عيد الفطر قرّب، وبقينا نسمع ونشوف على السوشال ميديا وعلى التلفزيون الكلام عن زكاة الفطر، وناس بتسأل وشيوخ بتجاوب، وبوستات بتلخبطنا، علشان كده إحنا هنقولك في المقال ده على كل حاجة إنتي محتاجة تعرفيها عن زكاة الفطر، ومصدرنا في المعلومات هو دار الإفتاء المصرية، علشان نقولك المعلومة موثوقة وأكيدة:
إيه هي زكاة الفطر؟
هي مقدار محدد من الحبوب أو ما يعادلها بالفلوس.
ليه بنطلع زكاة الفطر؟
ربنا شرعها للمسلكين، علشان يجبروا بيها أي تقصير في صيامهم، وعلشان تجبر خاطر الفقراء في العيد وتفرحهم.
هل الزكاة للبالغين بس؟
لا.. زكاة الفطر بتدفع عن البيبي اللي لسا مولود لحد أكبر سن موجود في الأسرة.
زكاة الفطر مقدراها قد إيه؟
بمقاييس دلوقتي مقدار 2.04 كيلو جرام من القمح، أو ما يعادله بالفلوس، واللي اتحدد السنة دي بما يعادل 15 جنيه مصري، لكل فرد في الأسرة، وطبعًا تقدري تزودي عن الرقم ده لو قدرتي.
أدّي لمين زكاة الفطر؟
مصارف زكاة الفطر هي نفس مصارف زكاة المال:
“لِلْفُقَرَاءِ وَالْمَسَاكِينِ وَالْعَامِلِينَ عَلَيْهَا وَالْمُؤَلَّفَةِ قُلُوبُهُمْ وَفِي الرِّقَابِ وَالْغَارِمِينَ وَفِي سَبِيلِ اللهِ وَابْنِ السَّبِيلِ”
أقدر ادفع فلوس الزكاة لجمعية خيرية؟
آه تقدري بس بشرط تكون جمعية أو مؤسسة أو جهة موثوقة، وتكوني متأكده إن مفهاش فساد مالي.
إمتي وقت دفع زكاة الفطر؟
من أول رمضان، أو قبل العيد بيومين، أو قبل مغرب أول يوم العيد، بس يستحسن إنك تدفعيها قبل العيد، علشان الناس اللي هتدفعي لهم يلحقوا يستفيدوا منها قبل العيد.
هل في حد ممكن مايدفعش الزكاة؟
في حالة إنه يكون فقير مش لاقي أكل ياكله في اليوم، في الحالة دي بيكون معذور لإنه غير مقتدر على الدفع.
طيب ناس كتير بتقول لازم حبوب مش فلوس، أعمل إيه؟
اختاري اللي ترتاحي له، وبرضه شوفي مين اللي انتي ناوية تدي له الزكاة إيه اللي هيفيده أكتر، فمثلا لو جمعية خيرية متخصصة في علاج غير المقتدرين، لو هتديها حبوب هيعملوا بيها إيه؟
ممكن تكوني هتديها للست اللي بتساعدك في تنضيف البيت، وتكون هي بتخبز وبتطبخ وهتقدر تستخدم الحبوب وهتكون مفيدة لها، في الحالة دي ممكن تديها حبوب.
أدي زكاة الفطر لشخص واحد ولا لكذا شخص؟
اللي تختاريه مش هتفرق، بس حاولي لو الملبغ مش كبير، ما تقسميهوش على أفراد كتير، علشان كل فرد يلحق يستفيد بالفلوس دي وتفرحه فعلا، وده هدف من اهداف الزكاة.
وكل سنة وإنتي وأسرتك طيبين.
10 أماكن تخرجي فيهم الزكاة وانتي مطمنة وبسهولة
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك