الأطفال ليهم تصرفات غريبة جدا، ومن أكتر التصرفات اللي بيعاني منها أسر كتير هو ظاهرة إخفاء الحاجات كنوع من اللعب والهزار، واحيانا لأسباب تانية يعلمها ربنا في نفس الطفل الصغير اللي يقدر بحركة صغيرة يخليكي انتي وكل أفراد الأسرة تلفوا حولين نفسكم إلى ما لا نهاية دون كلل أو ملل، لذلك لو كنتي بتقعي في المأزق ده كتير معاه حبيت أجيبلك من الآخر وأقولك على أشهر 10 أماكن الطفل بيخبي فيهم أكتر حاجات بتضيع في البيت زي الريموت والتليفون وسلسلة المفاتيح وغيرها مما خف وزنه وعظم أثره.
خلينا في البداية نتفق إننا هندور بمستوى طوله في البداية وبعدين نفكر في أي حاجة تانية، يعني تستبعدي الأماكن العالية إلا لو كان بيعرف يطلع على كرسي فدي فيها كلام تاني، يعني بالمختصر دي أشهر الأماكن اللي ممكن يخبي فيها الحاجات
تحت العفش أو وراه
تحت الأنتريه أو الصالون، أو المطبخ، أو السرير، باختصار تحت أي قطعة عفش عندك في الشقة، هم غالبا بيحبوا يستخبوا تحت الحاجات ودي أقرب أماكن الطفل إيده بتطولها فلو هو طفل برئ ولسة في بداية مرحلة الشقاوة ده هيكون أول مكان يخطر على باله “تحت أي حاجة في البيت أو وراها”.
جوه الغسيل
من الاماكن اللي هختخطر على بالك أوي إنك تدوري في الغسيل، في الحالة دي هو بكل براءة بيكون شال الشيء اللي بتدوري عليه وخباه مباشرة في الغسيل أو في الغسالة أو رماه في مكان ما في أماكن تجميع الغسيل، لذلك هيكون مفيد جدا إنك تنفضي الغسيل قبل ما تحطيه في الغسالة وده لمصلحتك انتي في المقام الأول.
في الدولاب
دي برضو من الأماكن المفضلة، بيديله إحساس شديد بالأهمية إنه يفتح الدولاب يشيل حاجة معينة ويقفل الدولاب تاني، أصلا هو غالبا في الحالة دي هيكون بيقلدك فلا بأس.
في العربية بتاعته
دي بقى المخبأ السري اللي هتلاقي فيه كل وأي حاجة ضايعة تخطر في بالك، هوب ياخد الحاجة، يفتح شنطة العربية وهوب الحاجة تختفي، لذلك بنصحك تاخديها من قصيرها وأي حاجة ضايعة طوواااالي تدوري عليها في شنطة عربية الطفل على طول.
في السجاد الملفوف
مش هنسى مرة لما والدتي كان عندها معاد عملية مهم والعملية اتأجلت لأننا مش لاقييت مفاتيح العربية والشقة وكل حاجة للأسف، طبعا بعد كده فهمنا الحكمة والتأجيل كان في صالح والدتي مش ضدها لكن بعد اليوم ده اتعلمت درس مهم جدا، إن واحد من أكتر الاماكن اللي ممكن الطفل يخبي فيها مفاتيح الشقة هي السجاجيد الملفوفة المركونة على جمب، ودي واحدة من آخر الأماكن اللي ممكن تخطر في بالك أصلا.
في شنطة قديمة
الشنط القديمة والأدراج اللي مش بتتفح وكل الأماكن المهجورة في بيتك هي بيئة خصبة للطفل عشان يخبي فيها كل وأي حاجة ضايعة.
وسط اللعب بتاعته
من الحكمة إنك لو دورتي في كل مكان، وملقتيش الحاجة الضايعة إنك تدوري في لعب إبنك، في المكان ده بالذات هتلاقي حاجات كتير ضايعة بما فيها المعالق الصغيرة والشوك اللي تخيلتي انها راحت في الزبالة,
في التلاجة أو وسط الحلل
كام مرة جيتي تطلعي حلة معينة ولاقيتي فيها حاجة ضايعة، وكام مرة اكتشفتي إن درج التلاجة واحد من الأماكن المفضلة لطفلك عشان يخبي فيها حاجته… قصري على نفسك المسافة وحطي الأماكن دي على قايمتك عشان ماتضيعيش وقتك.
في الزبالة
طبعا ده أسوأ مكان في الكون ممكن طفلك يورطك ويخبي الحاجة فيها، وللأسف كنت واحدة من الضحايا اللي اضطري يفضوا الزبالة ويدوروا فيها على خاتم ضايع الحمد لله لحقته، فنصيحتي لو الحاجة ضايعة وملقتيهاش في أي مكانم من المذكورين ماترميش الزبالة غير لما تدوري فيها لعل وعسى مايكونش لجأ للحل اللي بعد كده
في الشارع
طبعا هنا انتي ما عندكيش أمل، لو طفلك إيده بتوصل إنه يرمي الحاجة من الشارع وظبطيه بيعمل ده مرة أو اتنين فغالبا هو بيعمل كده على طول وفي الحالة دي أمل ضعيف جدا إنك تلاقي الحاجة أصلا.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك