استخدامات الليزر دلوقتي بقت كتيرة لدرجة إنها أكبر من إننا نعدها، وخصوصًا في المجال الطبي والصحي، واللي جزء منهم المجال التجميلي برضه، زي إزالة الشعر بالليزر وتبييض الأسنان بالليزر.
وعلشان كتير من العيادات والمراكز الطبية دلوقتي بقت تعلن عن استخدامها لليزر في تبييض الأسنان، خصصنا لك المقال ده علشان نجاوب على كل الأسئلة اللي ممكن تخطر على بالك في مجال تبييض الأسنان بالليزر:
-
ليه بنحتاج لتبييض الأسنان بالليزر؟
الهدف الأساسي تبييض الأسنان بالليزر هو تحويل الأسنان الصفراء أو اللي لونها رمادي للون الأبيض. لإن الأسنان بيتغير لونها على مر السنين بسبب التدخين والمشروبات اللي بتحتوي على كافايين، وأي صبغات غذائية في الأكل.
-
هل تنضيف الأسنان بفرشاة الأسنان والمعجون مش كافي؟
في حالات كتير بيكون المعجون والفرشاة مش كافيين لتبييض الأسنان وإزالة الألوان غير المرغوبة من عليهم، لإن طريقة التنضيف مرات بتكون مش صحيحة وساعات بيكون الشخص بيشرب قهوة وشاي كتير وفي بعض الحالات بيكون الشخص بيتناول أدوية بتسبب تصبغ لون الأسنان وده مش بيروح بالفرشاة والمعجون.
-
إيه هي الطريقة الصحيحة لتنضيف الأسنان؟
قبل استخدام الفرشاة والمعجون لازم نستعمل الخيط الطبي اللي بينضف ما بين الأسنان والأماكن الضيقة، وبعد استخدام المعجون والفرشاة لازم نستخدم غسول فم علشان بيوصل لجميع أجزاء الأسنان بلا استثناء، وبيطهر الفم واللثة من الجراثيم.
-
إيه هي الآلية المستخدمة في تبييض الأسنان بالليزر؟
الطريقة بسيطة جدًا، بيتم وضع حاجز بلاستيك على اللثة علشان يحميها، وبعدين بيدهن الطبيب مادة أوكسيجينية بتركيز مرتفع على الأسنان، وبمساعدة جهاز الليزر المادة دي بتوصل للأسنان بشكل أسرع وأعمق، وبعد الخطوة دي بيتم إزالة المادة.
-
تبييض الأسنان بالليزر بيستغرق الوقت قد إيه؟
ساعة تقريبًا.
-
إيه سلبيات وأضرار تبييض الأسنان بالليزر؟
مفيش شك إن معدلات نجاح تبييض الأسنان بالليزر مرتفعة جدًا، إلا إن في سلبيات لها زي:
- إن السن بيتعرض لتسخين جامد وده بيسبب تفكك الخلايا واللي بيؤدي ساعات لالتهابات ونخر مع كتر مرات التبييض.
- تركيز مادة الأوكسجين اللي بتدهن على الأسنان بيكون أعلى من التركيز المستخدم في علاج تبييض الأسنان العادي، وده بيؤذي اللثة بشكل مباشر.
- لسا لحد دلوقتي الدراسات الطبية والعلمية موصلتش لكل التأثيرات السلبية لتبييض الأسنان بالليزر على المدى الطويل، غير إنه بيسبب حساسية وألم في الأسنان بعدها لبعض الناس.
وتقدري تشوفي الطريقة دي: تبييض الأسنان طبيعيًا في المنزل.. 5 طرق نتيجتها في دقايق!
-
تبييض الأسنان بالليزر بيبيض إيه بالزبط؟
بيبيض الجزء الخارجي بس من الأسنان، ومش بيبيض الجزء الداخلي ولا التيجان وحشوات الأسنان، علشان كده كتير بيحتاج الشخص ييغير لون التيجان علشان يليق مع اللون الجديد للأسنان بعد التبييض بالليزر.
-
هل نتائج تبييض الأسنان بالليزر متساوية؟
الحقيقة إنه لا مش متساوية، فالأسنان الصفراء والرمادي والبنية بتستجيب للتبييض بالليزر بنسب مختلفة، ولو في الفم الواحد في أسنان بأكتر من لون، فممكن جدًا بعد التبييض بالليزر تفضل درجة بياضها مختلفة برضه.
كمان أسنان الأطفال استجابتها للتبييض بالليزر مختلفة عن أسنان البالغين.
-
هل تبييض الأسنان بالليزر حل نهائي لتصبغات الأسنان؟
زي أي حاجة، لو محافظتش عليها هتبوظ تاني، فمحتاج الشخص يواظب على تنضيف أسنانه بطريقة صحيحة، ويقلل من استهلاك مسببات تصبغ الأسنان.
-
هل ينفع الحامل تستخدم تبييض الأسنان بالليزر؟
يمنع القيام بعلاج تبييض الأسنان خلال فترة الحمل، لإن لسا مفيش أي دراسات مؤكدة عن تأثير الليزر على الجنين، وبما إنه علاج تجميلي، فممكن يتأجل لبعد الولادة.
-
هل الشخص محتاج يتابع مع الطبيب بعد تبييض أسنانه بالليزر؟
آه بيحصل متابعة بعد إسبوع، ولازم استشارة الطبيب المعالج قبل استخدام أي مواد مبيضة للأسنان في البيت.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر:
webteb.com
التعليق باستخدام حساب فيس بوك