اتكلمنا قبل كده عن روتين تنظيف البيت كله بسرعة وسهولة. لكن حتى لو الروتين سهل، فيه مهمات جواه محتاجة مننا خطوات كتير وحسابات ومعرفة بأدق التفاصيل، زي تنظيف الحمام اللي لازم يكون خطوة بخطوة معروف هنعمل فيه إيه وهنشتري إيه قبل ما نبدأ من أدوات تنضيف وغيره. عشان كده النهارده حبينا نسهّل عليكي ونقول لك روتين تنظيف الحمام خطوة بخطوة.
الأدوات اللي هتحتاجيها
- ليفة \ سلك مواعين
- مطهر
- منظف للسيراميك
- منظف الأرضيات
- فرشة بلاط
- منظف كرسي الحمام
- فرشة التواليت
- جردل وشرشوبة
- فوطة صفرا
خطوات تنظيف الحمام
الأول هنروّق
هنمسك شنطة قمامة كبيرة، هنفضّي فيها السلة، هنرمي أنبوبة المعجون الخلصانة، وعلبة الصابونة، أو ازازة الـhand soap الخلصانة، ماكينة الحلاقة الـsingle use بتاعتك أو بتاعة جوزك، أي حاجة مش في مكانها أو أي حاجة خلصانة.
جزء من الترويق كمان هو تغيير الفوط وإننا نشيل الفوط الصغيرة أو البانتيهات اللي متعلقة على المشابك الصغيرة. وإننا نشيل ستارة البانيو ونغسلها ونعلق ستارة تانية. ولو عندنا دواسات في الحمام، هنغسلها هي كمان ونحط دواسات تانية.
هنرش
قبل ما نبدأ أي حاجة، هنرش منظف السيراميك ببخاخ فيه المنظف ومياه، على السيراميك في الحيطان، وعلى الحوض من فوق ومن برا ومن تحت وعلى السيفون وفي البانيو بكل حتة فيه. هنرش منظف الأرضيات على الأرض وخصوصًا في الأركان والجزء اللي حوالين كرسي الحمام والحوض والبانيو لإن الأماكن دي بالذات عرضة للجراثيم وتراكم الوساخات. كرسي الحمام نفسه من فوق رشي عليه منظف السيراميك العادي لكن من الداخل صبي منظف كرسي الحمام بالطريقة اللي بتشوفيها في الإعلانات دايمًا.
الشباك والشفاط
تنفيض بفوطة صفرا ناشفة، وبعدها الدش يتسلط على الشباك أو الشفاط عشان الغبار يروح تمامًا.
الليفة
هنعدّي بالليفة أو السلكة على كل الاسطح، السيراميك في الحيطان، الحوض من جوا وبرا وتحته، والبانيو من جوا وبرا وكرسي الحمام من فوق ومن الخارج. ونشطف كل حاجة بالميا كويس.
فرشة البلاط
هنعدي على الأجزاء الصعبة في البلاط اللي سيبنا عليها المنظف شوية ونفركها كويس بفرشة البلاط ونمشّي ميا على الأرضية كلها عشان تشيل معاها كل التراكمات دي.
الشرشوبة
دي آخر خطوة وهي مسح أرض الحمام مسحة سريعة بالجردل والشرشوبة. وتنشيف الأرضية.
المصدر
Better Homes and Gardens
التعليق باستخدام حساب فيس بوك