محتويات المقال
تقريبًا أول حاجة بتتطلب مننا لما نروح لدكتور رجيم أو نفكر نعمل رجيم عشان نخس إننا نعمل رياضة. مش بس الرياضة بتساعد على حرق الدهون والتخسيس، بس الرياضة مهمة جدًا كأسلوب حياة حتى لو تمارسي رياضة المشي في البيت دقايق عشان تحافظي على صحتك ومرونة العضلات. بس للأسف معظمنا كأمهات ما عندناش وقت خصوصًا عشان عندنا أطفال وخصوصًا لو بنشتغل كمان إننا ننزل نروح الجيم أو حتى نمارس رياضة المشي أو الجري. وكمان ممكن في بعض الأحيان ما يبقاش فيه إمكانية إننا نقدر نتحمل ميزانية الجيم المرتفعة. عشان كده، ممكن تفكري إنك تعملي تمارين رياضية منزلية سهلة وبسيطة زي Squats والـPlanks. لكن من أشهر التمارين اللي انتشرت مؤخرًا على جروبات وصفحات التخسيس على السوشيال ميديا تمرين الـ Walk at home . وفي المقال ده هنعرفك أكتر على التمرين ده وإزاي بتكون ممارسة رياضة المشي فى البيت مهمة ومفيدة.
مؤسسة تمرين المشي في البيت
ممارسة رياضة المشي في البيت Walk at home
مؤسسة فكرة الـWalk at home هي Leslie Sansone ليزلي سانسون، خبيرة لياقة بدنية وأم لتلات أطفال مؤمنة بإن المشي هو أفضل طريقة للحفاظ على الرشاقة والصحة وبيقلل التوتر ويجدد النشاط. عشان كده، ابتكرت برنامج للمشي بيساعدك تعملي تمرين المشي فى البيت من غير ما تحتاجي تنزلي الجيم أو تستخدمي آلة، والتمرين مناسب لكل الأعمار والأوزان.
فكرة تمرين المشي في البيت
التمرين عبارة عن مجموعة من الحركات الرياضية اللي بتشتغل على تنشيط واستخدام كل عضلات الجسم وطبعًا أساس التمرين المشي. مش بتحتاجي تستغلي مساحة كبيرة لإنك بتتحركي في مكانك، ولا إنك تستخدمي آلة معينة ولا أدوات رياضية. ممكن تحتاجي أوزان فقط على حسب اختيارك وقدرتك. وفي خلال ربع ساعة، هتعملي تمرين مساوي للمشي حوالي ٢ ميل من غير ما تتحركي من مكانك. التمرين بيحرّك عضلات الجسم وبيزوّد ضربات القلب اللي بتعمل على حرق الدهون وتنشيط الدورة الدموية وشد العضلات وحرق الدهون والتخلص من الوزن الزائد وترهلات البطن والأرداف. مؤسسة التمرين ليزلي بتنصح بالاستمرار على التمرين واتباع نظام أكل صحي وفي خلال 21 يوم ممكن نحس بفرق فى المقاس والوزن.
ممارسة رياضة المشي في البيت Walk at home
ممكن تشوفي هنا أفضل 6 تمارين لتكبير الصدر في البيت سريعًا
أنواع تمرين المشي في البيت
التمارين فيها مستويات بتبدأ من المشي لميل واحد (حوالي كيلو ونص) لغاية ٥ أميال. مدة التمرين على حسب عدد الأميال بتبدأ من حوالي 10 دقايق لـ 45 دقيقة تقريبًا. وفيه تمارين عبارة عن المشي ٥٠٠ خطوة في ٥ دقايق بس لو ما عندكيش وقت كبير تتمرني. فيه بعض التمارين كمان بتركز على الكارديو (التمارين القلبية اللي بتعمل على زيادة ضربات القلب) وفيه تمارين قوة بتستخدمي فيها أدوات رياضية بسيطة زي الأوزان.
التمرين سهل ومسلي بس لو انتي حامل أو عندك إصابة أو أمراض مزمنة، يفضل إنك تستشيري طبيبك المعالج قبل ممارسة التمرين.
التعليق باستخدام حساب فيس بوك