة دي. أسهلهم تمامًا إنك تتخلصي كل يوم من حاجة مش محتاجاها سواء بالتبرع أو بالتخلص منها، حاجة واحدة كل يوم لمدة شهر أو شهرين هيخلصوكي من 30-60 حاجة شاغلين مساحات ومتطلبين تنضيف وعناية من غير لازمة.
- عيدي تعريف “بيت نظيف”.
بيت نظيف يعني مافيهوش تراب ولا يعني كل حاجة فيه بتبرق؟ البيت اللي كل حاجة فيه بتبرق غالبًا حد غيرك لازم يكون معاكي في المهمة دي، حد يشتغل على ده بشكل دوري أو يومي كمان. وحاجة تانية محتاجة أفكرك بيها، لو انتي أم، صعب يكون البيت بيبرق قوي كده عشان معروف الولاد بيعملوا فينا إيه. عشان كده، عايزاكي تفكري يعني إيه بالنسبة لك
بالفيديو: أكثر من 20 نصيحة للتنظيف هتوفر لك فلوس كتير
روتين تنظيف البيت
- المهام اليومية:
غسيل المواعين – الغسيل – الترويق (وضع الحاجات مكانها الصح) ومسح الأسطح
خلينا نتكلم عن غسيل المواعين: المواعين بتكتر طول ما احنا صاحيين، وبناء عليه، لو كل ما حاجة استعملت، هتقفي تغسليها، هتفضلي طول النهار في المطبخ. يبقى نعمل إيه؟ تقضي نص ساعة في آخر اليوم تمامًا قبل ما كلكم تناموا، تغسلي فيها المواعين.
بس قبل ما تدخلي على الحوض، عدي على الغسالة حطي فيها غسيل اليوم كله، واظبطيها على دورة سريعة. ليه دورة سريعة؟ عشان أولًا انتي بتغسلي كل يوم فمفيش حاجة هتلحق تتوسخ قوي إلا الحاجات اللي هنتكلم عليها في نقطة المهام الأسبوعية. وثانيًا بقى عشان انتي هتشغلي الغسالة، وبعدين هتروحي تغسلي المواعين وبعدين هتروّقي فعقبال ما انتي تخلصي، الغسالة هتخلص، فتنشري وتدخلي تنامي.
بالفيديو: طرق تنظيف وتلميع الفضة في المنزل
الترويق بقى لازم تعرفي إنه مش مهمتك لوحدك. يعني لعب الولاد اللي في كل حتة مسؤولية الولاد، لازم زي ما خرّجوا اللعب من مكانها، يرجعوها مكانها. جوزك اللي كل حاجة من هدومه في مكان، مهمته يحط حاجته في مكانها. زي ما انتي مش بتطلبي منهم يشيلوا شنطتك ويرجعوا كتابك للمكتبة .. إلخ، ما ينفعش تكوني انتي اللي بتروقي مكانهم. واطلبي من كل حد في البيت يكون له فوطة تنضيف صغيرة بتاعة مكانه، فولادك هينضفوا الأسطح اللي في أوضتهم وجوزك هينضف الأسطح اللي في الـliving room وانتي هتنضفي الأسطح اللي في المطبخ وأوضة النوم أو انتي وجوزك تبدلوا، زي ما تتفقوا.
بكده، هتلاقي نفسك كل يوم في آخر اليوم خالص عندك ساعة بالكتير ضايعة على تنظيف وتنظيم البيت وباقي اليوم بتاعك.
- مهام يوم ويوم:
دي ممكن تكون الصبح بدري، وممكن تكون كل يوم أو يوم ويوم، على حسب بيتك وعلى حسب جدولك وطاقتك. ودي بتنقسم إلى:
تنظيف حوض الحمام والتواليت – الكنس – تغيير الملايات
وده بيكون أفضل وقت له قبل الدش على طول، هتصحي من النوم، تغيري ملايات سريرك وسراير الولاد (ممكن يعملوا هم ده) وتنطلقي بالمكنسة في أرجاء البيت (أهه منها تكنس ومنها تشتغل منبه). وآخر حاجة تعدي على الحمام تنضفي الحوض والتواليت (التنضيفة الكبيرة لسه يوم الجمعة). وبعدين تاخدي الشاور الجميل وتنزلي شغلك أو تبدأي يومك لو انتي مش بتشتغلي برا البيت.
- المهام الأسبوعية:
تنفيض الشبابيك والبلكونة – تنظيف الحمام – غسيل الملايات – غسيل الغلي
يوم الجمعة أو السبت هنقضي أطول من ساعة شوية في التنضيف لإننا هننفض الشبابيك والبلكونة الصبح وبعدين نعمل الروتين العادي. واحنا بنحط الغسيل في الغسالة (اللي بيحتاج درجة حرارة عالية)، بننضف الحمام بالحيطان والبانيو. بنخرج ننشر الغسيل وبنستمتع بيوم عائلي لطيف وقبل النوم، بنلم الغسيل ونطبقه.
أتمنى لك جدول مش زحمة وحياة أبسط وأسعد.
مصدر ساعدنا في كتابة المقال
Simply Fiercely
التعليق باستخدام حساب فيس بوك