فاضل أقل من 30 يوم على رمضان 2022، ده أنسب وقت لتنضيف البيت. طبعًا جو تنضيف ليلة العيد اللي بنعمله قبل المناسبات مش بس بيهد الحيل، لكن كمان بيضر الصحة وبيحمّل عليكي بزيادة. وبيخليكي تفتقدي طعم المناسبة من كتر التعب والإرهاق ومش ده المطلوب. واحدة واحدة، كل يوم تنجزي حاجة وعلى رمضان هيكون كل شيء تمام. ده بيتضمن مجموعة من الخطوات اللي بتشمل كل الغرف. عشان نوصل شهر رمضان بإذن الله مع بيت نضيف بدون إرهاق أو تعب. في المقال ده، هاقدم لك دليل كامل ووافي لروتين تنظيف البيت قبل رمضان.
قواعد عامة في تنظيف البيت قبل رمضان
- التنضيف هدفه الأول راحتك النفسية. وإن الأمور تكون أحسن. فمش هتستفيدي حاجة لما تشيلي شيء تقيل يخليكي ترقدي بعدها أسبوع. اشتغلي على قد طاقتك وافتكري دايمًا “لا يكلف الله نفسًا إلا وسعها”.
- هتلاقي مليون روتين تنضيف منهم الروتين اللي هاكتبه دلوقتي. بس افتكري دايمًا إن كل بيت وله خصوصيات وكل حالة غير التانية. لو ظروفك مش مساعداكي تنضفي، اعملي الضروريات الأول ولازم يكون عندك أولويات وافتكري دايمًا ما لا يدرك كله لا يترك كله.
- ورقة وقلم واكتبي كل غرفة فيها إيه لازم يتعمل. وكل يومين تلاتة اعملي غرفة من الحيطه للأرض، للخشب وكله، وأنصحك تخلّصي غرف النوم الأول والمكان اللي بتقعدوا فيه وتقضوا يومكم فيه. بس يوميًا فيه ترويق باقي الشقة، الترويق الروتيني يعني.
- التنضيف نوعين: عميق وسطحي. والهدف خلال الفترات الطويلة إننا نعمل العميق في أوقات محددة. ونحافظ على اللي عملناه بتنضيف سطحي يخلّي الدنيا زي الفل. وعادةً التنضيف بيبدأ من فوق لتحت ومن جوه لبره.
- مفيش تنضيف قبل ما تكوني فطرتي كويس. انتي الأساس، ولو الأساس تعبان، كل حاجة هتقع. كلي كويس واتبسطي وكوباية النسكافيه برواقة وياللا بينا نشوف الروتين المتين.
بالتفصيل: تنظيف البيت قبل رمضان
ستاير وسجاجيد البيت
- من الحاجات اللي فعلًا بتحسس الواحد بالنضافة والنعنشة هو غسيل الستاير والمفارش. اخترت تكون دي أول خطوة في البيت عشان نروّق لنفسنا، ولما يتفرشوا قبل رمضان يكون ليهم زهوة ومعنى.
- هنلم ستاير البيت والمفارش اللي موجودة في كل مكان ونختار برنامج غسيل مناسب في الغسالة. وبعد كده، يتنشروا ويتطبقوا ويتعطروا ويتسابوا في الدولاب بطريقة شيك لحد قبل رمضان بيوم.
- هتبعتي السجاد والمشايات للمغسلة، أو هتستعيني بحد يساعدك. أو لو بتقدري تعمليها، كل اللي هتحتاجيه مقشة نضيفة، وكلوركس ألوان وكومفرت، وصابون سائل، بالخليط ده هنغسل السجاد ونشطفه، وننشره.
أسباب مهمة تخليكي عندك ستائر للصيف وستائر للشتاء
تنظيف غرفة النوم الرئيسية
أول أوضة دايمًا نبدأ بيها، لإنها المكان اللي بترتاحي فيه. وطول ما هو مترتب ومنظم، هتحسي إنك قادرة تنظمي وترتبي باقي الحاجات:
- أول خطوة نعمل السجاد بالمكنسة ونشيله هو وأي مفارش، ما عدا مفرش السرير عشان التراب ما ينزلش على المرتبة.
- نقفل باب الأوضة كويس ونفتح الشباك عشان تتهوى، ونطلع الأغطية تتشمس.
- كل حاجة ظاهرة هتتشال وتتغسل. بعدها هنبدأ نزعف السقف، والشباك يتنضف من التراب، بعدها ننضف فوق الدولاب، ونلمع الدولاب نفسه من بره.
- ننضف النجفة معانا بالمرة، وخلاص كده خلصنا تراب.
قواعد اختيار النجف لديكور المنزل وأنواعه المختلفة
- هنشيل الملاية، ونرش على المرتبة كربوناتو (بيكربونات صودا/صودا الخبز) أو بودرة تلك ونسيبه فترة. في الوقت ده، نلمع وشوش الكهرباء، وأكر الباب وكل حاجة في المكان ما تلمعتش، بما في ذلك أي خشب.
- آخر خطوة: هنشفط الباودر اللي على المرتبة بالمكنسة. ونشيل المرتبة ننضف تحت السرير. وبعدها بنكنس الأرض ونمسحها بضمير.
تنظيف الخشب
- الأدراج: هي أكتر حاجة فوضى تقريبًا لأنها أقرب حاجة بنرمي فيها كل حاجة. لذلك، أول خطوة في تنظيفها بعمق هي فرز اللي فيها. والتأكد إن مفيش شيء زيادة أو مش عاوزينه. لما نفضل الدرج، نلمعه كويس بملمع الخشب وممكن نحط معطر. بعدها بنرص الحاجة بطريقة منظمة سهل نوصل لها. لازم نخلّي بالنا من الأوراق المهمة، تكون متنظمة في دوسيهات بوضوح. الموضوع ده هيخليكي تحتاجي فايلات وأظرف عشان تسهل المهمة واكتبي المحتوى من بره عشان ما تتوهيش وجمعي كل حاجة مع بعضها، شهادات الضمان في فايل، العقود لوحدها، الشهادات، وهكذا. أي ورق مالهوش لازمة، ارميه فورًا. ما تنسيش تستخدمي المنظمات، ولو ما عندكيش ممكن تستعيني بقطع كارتون هتؤدي المهمة.
المينيماليزم.. طريقة سحرية للتخلص من الكراكيب
- الدولاب: هتعدي على رف رف وفي إيدك فوطة للتنظيف وفوطة للتلميع بملمع الخشب ومعطر، وشنطتين واحدة للحاجات اللي هتترمي والتاني للحاجات اللي هتتوزع لو فيه قطعة هدوم مش بتتلبس بنسبة 95% أو بقالكم موسمين ما لبستوهاش يبقى عمرها ما هتتلبس وعاملة دوشة على الفاضي وخلاص.
- من الرفوف اللي فوق لتحت، نفضّي الرف ونلمعه ونعطره ونرجع نفرشه، نرتب ونعدل محتواه، سواءً مفروشات أو ملابس أو شنط، نظبط الألوان مع بعض. وفي النهاية، هتعطري الدولاب بفواحة أو مكعب مسك أو علبة صغيرة فيها كومفرت مركز أو ورد مجفف، حسب ذوقك. الكلام ده مفروض يخلص خلال ساعة لساعتين بالكتير. دايمًا اظبطي منبه عشان الوقت ما يسرقكيش.
تنظيف غرفة الأطفال وباقي الغرف
الكلام اللي فوق ده ينطبق على الغرف الباقية. لكن في غرفة الأطفال، أول خطوة هي فرز اللعب، وترتيب الدواليب ووحدات التخزين.
5 طرق مبتكرة لـ تخزين الملابس في الدولاب
النثريات
في تفاصيل كتير في البيت بتفوت علينا باعتبرها من النثريات. دي في رأيي يتخصص لها بند نضافة لوحدها وننطلق فيها: ديكورات الشقة كلها بتحتاج تتنضف كويس. لو في شجر أو زرع صناعي محتاج غسلة محترمة في البانيو ويتساب يتصفى. سجاد الشقة يتنضف على الجاف أو بمياه أو يروح المغسلة. اغطية الكنب والسراير “الكوفر” يتغسل غسلة محترمة. البقعة الصغيرة على الحيطان تتنضف بوايبس، الحيطان، الكتب والمكتبات لو عندك أكتر من مكتبة في شقتك.
تنظيف غرفة المعيشة
تنضيف غرفة الليفينج أو المعيشة من الحاجات اللي هتحتاجي تعيدي عليها كل شوية ويفضل إنها تكون قرب النهاية.
- هنفتح الشباك نهوّي المكان ونجمع كل الديكورات والأباجورات والزينة والورد فى بوكس.
- طبعًا السجاد اتلم واتكنس واتغسل واتكيس، وهنا بقى نبدأ من فوق لتحت، السقف بالحوائط، كله يتلمع ومعانا التكييف.
- بالمكنسة ناخد كل الأركان حتى الكنب واللي تحت الشلت. كل الزوايا يتشفط منها التراب كويس.
- بعد كده، هنلمع المقابض ووشوش الكهربا والتابلوهات والساعة، ونبدأ رحلة تلميع الخشب.
- بعدها كنسة عادية ومسحة للمكان اللي هنمسحه بانتظام طول ما احنا شايلين الفرش.
المطبخ
الأجهزة المنزلية
- البداية دايمًا مع الملكة المتوجة: التلاجة. نفصل الكهربا ونفضّي التلاجة، ونشيل كل الأرفف وننقع فيها كل أرفف التلاجة.
- بمنظف التلاجات، هنرش كل التلاجة من جوا والزوايا والباب من جوا. وخلي بالك ما تجبييش منها على زرار النور عشان ما يعلقش أو يكهرب. وبالسفنجة، ندعك أي بقع أو حاجات لازقة أو بفوطة نمسح بيها كل التلاجة من جوا. وبرده بفوطة نضيفة مبلولة مياه دافية ومعصورة نمسح الخليط ده كله من التلاجة. كمان نمسح الكاوتش بتاع الباب ونرجع نمشي عليها بفوطة معصورة كويس.
- نصفّي الأرفف اللي اتغسلت وننشفها ونركب كل حاجة مكانها. وما ننساش نمسحها من فوق وتتلمع من بره حسب خامتها وكمان مقابض الأبواب تتلمع.
- بعدها، هنبدأ بتنظيف عميق للتلاجة وكل الأجهزة اللي في المطبخ. زي الخلاط والكبة والكاتل وكل الأجهزة المساعدة. هنستخدم في العملية دي اسفنجة ناعمة، فوط نضيفة، وايبس، فرشاة سنان قديمة، أساتك مطاطة. في الأول، هنعمل طبق جواه معلقتين صابون مواعين ومعلقتين كربوناتو عليهم كوب خل. ولما يهدا الفوران، هنضيف كوب مياه دافية ومعلقتين منظف متعدد الاستخدامات، بعدها نقسم الخلطة دي نص في بخاخة ونص في طبق.
إزاي أنضف الأجهزة المنزلية وأحافظ عليها؟
تنظيف المطبخ
- هننضف الأجهزة، بفوطة نضيفة نحطها فالخليط و نعصرها كويس جدا و نبتدى ننضف جسم الجهاز من برا و السلك ، وممكن نحتاج فرشاة السنان للاماكن الضيقة.. و لو فيه بقع هنستخدم السفنجة، بعدها بفوطة قطن مبلولة نمسح مرة أخيرة ونخلي بالنا عشان مفيش مية تدخل جوه الجهاز.
- تالت مرحلة هي تنظيف حوائط المطبخ والبوتجاز والفرن والشفاط، الحوائط لو نضيفة و محتاجة تلميع يبقى بالموب أو فوطة معصورة و نلبسها للمساحة و نلمع الحيطان كلها، لو فى دهون بسيطة هنحط حلة فيها مية عالنار و نسيبها تغلى و الشباك مقفول لغاية ما الحوائط تشبر و نمسحها بنفس الطريقة، أما بقى لو فى دهون تقيلة هتربطي على اطراف المساحة سلك تنضيف باساتك مطاط و تدعكى الحاجات العالية و بعدها نلمع زى اول طريقة.
- خلطة الكربوناتو هنستخدمها لسطح البوتجاز، والمياه اللي اتغلت عشان الحوائط هننقع فيها الحوامل فى جردل عميق، ونعكسها ونزود مياه مغلية عشان ينضفها. وننقع كمان الصاج وفلاتر الشفاط. أما عيون البوتجاز فحسب خامتها تتنقع في كركديه أو كربوناتو وملح ليمون أو بصابون عادي وقطعة سلك.
- الحاجات اللي اتنقعت تتغسل. وما ننساش الجوانتي عشان مذيبات الدهون بتبوظ الإيدين. أما الفرن من جوه، فحسب حالته. ممكن نكتفي بمياه سخنة وصابون وممكن مذيب دهون.
- آخر مرحلة هننضف فوق المطبخ، وننضف الوحدات من جوه، ونعيد ترتيب الدواليب بطريقة مريحة ومناسبة بدون كركبة.
الحمام:
زي باقي الغرف، هنبدأ من فوق لتحت، ويفضّل الحمام يتنضف بعد ما يكون حد لسه واخد دش عشان بخار المياه يخلي المهمة أسهل. نزعف من فوق، ونغسل الحيطان بالمياه ونمسحها، وبعدها نبدأ تنضيف الحوض والتواليت والبانيو بالليفة. وبعدها الأرض تتغسل بالصابون والديتول وتتنشف. خصصي حاجة جديدة لرمضان، ستارة بانيو جديدة، فرش أرض جديد أو حتى فوطة جديدة.
تنظيف البيت قبل رمضان مش بنعمله كله مرة واحدة، بيتعمل على مراحل وفي السكة بنعيد على اللي عملناه سطحيًا. وبنخلي الفرش والزينة قبل رمضان بيوم أو اتنين عشان يكون للشهر زهوته وشعوره الجميل. طرق الحفاظ على زينة رمضان للسنة اللي بعدها
التعليق باستخدام حساب فيس بوك