تجربة: شهر ونصف من تربية الزرع في بيتي

أنا شيماء الجمال أم لـ3 أطفال وكاتبة متخصصة في مجال الصحة النفسية. في سلسلة مقالات “النفسية بعافية” بتكلم معاكم في مواضيع ليها علاقة بتحسين نفسيتنا وبنقل ليكم تجاربي وإللي بتعلمه يوم بيوم..

في الموضوع ده هحكيلكم ليه قررت أعتني بـ زرع طبيعي في البيت عندي..

بخلاف إنه الزرع شكله حلو كديكور في المكان إللي عايشيين وفوايده المعروفة في تجديد الأكسوجين إلا إني اكتشفت إنه ليه فوايد نفسية كتير لمستها بنفسي وانعكست عليا إيجابيًا..

سمعت مقولة زمان بتقول إنه لما بيكون فيه شخص داخل مصحة علشان يتعالج من الإدمان بيخلوه يعتني بحيوان أليف أو زرع.. وكانوا بيقيسوا نسبة تطور العلاج بمدى قدرة الشخص المدمن ده على الالتزام برعاية النباتات.. كل ما يعرف يعتني بيها ويبقى مسئول عنها كل ما يعرفوا إنه بيتحسّن..

ومش بس الإدمان.. أمراض نفسية كتير.. يمكن ده كان مخوفني أربي نباتات في الأول! كنت بقول لنفسي لو ما عرفتش أعتني بالزرع هتضايق من نفسي وهحس إني شخص غير مسئول.. وكنت بقول لنفسي: “إنتي عمرك ما عرفتي تربي حاجة بتفاني لا زرع ولا حيوانات ولا أي حاجة”..

بس لما نقلت في بيت جديد.. قررت أجرب وأغير دماغي وأعتني بزرع ويمكن إللي شجعني على كدة الحظر المنزلي بسبب الكورونا.. والحبسة في البيت وأهمية إننا نوجد حاجة تحببنا في قعدة البيت.. فقلت أحاول أعمل قعدة خفيفة في البلكونة.. زي ما أغلب الناس حاولوا الفترة دي..

وابديت اسأل اصحابي.. أبدأ بإيه؟؟ قولولي على حاجات حمالة قسيّة وسعرها معقول وتتفع للمبتدئين وما تموتش مني بسرعة علشان مش طالبة اكتئاب..

ونصحتني صديقتي..  البوتس جوة البيت.. وسرو الليمون والصبارات برة البيت، بتتحمل قوي شمس الصيف.. ومفيش مانع من شوية نعناع علشان نشرب شاي كل يوم بالليل من نعناع بلكونتنا..

نباتات الظل- نبات البوتس

ورحت عند الراجل اشتريت الزرع وخليته يحطه في قصاري زرع بسيطة تحتها طبق.. وهقولك كل زرعة باختصار عملت معاها إيه..

البوتس جوة البيت.. بعيد عن الشمس المباشرة وبسقيه يوم آه ويوم لأ.. وكبرت واحلوت بقالها شهر ونص..

سرو الليمون بسقيه كل يوم ولازم التربة تكون منديّة.

الصبارات بسقيها يوم آه ويوم لأ..

والنعناع بسقيه مرتين لإنه بيدبل بسرعة.. مرة الصبح ومرة بالليل..

والموضوع بإختصار إنه التربة ما تنشفش وتشقق أبدًا ودايما نحافظ عليها منديّة..

ولما تلاقي فيه زرعة من زرع البلكونة ابتدت تدبل وتربتها بتنشف بسرعة تعرفي إنها محتاجة مية أكتر شوية وتفضلي تسقيها وما تستسلميش.. بتصحة تاني وتقوم على حيلها لما تشم المية من جديد.. المهم التربة تكون مديذة والزرعة واقفة على حيلها..

بعد شهر ونص ابتديت أرتبط بالزرع ومفيش ولا زرعة ماتت مني الحمد لله.. ابتديت أصحى من النوم أفكر فيه.. ابتديت أخاف أبات برة من غير ما أفكر هيستقي إزاي  وده خلاني ارتبط ببيتي الجديد.. ابتديت أحبه وأصوره.. وبقيت متحمسة أجيب زرع تاني.. ابتديت أحس بالمسئولية ناحية.. ابتديت أشرب كباية شاي كل يوم العصر من نعناعة البلكونة.. بقيت مبسوطة أكتر وبقى عندي هواية جديدة.. وبقيت أتواصل مع الزرع ده سبحان الله.. واحس كل زرعة محتاجة تشرب ولا لأ.. ومحتاجة مني مية قد إيه.

نبات سرو الليمون والنعناع في البلكونة

خليني أقولك شوية معلومات وحقائق عن دور العناية بالزرع في تحسين الحالة النفسية..

• Horticultural Therapy   العلاج بالبستنة (جاية من كلمة بستان) أو العلاج بالزراعة أسلوب جديدة من العلاج النفسي لأمراض كتير زي أمراض الذاكرة والإدمان والاكتئاب والناجين من الإساءات بيعتمد على إنه الشخص يراعي الزرع كل يوم. العلاج ده بيعتمد على ما يسمى بالـBioPhilia  وهي إنه الناس بالجينات والفطرة بيحسوا بإنتماء للنباتات.
• دراسات نفسية أثبتت إنه النظر والتأمل في النباتات بيقلل الاكتئاب والقلق.
• دراسات سريرية Clinical  بتقول إنه الناس إللي بتربي زرع بيبقوا أكثر تعاطفًا مع غيرهم وإحساسا بيهم.

تربية النباتات بتعزز الثقة بالنفس والإحساس بالإستقلالية والمسئولية والارتباط بالطبيعية وبتزود التعاطف ومهارات التأمل..

الزهور والصبارات في البلكونة

أنا حكيت لكم قصتي البسيطة مع الزرع وأتمنى كلكم تحربوا وتشاركوني صور الزرع بتاعكم.. مين فكّر يجيب زرع لما قرأ الكلام ده؟