لما الحامل بتوصل لنهاية الشهر التاسع، ولسا أعراض الولادة الطبيعية ما ظهرتش عليها، بتبدأ تدور على أي طرق لتسهيل الولادة، فبتقوم تمشي، أو تشرب مشروبات زي القرفة، أو تستخدم زيت الخروع لتسريع الولادة الطبيعية، بس هل يا ترى ده بيسهل الولادة فعلا؟ وهل ده آمن على الحامل وجنينها قبل الولادة؟ ده اللي هنعرفه في المقال ده:
-
إيه علاقة زيت الخروع بالولادة الطبيعية؟
زيت الخروع معروف إنه من المشروبات الملينة في حالات الإمساك الشديد، وإنه بيسبب بالفعل انقباضات وتشنجات في الأمعاء ومرات بتمتد للرحم، علشان كده تحديدًا الناس بيوصفوه على إنه بيسهل الولادة الطبيعية.
-
هل فعلًا زي الخروع بيسهل الولادة؟
زيت الخروع لتسريع الولادة
علميًا مفيش أي دراسة طبية بتأكد الكلام ده، عمليًا هو آه ممكن يسبب انقباضات للرحم، لكن مش معناه أبدًا إن هتحصل ولادة بعد الانقباضات دي.
هل تناول زيت الخروع آمن قبل الولادة الطبيعية؟
الحقيقة إن في مخاطر وأرعاض غير مريحة ممكن يسببها زي الخروع للحامل، زي:
- الإسهال.
- جفاف لو الإسهال كان شديد واستمر لفترة.
- غثيان وقيء.
- تقلصات في الرحم ممكن ماتسببش الولادة، لكن تسبب ضيق ووجع للحامل.
- نزيف بعد الولادة، بسبب التقلصات الرحمية المستمرة اللي سببها زيت الخروع.
- إرهاق شديد للأم بسبب الغثيان والإسهال والتقلصات في الأمعاء والرحم.
- لو جرعة زيت الخوع كبيرة ممكن تسبب إن الجنين يخرج فضلاته في الرحم، وده هيسبب مشاكل كبيرة في الولادة.
أعرف ستات جت لهم الولادة الطبيعية بعد شرب زيت الخروع!
الدراسة بتقول إن نص الستات اللي شربوا زيت خروع، بدأت تيجي لهم أعراض الولادة الطبيعية بعد 24 ساعة من شرب الزيت، ونسبة قليلة جدًا بدأت أعراض الولادة بعد ساعة أو اتنين بس.
لكن حتى الأعداد دي، مفيش أي إثبات على إن زيت الخروع هو اللي سبب لهم الولادة الطبيعية.
يعني أشرب زيت خروع لتسهيل الولادة ولا لا؟
الخلاصة إن لا..ماتشربيش زيت خروع لتسهيل الولادة الطبيعية، وحتى لو ولادتك محتاجة محفزات، فالدكتور هو اللي هيقولك تعملي إيه وتاخدي إيه، لإن في حلول طبية كتير بتحفز الولادة الطبيعية، الدكتور هو اللي هيقولك إيه فيهم المناسب ليكي.
ولو حصل وشربتي زيت خروع بالفعل، يبقى لازم تبلغي دكتورك وتخليه في الصورة معاكي لو حصلت لك أي أعراض غير محببة بسبب زيت الخروع.
وبنتمنى لك السلامة ليكي ولجنينك.
هل ممارسة العلاقة الحميمة قبل الولادة الطبيعية مفيد؟
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصدر:
baby.webteb.com
التعليق باستخدام حساب فيس بوك